YOHANÉS 7 - Bahasa Manggarai New Testament

Mori Yésus Ngo Oné Yérusalém Te Lut Ramé Pondok Daun 7:1-13

¹ Poli hitu Mori Yésus lako léok Galiléa, ai Hia toé gorin te ka’éng kaut oné Yudéa, ai nitu manga ata Yahudi nanang te ala Hias.

² Du hitu ramé disét Yahudi ruis gi, leso ramé Pondok Daun.

³ Mai taé de asé-ka’én Mori Yésus agu Hia: “Ngot Ité cé’é mai ho’o ga nggere-oné Yudéa, kudut sanggéd ata nungku Dité ita kolé sanggéd pandé Dité.

⁴ Ai toé manga cengatan te pandé cao-ca oné pété ceha, émé hia ngoéng te tiba lata doy. Émé nenggitu pandé Dité, toto taram oné tana lino.”

⁵ Ai asé-ka’é ru’N kaut toé imbi Hias.

⁶ Mai taé de Mori Yésus agu isé: “Leso Daku toéd caiy, maik latang te méu mangam taung linga.

⁷ Lino ho’o toé manga rangkat méud, maik rangkat Akuy, ai Aku poli sabid latang te sanggéd pandé da’at diha.

⁸ Ngom ga oné ramé hitu, Aku toé ngok nitu, ai toé di rapak leso’G.”

⁹ Nenggitu reweng Diha latang te isé, itu kali ka’éng kiN oné Galiléa.

¹⁰ Maik du poli ngod asé-ka’é de Mori Yésus oné ramé hitu, itu kali ngon kolé Hia nitu, maik lakoN toé ita lata doy.

¹¹ Ata tu’ad isét Yahudi kawé Hia oné ramé hitu agu mai taéd: “Nia Hia?”

¹² Agu do kéta dengé siwi-sok oné lawa do situ latang te Hia. Manga ata taé nenggo’o: “Hia ata di’ay.” Mai tungku data iwod: “Toé yé, Hia pandé wéléng ro’éngy.”

¹³ Maik lagit cengatan koé ata cukungn te curup mésé-mésé latang te Hia ai rantang ata tu’ad isét Yahudis.

Mori Yésus Téing Sakasi Weki Run

¹⁴ Du rémé kéta ruda olon ramé hitu, Mori Yésus ngo oné Mbaru de Mori Keraéngy agu toing atay nitu.

¹⁵ Lenget kéta taungs ata tu’ad Yahudi, agu mai taéd: “Co’o kétay ata ho’o, do kéta pecingn, musuk toé olo nungkuy.”

¹⁶ Mai walé de Mori Yésus agu isé: “Toing Daku toé oné mai weki Rug, maik oné mai Hiat wuat Akuy.

¹⁷ Céing kaut ata lut ngoéng Diha, ata hitu ngancéng pecing, ot toing Daku so’o oné mai Mori Keraéngd ko oné mai weki Rug.

¹⁸ Céing ata curup oné mai weki run, ata hitu kawé te hiang weki run, maik céing-céing ata kawé hiang latang te Hia hitut wuatN, hia laing salangn agu toé manga ata toé molorn oné hia.

¹⁹ Toé weli hi Musa ata poli téing adak Taurat oné méu? Maik lagit cengatan koé oné mai méu ata pandé lorong adak Taurat situ. Co’o tara kudut ala Akus méu?”

²⁰ Mai wantil data do situ: “Hau hena le koro de jing da’at; céingy ata kudut te ala Hau?”

²¹ Mai walé de Mori Yésus agu isé: “Musuk ca di pandé Daku, lengét ta’a méu ga.

²² Jari, poli wintasn li Musa kudut sunat kéta taung méu - ata tu’ungn sunat hitu toé oné mai hi Musan, maik oné mai empo ditén – agu méu sunat atam oné leso Sabat.

²³ Émé ca ata, sunat oné leso Sabaty, boto lagé adak di Musa, co’o weli méu tara rabo Akus, méséng Aku pandé ina labok taung wekin cengata manusia du leso Sabat?

²⁴ Néka beté-bicar lut apa ata ita le mata, maik beté-bicar ata agiln tu’ung.”

Ndél Landing Nia Main Mori Yésus 7:25-36

²⁵ Mai taé data iwon weki Yérusalém: “Cala Hia ho’op ata kudut ala lisé ta?

²⁶ Agu lélo de Hia curup sara nain agu isé toé manga curup apa-apa kamping Hia. Aram pecing tu’ung le adak laing dité, te Hia ho’o hi Kristus?

²⁷ Maik latang te ata ho’o, pecing lité, nia main baté ka’éngn, maik du nia cain hi Kristus, toé manga cengatan ata pecing nia main baté pu’ungn.

²⁸ Du rémé toingn Mori Yésus oné Mbaru de Mori Keraéng mai taé Diha: “Bo kali pecingk Aku le méu agu nia maig Aku, maik mai Daku toé sara Rug, landing le wuat Dihat molor ata toé pecing le méu.

²⁹ Aku pecing Hiak, ai Aku mai oné mai Hiag agu Hia ata wuat Aku.”

³⁰ Bo kudut te deko Hia lisé, maik toé kéta cengatan ata cadi Hian, ai toé di hitu leson.

³¹ Maik oné mai isét do situ, manga dod ata imbi Hia, agu mai taéd: “Émé cai hi Kristus, ngancéng kéta Hia pandé tanda lenget ata céwé do oné mai Hia ho’o?”

³² Ata Parisi dengé sai-saok data situ landing Hia, itu tara isét imam kepala agu ata Parisi jera ata lami Mbaru de Mori Keraéng kudut deko Hia.

³³ Mai taé de Mori Yésus: “Téké cekoén kali ga, Aku manga cama-cama agu méug, poli hitu Aku kudut ngo éta Hiat wuat Aku.

³⁴ Méu te kawé Akum, maik méu toé ita Akum ai méu toé ngancéng ngo oné osang baté ka’éng Daku.”

³⁵ Mai curup cama taud ata Yahudi situ: “Kudut ngo nggere-nia kétag Hia wiga ité toé ngancéng cumang agu Hia? Asa manga tenangn kudut ngo oné baté ka’éng data mbéot oné ata Yahudi agu kudut te toing ata Yahudi?

³⁶ Apa weli betuan taé Diha te nggo’o: Méu te kawé Akum, maik méu toé ngancéng cumang Akum, agu: méu toé ngancéng ngo oné osang baté ka’éng Dakum?”

Waé Ata Pu’un Mosé 7:37-44

³⁷ Du leso cemoln hitu kétag adak mésé hitu, hesé Mori Yésus agu mai taéN: “Céing-céing ata masa waéy, co’om mai inung oné Akuy!

³⁸ Céing kaut ata imbi Akun, ného ata poli taé de Surak Nggeluk: oné mai pucu diha lalang kéta waé mosé.”

³⁹ Betuan taé Diha, ngong Mori Keraéng Nai Nggeluk, ata kudut tiba lisét imbi Hia; tara toé di wa’uy Nai Nggeluk hitu ai Mori Yésus toé di bongy.

⁴⁰ Pisa taus oné mai ata do situ ata dengé taung sanggéd reweng situ, mai taéd: “Hia ho’o tu’ung-tu’ung nabi ata kudut te maiy.”

⁴¹ Mai taé data iwod: “Hia ho’o hi Mésias.” Maik manga kolé wantil data iwon: “Toé ta, hi Mésias toé mai oné mai Galiléan.

⁴² Ai taé de Surak Nggeluk, hi Mésias hitu waé di Daudy, oné mai béo Bétléhém, baté ka’éng di Daud médé.”

⁴³ Wiga mangan ndu-ndél taud ata do situ landing Hias.

⁴⁴ Manga pisa taus oné mai isé kudut te deko Hias, maik toé kéta cengatan ata cukungn te cadi Hia.

Mori Yésus Kambé Li Nikodémus 7:45-52

⁴⁵ Itug kali ngod ata lami situ oné adakd sanggéd imam agu ata Parisi, ata nenggo’o taéd agu isé: “Co’ob tara toé ban le méu Hia?”

⁴⁶ Mai walé data lami situ: “Toé dé’it manga repéng lami cengata manusia ata curup ného ata hitu!”

⁴⁷ Mai walé data Parisi situ agu isé: “Wéléng kolég méu ko?

⁴⁸ Manga weli cengatan oné mai isét adak ata imbi Hian, ko cengatan oné mai ata Parisi?

⁴⁹ Maik ata do so’o ata toé pecing Taurats nahé mata kéta taungs!”

⁵⁰ Cengata oné mai weki disé, hi Nikodémus ngasangn, hiot danong poli cumang agu Mori Yésusn, taé agu isé:

⁵¹ “Co’o néng Adak Taurat dité, wahéng ata toé olong séngét torokn agu toé olong pecing lata apa ata poli pandé Diha?”

⁵² Mai walé disé: “Asa ata Galiléa kolé hau ta? Damang céca di’a oné Surak Nggeluk, kudut pecing le hau toé manga nabi ata mai oné mai Galiléa.”

Inéwai Ata Loma 7:53--8:1-11

⁵³ Itug kali isé kolé bilang mbarud,