1 DLAŊ MULINARA 12 - Boy Lonana

Suu tuɗ ko tasi u David jew hu Siklagŋa

¹ Gola ni suu mbay eg David tok hu Siklag hu li ma nam ka ki day eg Sol ma goŋ Kisna tuna. Ndumusi ki duk suu duuna ndummi, asi kal hu li ma duuna gaw.

² Asi li sunda ni u kosi ma njufna may, ma gulna may, a duu u gogoyra may u mbuurura mayra. Duk gorseŋ Sol suu vi Benjaminna ni

³ sa ŋgolna Ahiyezer u Yoas goŋ Sema ma Gibeana Yeziyel u Pelet ma goŋ Asmavetna, Bereka u Yehu ma Anatotna.

⁴ Ismaya ma Gabaon ma duu ma duk suu Dok-Hindina, ŋgolla vi suu Dok-Hindina.

⁵ Irmaya, Yaziyel, Yohanan u Yozabad ma Gederana.

⁶ Eluzay, Yerimot, Bealiya, Semariya u Sefatiya ma Harufna,

⁷ Elkana, Isiya, Azarel, Yoezer, Yasobeam suu Korena.

⁸ Yoela u Zebadiya goŋ Yeroam ma Gedorna.

⁹ Suu vi Gadna ɓorow ii tasi ki tuɗ eg David hu li ma ŋgayra hu fulla. Asi ni suu saɓakŋa, suu duu suu ki haɗi kay dla duunana u mbarina kosi may, saɓiina kosi may. Asi ɦiŋ coco ko ndal dlona na. Feɗ coco ko ndal dukka kolo kay ɦinira na.

¹⁰ Ezer ni sa ŋgolna. Obadya ni sa a mbarana, Eliyab ni ma a hindirana,

¹¹ Misemanna ni ma a fiɗirana, Irmeya ni ma a vadllana.

¹² Atay ni ma a karkiyarana, Eliyel ni ma kiɗisiyana,

¹³ Yohananni ma a kalavandirana, Elzabad ni ma a dleeŋerana.

¹⁴ Irmeya ni ma doogona. Makbanay ni ma a doogo yam dewrana.

¹⁵ Suu ŋgolo suu fok suu duuna suu goryoŋ Gad suu duk ɦiw ni ko wanda na, toɓo ma goo dukusi saɓakam ii suuna kis, ma ŋgol ma dukusi saɓakam ii suuna buɓ.

¹⁶ Asi ni suu ɗiŋ lum ma Yurdanna ki hu til ma jewna hu li ma nam sulul ki na fuh fuhna, njay suu hu ɦuɗugumbana ki u maɗiina may u fiɗigina mayna.

¹⁷ Goryoŋ Benjaminna u suu vi Yudana mbay ta ta tew ki hu li ma David ŋgay huna.

¹⁸ Nam kal ay ki fokosi hin ɓakasi boyna dasi ana, «Lini agi mbay egenni u heɓpa a njununda ni an hin li ni na tok u hurun halaŋ a taɓ tan u agira may. Na may li ni a ganan yan maŋ suu babali mansinana ni, na ɗaŋŋi ko dla co li konɗi, ko Lo ma vi somoyoygina wi dla ndaɗta gaɗ iriɗ lay.»

¹⁹ Na ɗaŋŋi Musukka mba kay Amasay ma ŋgolla fok suu Dok-Hindina. «Ami ni maŋu, David, ami ni u aŋu, goŋ Jesena. Heɓpa, heɓpa u aŋu, heɓpa u sa ma njunuŋŋa. Kay ana Looŋŋa njunuŋŋi namu.» David vasi varam, lasi koyra, hin tinisi duk suu ŋgolo suu fok suu duunana.

²⁰ Suu vi Manasena taɓ tasi u David hu li ma nam mbay u suu Filistinna, duu u Solna may. Suu asina ndak ka a njunusiɗi, kay ana suu ŋgolo suu Filistinna vi vunusi vi ni, dik David ki dam ana, «Nam vi vunum u malamma Sol ni kaygiya.»

²¹ Hu li ma David tuɗ ki hu Siklagŋa, suu vi Manasena taɓ ki umu. Adna, Yozabad, Yediyael, Mikael, Yozabad, Elihu u Siletay sa ŋgol ma fok suu vi Manase suu buɓ buɓma.

²² Asi ni suu njun David u suu duunana, kay ana asi halaŋ ni suu saɓakŋa. Asi hin mbuɗ ki suu ŋgolona hu asgaana.

²³ Gasi daŋ may, buuna tew tew ni suuna mbay eg David a njunumba. Kaŋŋa mbuɗ ki saɓak ŋgolla ko ndal kaŋ ma vi Lonana na.

Ndum suu mbay taɓ u David hu Hebronna

²⁴ Gola ni ndum suu haɗasi ki a asgaana. Suu mbay eg David hu Hebron a jokom mulla vi Solla ki mam ko gaɗta Yawe ɦaɗta na.

²⁵ Goryoŋ Yuda suu yow mbarina u saɓiina kosina ni, 6,800 suu ki haɗi a asgaana.

²⁶ Goryoŋ Simeon suu saɓak suu asgaana ni 7,100.

²⁷ Goryoŋ Levina ni 4,600.

²⁸ Olo, Yoyada, Komanda ma vi suu vi Aaronna, suuna ummi 3,700.

²⁹ Olo, Sadok goo zoŋ ma saɓakŋa u suu ŋgolo suu fok suu hu dee mambana dok-mba' yam mba'.

³⁰ Goryoŋ Benjaminna, gorseŋ Solna 3,000. Ni suu ŋgolosi saɓak li sunda hu ziŋ Solna.

³¹ Goryoŋ Efrayim suu saɓak suu sesi tii ki duk suu hu dee masirana ni 20,800.

³² Hu nus dee suu vi Manasena ni suuna 18,000 yasi ay ki u sesi a mbay tin David ki a mulna.

³³ Goryoŋ Isakarna suu wi yal ma ŋga ii lina, a wi dlara suu Israelna hin laɗtana ni kis kis mba'. Ni suu ŋgolona gorsesina halaŋ halaŋ humusi vunusiya.

³⁴ Suu vi Zabulonna 50,000. Ni suu ndaki a tuɗ bagi u ɓagi masina kosi a li duuna u hurusi ma dewna na.

³⁵ Suu vi Neftalina suu ŋgolona ni buɓ. Suu yow ɓagina, mbarina u saɓiina kosi a duunana ni 37,000.

³⁶ Suu vi Dan suu ndaki a tuɗ duunana ni 28,600.

³⁷ Suu vi Aser suu ndaki a tuɗ bagi duunana ni 40,000.

³⁸ Ha ki ŋgoo lum ma Yurdanna ii hiŋa ni suu vi Rubenna, suu vi Gadna, suu hu nus deera vi Manasera ni 120,000 u ɓagi ma duuna kosi halaŋ halaŋ.

³⁹ Suu duu asina halaŋ tok a cuk tasi a li duuna u hurusi ma dewna hu Hebron a tin David mulna kay suu Israelna halaŋ. Suu Israel suu usi hinna mbay u hurusi ma dewna lay a tin David a mulna.

⁴⁰ Asi li buuna hu li namma ko tasi u David hindi, ti may, ci may, kay ana gorsesina minisi tlena ka kaŋga masiya.

⁴¹ Suu hu li nammana ta ta tew ha ki eg Isakar, Zabulon u Neftali yow tlesuu tira ay kay korra, kay jamballa, kay koro Makkara, kay mbutlina. Fuɗta, komnjoɗi tulumma, vuɗ tlesuu sooyna, sum veŋŋa, mbulna mburi suu ŋgolona u suu gorina bolow cocoo kay ana suu Israelna furira kal ki hurusi cocoo.