1 DLAŊ MULINARA 14 - Boy Lonana

David hu Yerusalem

¹ Mul ma Tyrna, Hiram, cuk suu vun sunda ay eg David u gu sedrena, suu wi yal ceɗ gogoyra, suu wi ɓal guna a minim zira.

² Na ɗaŋŋi David wi ana Yawe tinim mulna kay suu Israelna halaŋŋi namu. Mul mamba suuna hum uɗ coco ni kay suu mam suu Israelna.

³ David yow boyogina hu Yerusalem olo, hin vuɗ gor njufiina u gorɓiina olo.

⁴ Gola ni sem goryom suu nam vuɗusi ay hu Yerusalemma. Sammua, Sobab, Natan u Salomon,

⁵ Ibar, Elisua u Elpalet,

⁶ Noga, Nefeg u Yafiya,

⁷ Elisama, Beliyada u Elifalet.

Tlira David tli suu Filistinnara

⁸ Suu Filistinna hum ana asi fuu David tinim a mulna kay suu Israelna halaŋ. Suu Filistinna halaŋ yow kolo ɗaŋŋi a hal David. David hum na ni, kal ay ki ŋgafasiya.

⁹ Suu Filistinna mbay oy hu ɦuɗugumba Refayra kiyo.

¹⁰ David joɓ Lona ana, «An tuɗ duu suu Filistinna aŋ hin ɦansina ki hu duk kon su?» Yawe dam ana, «Tuɗa, an hin ɦaŋsina ki hu duk koŋu.»

¹¹ Na ɗaŋŋi asi hin tuɗ hu Baal-Perasim. David hin casi ki hu li namma. David di ana, «Lona gi zulla fok suu babali mansina u saɓak konu, ko ndal zulla mbona gaɗta na.» Ni kay ndaɗta asi tin sem li namma ana Baal-Perasim.

¹² Asi noy loogi masisina ki hu li namma, David di ana, «Ko ŋgalasi ki u kura.»

¹³ Olo suu Filistinna mbay oy ki hu ɦuɗugumba balamasi daŋgadla.

¹⁴ David joɓ Lona olo, Lona dam ana, «Tuɗ cuɗusi usiɗi. Gun ki keŋesi na day aŋ hin tew ha egesi vok li ma gura na.

¹⁵ Hu li ma aŋ hin hum sem suuna li vunna ay kolo hum ŋgusugina wa ni, aŋ kal ay ki a duuna ɗaŋ kay ana Lona hin kal ay ki fokoŋ a ci suu hu kaŋ ma Filistinnana.»

¹⁶ David li ni ko dlara Lona damba ayra na. Asi hin ci suu hu kaŋ ma Filistinnana col hu Gabaon day ta ta tew ki hu Gezer.

¹⁷ Ŋgolla vi Davidta njay ki hu mbassa halaŋ halaŋ. Yawe mbuɗum a suuna halaŋ lam ndaaramu.