1 DLAŊ MULINARA 13 - Boy Lonana

David min ana nam tli Zandukka ay Yerusalem

¹ David li tokka u suu ŋgolo suu fok suu buɓ buɓma u suu fok suu kis kisna u suu ɓii magaara halaŋ.

² Nam di suu Israel suu tokkina halaŋ ana, «Lini agi wi ana dla ndaɗta jiviya, dla ndaɗta col ay ni ko Yawe, Looygina, ni aygi gi sunda kay gorseygi suu hin ha vo hu mbassa Israelnana halaŋ halaŋ kay suu li ɓivunna, kay suu Levina hu li ma asi kaki huna a asi mbay taɓ u aygira.

³ Olo, aygi hin hoŋ Zandukka vi Loyginara ay egeygiya kay ana hu cokira vi Solla ni aygi ɦal taygi ka kaɗɗi.»

⁴ Suu tokkina halaŋ hurusi vi a li ko ndaɗta na daŋ may. Kay dla ndaɗta gol ii suuna halaŋ jiviya.

⁵ David tok suu Israelna halaŋ col ay fun lum ma Egiptena day ta ta tew ki fun grek ma Hamatna, a hoŋ Zandukka vi Lonara ay ki hu Kiriyat-Yerim.

⁶ Nam tuɗ hu Baala hu Kiriyat-Yerim u suu Israelna um halaŋ hu Yuda a hoŋ Zandukka vi Lonara ayra, ta vi Yawe ta tini kolo kay Serubimma, hu li ma yam sem huna.

⁷ Asi tli Zandukka vi Lonara ay hu pus pus ma wilina, col ay hu ziŋ Abinadabma day. Uza u Ahiyo tuɗ fok pus pusna.

⁸ David u suu Israelna halaŋ luu njoŋŋa fok Lona, gi soolla may, bu diŋŋa u diŋ ma zewem bolowna may, dadarina may, tlesuu bu suu daŋŋa u tokolomma may.

⁹ Asi tew ki hu maɗakŋa ma Kidonna. Uza maɗ kom a vi Zandukka kaŋgaa kay ana mbutlina hal gin a gaɗ ki kaŋgaa.

¹⁰ Yawe mbuɗ ki yara u Uza, camu, kay ana nam maɗ kom kay Zandukka. Nam miɗ hu li namma fok Lona.

¹¹ David hurum ɓeŋ ki kay dlara Yawe mal hulotta ci Uza kira, asi yi li namma ana, Hulotta Uza, gak gak karam lay.

¹² David li ndaa Lona hu buu namma, di ana, «An hin li ni ana me a hoŋ Zandukka vi Lonara ay varanda ni ge?»

¹³ Na ɗaŋŋi David hin jok u Zandukka ay ka varambi, hu Ҥoŋzi Davidnaɗi, may nam tiniɗ iriɗ ki hu ziŋ Obed-Edom ma Gitna.

¹⁴ Zandukka vi Lonara buu hu ziŋ Obed Edomma tilna hindi. Yawe hin paɗ vunum ki kay ziŋ Obed-Edomma u tlesuu varamma bel.