YOHANÉS 15 - Bahasa Manggarai New Testament

Pu’u Anggor Ata Molor 15:1-8

¹ “Akuy dé pu’u anggor ata molor, agu Ema Daku ata rébokn.

² Néténg rengka oné Aku situt toé wuas, rociks Liha, maik néténg rengka ata wuad, dawings Liha kudut tambang recut wuad.

³ Bo kali méu nggélokm ga le curup ata poli taé Laku agu méu.

⁴ Ka’éng ga oné Aku agu Aku oné méuk. Cama ného rengka toé ngancéng wua kaut le run, émé hia toé cing oné mai pu’u anggory, nenggitu kolé néng méu, toé wuam émé toé ka’éng oné Akum.

⁵ Akuy dé pu’u anggor, méu rengkad. Céing ata ka’éng oné Akun agu Aku ka’éng oné hiak, hia te wua doy, ai be pé’ang mai Aku, méu toé ngancéng pandé apa-apas.

⁶ Céing ata toé ka’éng oné Akun, hia te rocik oké pé’angy ného rengka, agu dangon ga. Poli hitu congko lata oké oné api te tapas.

⁷ Émé méu ka’éng oné Akum, agu curup Daku ka’éng oné méus, tegi apa kaut ngoéngs, méu te tibas.

⁸ Oné apa ho’o te bong Ema Daku, ngong émé méu do wuas, agu ali hitu dé ga méu ata nungku Dakum.”

Perénta Kudut Momang Tau 15:9-17

⁹ “Ného hi Ema poli momang Akuy, nenggitu kolé néng Aku poli momang méug, ka’éng ga oné momang Daku hitum.

¹⁰ Émé méu lut perénta Dakum, méu te ka’éng oné momang Dakum, ného Aku lut perénta de Emag, agu ka’éng oné momang Dihak.

¹¹ Sanggéd situ taés Laku agu méu kudut nisang nai Daku manga oné méuy agu nisang nai de méu ciri penongy.

¹² Ho’oy perénta Daku: Porong méu momang taus, ného Aku poli momang méug.

¹³ Toé manga momang ata be lé main oné mai momang de cengata hitut oké mosén latang te haé reban.

¹⁴ Méu haé reba Dakum, émé pandés le méu situt perénta Laku agu méu.

¹⁵ Méu toé kolé caro mendim Laku ai mendi toé mopo apa hitut pandé de morin, maik Aku bénta méu haé reba, ai Aku poli tombo agu méu, sanggéd situt poli dengé Laku oné mai Ema Daku.

¹⁶ Toé méu ata lir Aku, maik Aku ata lir méu. Aku poli wérét méu kudut méu ngo agu cir wua, agu wuas hitut temer kin, kudut apa situt tegi le méu oné Ema Daku le ngasang Daku, téings Liha oné méu.

¹⁷ Ho’oy perénta Daku oné méu: Momang ga cama haé atas.”

Lino Ho’o Kodo Mori Yésus Agu Ata NungkuN 15:18-27

¹⁸ “Émé lino ho’o kodo méuy, nuk di’a te hia poli olo kodo Akun itu po méu.

¹⁹ Émé rapangn méu oné mai linos toét toé lino momang méuy ného paéngn. Landing woko méu toé oné mai linos, maik Aku poli lir méu oné mai lino, itu tara kodos méu le lino.

²⁰ Nuk dé apa hiot poli taé Laku agu méu: Cengata mendi toé kéta céwé teke éta oné mai morin. Émé isé poli pandé da’at Akud, isé kolé te pandé da’at méu; émé isé poli lut reweng Dakud, isé kolé te lut taé de méus.

²¹ Landing sanggéd situ pandés lisé agu méu soho ngasang Daku, ai isé toé baé Hia, hitut poli wuat Akun.

²² Émé rapangn, Aku toé maik, agu toé curup agu isé, isé dé toé manga ndékokd. Landing te ho’on ga toé manga tadod kolé latangt ndékok disé.

²³ Céing kaut ata kodo Akuy, hia kolé kodo Ema Dakuy.

²⁴ Émé rapangn Aku toé pandés oné beréha isé sanggéd gori ata toé dé’it pandés lata bana, tandan isé toé manga ndékokd. Maik ho’o ga koném po poli itad taung sanggéd situ lisé, isé kodo Akus agu hi Emag.

²⁵ Maik reweng situt poli tulis oné buku Taurat disé, paka rapaks: Isé kodo Akus toé kéta manga campitn.

²⁶ Émé mai Hiat campé hitut kudut katu Laku oné mai hi Ema, ngong “Nai Molor” ata pé’ang oné mai hi Eman, Hia te sakasi latang te Aku.

²⁷ Maik méu kolé paka ciri sakasi, ai méu du wangka pu’ung muingm ga cama laing agu Akum.”