1 DLAŊ MULINARA 11 - Boy Lonana

David mbuɗ ki a mul ma Israelna

¹ Suu Israelna halaŋ tok tasi eg David hu Hebron dam ana, «Gola ami wanni ami ni sokoŋu, ni tliwiŋ lay.

² Ay ki fok jew day lay, hu li ma Sol ay a mulnana lay ni aŋŋi sa ma sel goryoŋ Israelna ki lay hoŋosi ay layna. Doli ɗini Yawe, Looŋŋa, daŋ ana, aŋŋi sa ma hin taaran suu man suu Israelnana, aŋ hin li a mulna kay suu man suu Israelna.»

³ Suu basi suu Israelna halaŋ mbay fi mulna hu Hebron. David lasi jivira vi galamba u asi hu Hebron fok Yawe. Asi fuu David a mul ma Israelna ko boy ma vi Yawe ma dam maŋ Samuelna na.

David tli Yerusalem kiyo

⁴ David u suu Israelna halaŋ tuɗ Yerusalemmi ana Jebus hu mbassa suu Jebusna kaki hura.

⁵ Suu hu Jebusna di David ana, «Aŋ ka kal ay taniɗi.» Na may ni David hin tli ɦoŋzi ma saɓak ma Siyonna, ni Ҥoŋzi Davidna.

⁶ Nam di gasi daŋ may ana «Sa ti suu Jebusna jew na tina hin mbuɗ mulna fok suu duuna.» Joab ma goŋ Seruyana tuɗ jewe hin mbuɗ ki mulna.

⁷ David kak hu li ma saɓakŋa. Ni kay ndaɗta asi yi li namma ana Ҥoŋzi Davidna.

⁸ Nam hin min ɦoŋzina ŋguy ki kam col ha hu Millo day ta ta hu ii hakara, Joab hin min u ɦoŋzi ma hinna kiyo.

⁹ David mbuɗ ŋgolla ni mbuɗi na ɗow ɗow. Yawe ma Saɓakŋa Kom Belna ka u namu.

Suu saɓak suu duu suu vi Davidna

¹⁰ Gola ni suu ŋgolo suu fok suu duu suu vi David suu njunum eŋ coco hu li ma nam ti mullana, suu Israelna halaŋ lay a nam ti mulla ko boy ma Yawe ɓakam ki kay Israelna na.

¹¹ Gola ni sem suu duu suu vi Davidna, Isobaal, goŋ Hakmonna, ni ŋgolla fok suu Dok-Hindina. Nammi sa koo saɓ mamba kolo kam kay suuna na kis kis hindi hu faɗta dewra casi ki belna.

¹² Ŋgorom dagan ni Elazar, goŋ Dodo ma Ahoana ma ay duk suu duu suu Hindina.

¹³ Nammi sa ma ay ko tam u David hu Pas-Dammimma, hu li ma suu Filistinna tok tasi a duunana. Hu li namma wanni sene ma wana, suuna ŋgay tasi ko suu Filistinna.

¹⁴ Asi lak duk senena ta gayra hal suu Filistinna casi kiyo. Yawe li dlara ŋgolla u saɓakŋa.

¹⁵ Suu Hindi cuk suu ŋgolo suu Dok-Hindina hoŋ ay eg David kay ɦinira, hu zul gogoyra Adulamba hu li ma suu Filistinna kaŋ masina ka hu ɦuɗugumba Refata.

¹⁶ David ka ni hu liim ma ŋgayra, li ma vi suu Filistin ma sunda maa ka dew hu Betlehem.

¹⁷ David ɓak ko wanda na, «Sa hin tuɗ goon yo ma cira ay hu bulla vun grek ma Betlehemma ni gege?»

¹⁸ Suu duu suu hindina tuɗ kaf suu Filistinna kasi hu kaŋ masina go yona ay hu bulla vun grek ma Betlehemma mbay u nam, ɦam maŋ David. Na may ka cambi hin li ɓivunna maŋ Yawe.

¹⁹ Nam di ana, «Lini an li dla ndaɗta ni ko Loonna gan daŋgayna. Na ni an hin ci busu suu asina a casi iiri masira kira.» Nam ka cambi. Gola ni dlara suu duu suu Hindina laɗta.

²⁰ Abisay wayaŋ Joabma ay ni sa ŋgolna fok suu Dok-Hindina. Nammi sa koo saɓ mamba kolo kam kay suu kis kis hindina cokosi ki belna. Na may nam tin sem ka kam duk suu Dok-Hindinaɗi.

²¹ Asi ŋgaam yasi na mba' su suu Dok-Hindina. Nam hin mbuɗ ki ŋgol masira. Na may nam tew ka u suu Hindinaɗi.

²² Benaya goŋ Yoyadana, goŋ sa saɓak cocona, yalna kom bolow coco layna hu deera vi Kabsela. Nammi sa ci suu mba suu vi Moab suu wi duuna ɦayna kina. Nammi sa ɗiŋ ci dlona ki kaŋga hu goloŋga hu buu ma mborhoyrana.

²³ Nammi sa ma ci sa ma Egipte ma fiyekem bikŋa vadlna kina. Sa ma Egipte namma gu saɓ mamba komba ni ko mbal ma vi suu cil barawna na. Nam tuɗ ha egem u tokolo mamba komu, ɓaɗ saɓpa ki ko sa ma Egiptena cam ki u saɓ mamba tok.

²⁴ Gola ni dlara Benaya goŋ Yoyadana laɗta. Nam tin semma kam duk suu duu suu Dok-Hindina.

²⁵ Asi ŋgaam ŋgol su suu Dok-Hindina, na may nam tew ka u suu Hindinaɗi. David tlam ki a golom umba.

²⁶ Suu duu suu sunusi ŋgolna, Azahel wayaŋ Joabma, Elanan goŋ Dodona hu Betlehem.

²⁷ Sammot ma Harorna, Heles ma Pelonna.

²⁸ Ira goŋ Ikek ma Tekoana, Abiyezer ma Anatotna.

²⁹ Sibkay ma Husana, Ilay ma Ahoana.

³⁰ Maray ma Netofana, Heled goŋ Bana ma Netofana.

³¹ Itay goŋ Ribay ma Gibea na hu njafna vi Benjaminna, Benaya ma Piratonna.

³² Huray hu zul mbo ma Gak ma ɓaɗ ɦayna, Abiyel ma Arabana.

³³ Azmavet ma Bahurimma, Eliyaba ma Salbonna.

³⁴ Bene-Hasem ma Gizonna, Yonatan goŋ Sage ma Hararna.

³⁵ Ahiyam goŋ Sakar ma Hararna, Elifal goŋ Urna.

³⁶ Hefer ma Mekerana, Ahiya ma Pelonna.

³⁷ Hesro ma Karmelna, Naray goŋ Ezbayna.

³⁸ Joel wayaŋ Natanna, Mibar goŋ Hagrina.

³⁹ Selek ma Amonna, Naray ma Berotna, sa ma tuɗ fok Joabma goŋ Seruyna.

⁴⁰ Ira ma Yeterna, Gareb ma Yeterna.

⁴¹ Uri ma Hetna. Zabad goŋ Alayna.

⁴² Adina goŋ Siza ma hu njafna vi Rubenna suuna um dok-hindi.

⁴³ Hanan goŋ Makana u Yosafat ma Metena.

⁴⁴ Uziya ma Aseterotna, Sama u Yeyel goŋ Hotam ma Aroerna,

⁴⁵ Yediyael goŋ Simrina u wayamma Yoha ma Tisna.

⁴⁶ Eliyel duk suu Mahavanna, Yeribay u Yosaviya goŋ Elnama, Itma ma Moabma may.

⁴⁷ Eliyel, Obed u Yasiyel ma Sobana.