1 DLAŊ MULINARA 10 - Boy Lonana

DLAŊ DAVID, MUL MA ISRAELNA Duu ma Gilboana miɗ ma Sol miɗna

¹ Suu Filistinna duu u suu Israelna. Suu Israelna liŋ ko suu Filistinna. Suu ki miɗina hin ki cukira kay ɦinira Gilboara.

² Suu Filistinna ɦeɓ gi Sol u goryom dukŋi na gaw. Suu Filistinna ci Jonatan, Abinadab u Malki-Sua, goryoŋ Solna kiyo.

³ Nek duuna ndi kay Sol. Suu duu u mbuurura fam fi ni, nam dlak mbuɗ ki ndaana ko suu duu asina.

⁴ Sol di gogoo mam ma sunda ana, «Paɗ ŋgew maŋŋa cokon u namu, ka suu ɗiwisi bay cawra mbay lasan maɗan ki asiɗi.» Na may gogoo mam ma sunda min kaɗi kay ana nam li ndaana cocoo. Na ɗaŋŋi Sol tli ŋgewna gi tam funumu.

⁵ Wi ana Sol ki miɗiya ni gogoo mam ma sunda gi tam ki fun ŋgewna, miɗ ki may.

⁶ Sol miɗ ki u goryom suu hindina may. Suu vo varamma halaŋ miɗ ki hu li namma may.

⁷ Wi ana suu Israelna njay ki wa, Sol miɗ ki wa u goryom may ni suu Israelna noy ziisi ki, pii ki liŋŋa ni na gaw. Suu Filistinna mbay kak ki hu ziisi ni na gaw.

⁸ Vin wanni suu Filistinna mbay a yow tlesuu vi suu midinana ni asi fi maɗ Sol u goryom cukira kay ɦinira Gilboara.

⁹ Asi ŋgaɗ yam Solna kiyo, tlam yam kasiya, yowom ɓagi mamma may, njay boy namma ki hu mbassa Filistinda, ɓak ki maŋ fuli masisina u suu masisina lay.

¹⁰ Asi cukum ɓagi mamma ni hu zira vi loosinara, ɓalam sok yam ki kolo hu zira vi Dagonda.

¹¹ Suu vi Yabes ma Galaadna hum dla mayra suu Filistinna laɗ eg Solla ki halaŋ.

¹² Suu duu suu saɓakŋa halaŋ yow kolo yow maɗ gi Sol u goryom tuɗusi maŋ Yabek. Asi tososi sokosi kaŋga u ŋgus cinda vi Yabesna. Asi hin li laara buuna kiɗisiyara olo.

¹³ Sol miɗ ki ni kay dla cora nam laɗ eg Yawera, ni kay ana nam vi ka u boy ma vi Yawenaɗi. Ni kay ana nam joɓ ŋgus sa miɗina ana nam gam u dlara kiyo.

¹⁴ Hin dlara mba joɓ Yawera kiyo. Ni kay ndaɗta nam cam ki hin ɦam mul mamba ki maŋ David ma goŋ Jesena.