YOHANÉS 11 - Bahasa Manggarai New Testament

Pandé To’o Kolén Hi Lazarus 11:1-44

¹ Manga cengata ata laing betin, ngasangn hi Lazarus, oné mai Bétania, béo di Maria agu asén hi Marta.

² Hi Maria, hituy inéwai hiot luma dé’it wa’i de Mori Yésus le mina bengé agu koso laing le wukn.

³ Hi Lazarus hitut beti, nara disé. Inéwai situ sua jera ngo tombo agu Mori Yésus: “Mori, hia hiot momang Dité, betiy.”

⁴ Du dengé tombo hitu le Mori Yésus, mai taén: “Beti hitu toé manga mata laingn, maik kudut toto mésén kuasa de Mori Keraéng, ai le beti hitu Anak de Mori Keraéng te bongy.”

⁵ Bo kali tu’ung Mori Yésus momang hi Marta agu ka’én, agu hi Lazarus.

⁶ Koném poli dengén Liha, te beti hi Lazarus, kunjung kéta Hia ka’éng sua leson kolé oné osang nia Hia mangan.

⁷ Maik poli hitu mai taéN ngong ata nungku'N: “Kolé oné Yudéat gé!”

⁸ Mai taéd ata nungku situ ngong Hia: “Guru, ho’o koé di isét Yahudi damang te peké Ités, ngoéng kid Ité te ngo kolé sina itu?”

⁹ Mai walé de Mori Yésus: “Toé weli campulusua jam ca leso? Céing ata lako leso, toé manga timpok wa’in ai hia ita gérak de lino ho’oy.

¹⁰ Maik émé manga ca ata lako le wié, wa’in hena le timpoky, ai toé manga gérak oné wekin.”

¹¹ Nenggituy curupN, poli hitu mai taéN ngong isé: “Hi Lazarus, asé-ka’é dité, rémé toko lémotn, maik Aku ngo nitu kudut kéngko hia wa mai tokon.”

¹² Mai taé data nungku'N situ ngong Hia: “Mori, émé lémot hia, hia te di’ay.”

¹³ Maik wan de Mori Yésus, ata toko kali ngong mata, alang nuk disé curup lémot de Mori Yésus ngong lémot tu’ung.

¹⁴ Ngéséng nggitu, curup tulak kéta le Mori Yésus: “Hi Lazarus matay gi,

¹⁵ maik delék Laku woko toé mangak Aku du hitu, ai hitu céwé di’an latang te méu, kudut méu ngancéng imbim. Mai ga ité ngo sina hiat.”

¹⁶ Hi Tomas, hiot alitn hi Didimusy, taé taung agu haén, ngong ata nungku situ iwod: “Mai ga, ngo kolét ité kudut mata cama laing agu Hiat.”

¹⁷ Du cai de Mori Yésus, pat lesog hi Lazarus poli boakn.

¹⁸ Béo Bétania ruis agu Yérusalémy, am telu kilo métér tadangn.

¹⁹ Dog ata Yahudi nitu, mai cé’é hi Marta agu hi Maria te lémbu isé landing le mata narad.

²⁰ Du dengé li Marta te caig Mori Yésus, hia ngo curu Hiay, maik hi Maria kali ka’éng oné mbaruy.

²¹ Maig taé de Marta ngong Mori Yésus: “Mori, damang émé no’ot Ité, nara daku toé manga matan.

²² Maik te ho’on kolé pecing laku, Mori Keraéng te téing agu Ité, sanggé ménan situt tegi Lité oné Hia.”

²³ Mai taé de Mori Yésus agu hi Marta: “Naram te mosé koléy.”

²⁴ Mai taé di Marta ngong Hia: “Bo hitun, pecing laku, hia te mosé koléy lété sanggéd ata mosé kolés du leso cemol.”

²⁵ Maig walé de Mori Yésus: “Akuy to’o agu mosé, céing ata imbi Akun hia te moséy, koném poli matan,

²⁶ agu néténg ata situt mosé agu imbi Akus, toé ngancéng mata dengkir lén. Imbi le hau curup ho’o?”

²⁷ Mai taé di Marta: “Yo Mori, imbi laku, Ité hi Mésias, Anak de Mori Keraéng, ata mai oné lino ho’oy.”

²⁸ Du poli curup hitun, hia ngo bénta asé-ka’én hi Mariay, agu saok oné Hia: “Guru, manga sina hioy, agu hia bénta Hauy.”

²⁹ Dengé hitu hi Maria, hidi-hadan to’on agu cumang Mori Yésus.

³⁰ Maik du hitu, Mori Yésus toé di caiy oné béo hituy. Hia rémé oné osang baté cumangn Hia li Marta.

³¹ Du ita lata Yahudi situt cama laing agu hi Marta oné mbaru hitu te lémbu hia, hi Maria hidi-hada to’on agu ngo pé’ang tanan lut lisé, ai bet disé, hia ngo oné boay kudut rétang nituy.

³² Du cain hi Maria oné osang nia mangan Mori Yésus agu ita Hia, hi Maria cunem wa wa’i Dihay agu mai taén ngong Hia: “Mori, émé manga dé Ité du hitu, toé manga matan nara daku.”

³³ Du Mori Yésus ita rétang di Mariay, agu ata Yahudi situt mai kolé agu hias, wéong kéta naiN; bélot tu’ung nai Diha, og mai taéN:

³⁴ “Nia boakn le méu?” Mai walé disé: “Mori, mai agu lélo dé!”

³⁵ Rétang’g Mori Yésus.

³⁶ Mai taé data Yaudi: “Lélo dé, momang tu’ung Liha hia.”

³⁷ Maik pisa tau oné mai isé, taéd: “Hiay ata pandé wela koléy mata data buta ba’ang toé kéta ngancéng Liha pandén, wiga ata ho’o toé matay?”

³⁸ Wéong kolé nai de Mori Yésus, itug kali ngo oné boa hitun, boa hitu ca liang ata tadu le watuy.

³⁹ Mai taé de Mori Yésus: “Téti watu hitu!” Hi Marta, weta di teriha hitu, taé agu Mori Yésus: “Mori, wau gi, ai ho’ot pat leso poli matan.”

⁴⁰ Mai taé de Mori Yésus: “Toé weli poli taé Daku, agu hau: Émé imbi le hau, hau te ita dirap de Mori Keraéngh?”

⁴¹ Og kali tétin lisé watu hitu, itug kali congan Mori Yésus nggere-éta, mai taéN: “Ema, Aku wali di’a agu Iték, ai Ité séngét Akut.

⁴² Pecing laku Ité pinga mtaung Akut, maik ali ata do so’ot hesé baling mai Aku, taé Laku, kudut imbi lisé, te Itéy hitut poli wuat Aku.”

⁴³ Du poli curup hitun, kinda Hia, agu kepok: “Lazarus, pé’angh ga!”

⁴⁴ Hi Lazarus hitut poli matan, main oné mai, wa’i agu limén ngai pongo le buingd, agu rangan rokot kin le kemboku. Mai taé de Mori Yésus ngong isé: “Cacas wuwus situ, agu ondang hia lakon.”

Bantang Kudut Mbelé Mori Yésus 11:45-57

⁴⁵ Dod oné mai ata Yahudi, situt mai lélo hi Maria, agu ita le weki rud apa hitut poli pandé de Mori Yésus, imbi Hias.

⁴⁶ Maik manga ata ngo oné isét Parisi agu tombo oné isé sanggéd apa situt poli pandé de Mori Yésus.

⁴⁷ Itug kali isét imam kepala agu ata Parisi bénta Adak Agama kudut neki weki, mai taéd: “Co’o kali pandé dité ga? Ai ata hitu do pandé tanda lengetn.

⁴⁸ Émé ondang lité Hia, kéorn sanggén ata imbi Hias, agu isét Roma te mais, rumbu osang nggeluk dité agu uku dité.”

⁴⁹ Cengata oné mai isé, hi Kayafas, Imam Mésé du ntaung hitu, taé agu isé: “Méu toé manga pecing apas,

⁵⁰ agu toé tingo-naém, te céwé di’an latang te méu, émé cengatan mata te uku dité, itu po sanggén uku dité ho’o mempo.”

⁵¹ Apa hitut curup diha, toé oné mai weki run hia, maik landing le Imam Mésé hia oné ntaung hitu, itang liha, hi Yésus te mata latang te uku hituy.

⁵² Agu toé latang te uku hitu kanang, maik latang kolé te impung agu pandé neki cas Anak de Mori Keraéng situt bégas.

⁵³ Pu’ung oné mai leso hitud isé ca nais te mbelé Hia.

⁵⁴ Landing hitu, Mori Yésus toé ngo koléy oné ranga data do oné isét Yahudi; Hia angkak nitu main ngo oné tana ruis satar mambak, oné ca béndar hitut ngasangn Éfraim, nitu Hia ka’éng cama laing agu ata nungku'N.

⁵⁵ Du hitu tiong leson ramé Paska data Yahudi, agu dod ata oné tana hitu ngo oné Yérusaléms kudut pandé nggélok wekid be bolon Paska hitu.

⁵⁶ Isé kawé Mori Yésus agu cang hesé oné Mbaru de Mori Keraéngd, isé taé cama taud: “Co’o le nuk de méun? Mai ko toé Hia oné taé ho’o?”

⁵⁷ Rémé nggitun taung ata imam kepala agu ata Parisi poli téing perénta kudut néténg ata situt baén nia Hia mangan, tombo oné isé kudut isé ngancéng deko Hias.