1 DLAŊ MULINARA 15 - Boy Lonana

David min tam a tli Zandukka

¹ David min ziginina kam hu ɦoŋziimma. Nam min lina ki kay Zandukka vi Lonara, vaɗ mbutluɓma kaɗu.

² Na ɗaŋŋi nam di ana, «Suu Levina tli Zandukka vi Lonara ni asi doy hol, kay ana Yawe mansi ki a tli Zandukka vi Yawera, hin lam sunda a fafaɗta may.»

³ David tok suu Israelna halaŋ hu Yerusalem a tli Zandukka vi Yawera, tuɗuɗ hu li ma nam minim ki kaɗna.

⁴ Nam tok goryoŋ Aaronna ay u suu Levina lay.

⁵ Kay goryoŋ Kehatna, Uriyel sa ŋgol ma fokosina u gorsemma halaŋŋi kis duk dok-mba'.

⁶ Kay goryoŋ Merarina, Azaya sa ŋgol ma fokosina u gorsemma halaŋŋi kis kis mba' duk dok-mba'.

⁷ Kay goryoŋ Gersomma, Joel sa ŋgolma fokosina u gorsemma halaŋŋi kis duk dok-hindi.

⁸ Kay goryoŋ Elisafanna, Semaya sa ŋgol ma fokosina u gorsemma halaŋŋi kis kis mba'.

⁹ Kay goryoŋ Hebronna, Eliyel sa ŋgol ma fokosina u gorsemma halaŋŋi dok-kalavandi.

¹⁰ Kay goryoŋ Uziyelna, Aminadab sa ŋgol ma fokosina u gorsemma halaŋŋi kis duk doogo yam mba'.

¹¹ David yi suu li ɓivunna Sadok u Abiyatar, suu Levina may, Uriyel, Azaya, Joel, Semaya, Eliyel u Aminadab.

¹² Nam hin dasi ana, «Agi ni suu ŋgolo suu fok suu vi suu Levina. Mbuɗugi tagi ki teteɗ, agi u gorsegina, hoŋogi Zandukka vi Yawe, Lo ma vi suu Israelnana, ki hu li ma an miniɗna kaɗna.

¹³ Gasi daŋ may kay ana dlara li ki jewra ni agi kaɗi, Yawe, Looygina, camiya, kay ana ami halam ka u gaɗtaɗi.»

¹⁴ Suu li ɓivunna u suu Levina mbuɗ tasi ki teteɗ ɗaŋ a tli Zandukka vi Yawe, Lo ma vi suu Israelnana.

¹⁵ Goryoŋ suu Levinana ko Moiz di ka ko boyna vi Yawena na, tli Zandukka vi Lonara kay pel bikisi u guna.

¹⁶ David di suu ŋgolo suu fok suu njun suu li ɓivunnana ana asi tin gorsesina hu sunusi a gi soolla u tlesuu bu suu gi soolla, a buusi ki kolo eŋga a li furira.

¹⁷ Suu Levina tin suuna hu liisi ma sunda, Heman, goŋ Joelna duk gorsemma Azaf goŋ Berekiyana, duk goryoŋ Merarina, gorsesina Etan goŋ Kusayana.

¹⁸ U asi a mbara ni gorsesina, Zekari, Ben, Yaziyel, Semiramot, Yeyiel, Uni, Eliyab, Benaya, Maseya, Matitiya, Eliflehu u Mikneya, Obed-Edom u Yeyel suu gol u vun zira.

¹⁹ Duk suu gi soolla ni, Heman, Azaf u Etan dif mayra yi Kolo u ndaɗta kosiya.

²⁰ Zekari, Aziyel, Semiramot, Yeyel, Uni, Eliyab, Maseya u Benaya, dif mayra deleɗ goora kosiya.

²¹ Matitiya, Eliflehu, Mikneyahu, Obed-Edom, Yehiya u Azaziya diŋ ma zewem kalavandina kosi a tuɗ u soolla.

²² Kenaniya sa ŋgolma fok suu Levina ma yow tlena, gi ii tlesuu yowosina, kay ana nam ndaki kay dla ndaɗta.

²³ Berekiya u Elkana ni suu gol u Zandukka.

²⁴ Suu li ɓivunna Sebaniya, Yasafat, Nataneyel, Amasay, Zekari, Benaya u Eliyezer bu tokolomma fok Zandukka vi Lonara. Obed-Edom u Yeliya ni suu gol u Zandukka.

Zandukka tew ki Yerusalem

²⁵ Na ɗaŋŋi, David suu basi suu Israelna u suu ŋgolo suu fok suu buɓ buɓma tuɗ u furira a hoŋ Zandukka Galamba vi Yawera ay ki hu ziŋ Obed-Edomma day.

²⁶ Asi ŋgaɗ bolo mbutlina a ɓivunna kiɗisiya may, gamlagina kiɗisiya may a Lona njun suu li ɓivun suu tli Zandukka Galamba vi Yawera ayna.

²⁷ David cuk efodna tamu. Suu li ɓivun suu tli Zandukka kasina lay, suu gi soolla u Kenanya, sa ŋgol ma fok suu tli tlenana. David gaɓ magaara gaɗta kelem kay efodna may.

²⁸ Suu Israelna halaŋ tli Zandukka Galamba vi Yawera, tum soora uɗ may, bu tokolomma may, bu diffa may, bu diŋ ma zewem kalavandina may.

²⁹ Hu li ma Zandukka Galamba vi Yawera tew ki hu Ҥoŋzi Davidna, Mikal, goŋ Solla, gol ha ii zira. Ndaɗ wi mulna David weɗ kolo may, luu njoŋŋa may. Ndaɗ ɓeŋ huruɗ ki egem na gaw.