YOHANÉS 1 - Bahasa Manggarai New Testament

Reweng Ata Poli Ciri Manusian 1:1-18

¹ Pu’ung du wangkan manga Reweng; Reweng hitu cama-cama agu Mori Keraéngy, agu Mori Keraéngy Reweng hitu.

² Hia du wangkan muing cama-cama agu Mori Keraéng.

³ Sanggéd ménan dédék Lihas agu émé toé manga Hia toé kéta manga can ata mangan, oné mai sanggéd so’ot poli dédékd.

⁴ Hiay pu’un mosé, agu mosé hitu te gérak manusiay.

⁵ Gérak hitu néra oné nendepy agu nendep hitu toé ngancéng koda Hian.

⁶ Main cengata ata wuat le Mori Keraéng, ngasangn hi Yohanés;

⁷ mai diha te téing sakasi latang te gérak hitu, kudut lut hia sanggéd ata ngancéng imbis.

⁸ Hia toé gérak hituy, maik hia paka téing sakasi latang te gérak hitu.

⁹ Gérak ata tu’ungn, hitut téing gérak néténg ata, rémé kudut mai oné lino.

¹⁰ Reweng polig mangan oné lino, agu lut Hia lino ho’o dédékn, maik lino ho’o toé pecing Hiay.

¹¹ Hia mai oné paéng decukn, maik sanggéd ata decuk'N situ toé tiba Hias.

¹² Maik sanggéd ata te tiba di’a Hia, téing Liha kuasa te ciri anak de Mori Keraéngs, isét ata imbi oné ngasang Diha;

¹³ ata situt dading toé oné mai dara ko oné mai humer de nai, toé kolé landing le ngoéng de cengata ata rona, maik oné mai Mori Keraéngn.

¹⁴ Reweng hitu poli ciri manusian, agu ka’éng baling itéy, agu ité poli ita néra'N, néra hitut téing Hia ného Anak Léca de Ema, penong le widang agu molor tu’ung.

¹⁵ Hi Yohanés ata téing sakasi latang te Hia agu kepok’n, taén: “Ho’o dé Hia, ata hiot taé daku du tombo laku nenggo’o: Musi mai aku, manga cai’n Hia atat be bolon mai aku, ai Hia poli mangan du toé dimanga’g aku.”

¹⁶ Ai oné mai penongN, sanggéd ité poli tiba widang momang lawang widang mohas;

¹⁷ ai Adak Taurat ata widang li Musa, maik widang momang agu ata molorn mai oné mai hi Yésus Kristus.

¹⁸ Toé kéta manga cengatan ata poli ita Mori Keraéng; maik Anak léca de Mori Keraéng, ata manga oné lobo pa’a de Ema'N, Hia dé ata tombon.

Sakasi Di Yohanés Latang Te Weki Run 1:19-28

¹⁹ Ho’oy dé sakasi di Yohanés du ata Yahudi oné béndar Yérusalém wuat pisa taus imam agu ata Léwi kamping hia, kudut te réi: “Céing léng hau?”

²⁰ Tura liha agu toé gorin te pali, taén: “Aku toé hi Mésias.”

²¹ Poli hitu réi kolé lisé agu hia: “Émé nggitu, céing weli hau ga? Cala hi Élia?” Mai walé diha: “Toé, yé!” “Cala hau nabi ho’ot kudut cai?” Walé kolé liha: “Toé, yé! Toé aku!”

²² Landing hitu mai kolé réi disé agu hia: “Céing weli ata te tu’ungm hau ga? Ai kudut di’a tombon lami kamping isé ata wuat ami. Apa weli taém latang te weki rum hau?”

²³ Walé kolé liha: “Akuy dé reweng hiot kepok mtaung oné satar mambak: pandé helek koé salang de Morin! Cama ného ata poli taé di nabi Yésaya.”

²⁴ Agu oné mai ata situt wuat, manga pisa taus ata Parisi.

²⁵ Réi lisé kamping hia, mai taéd: “Co’o tara ngancéng cebong ata laingm hau, émé toé hau hi Mésias, toé hi Élia, agu toé kolé nabi hitut kudut maiy.”

²⁶ Mai walé di Yohanés agu isé, taén: “Aku cebong ata le waé; maik oné beréha méu hesé Hia ata toé baé le méuy,

²⁷ ngong Hia, ata cai bemusi mai akuy. Te tiwit sepatu’N kaut toé remog aku.”

²⁸ Sanggéd situ manga oné Bétania besina mai waé Yordan, osang palang cebong atan hi Yohanés.

Mori Yésus Anak Jimbal De Mori Keraéng 1:29-34

²⁹ Ného diangn ga hi Yohanés ita main Mori Yésus mai nggere- cé’é hiay, agu mai taén: “Lélo ga Anak Jimbal de Mori Keraéng, ata koso ndékok de lino.

³⁰ Ngong Hia dé hiot poli taé laku, nenggo’o: Be musi mai aku te mai cengata, ata poli cai be bolon mai aku, ai Hia poli manga du toé di mangag aku.

³¹ Agu weki rug kolé aku, laring cain toé baé Hiak, maik latang te hitu tara maig aku agu cebong le waé, kudut ata Israél baé Hiay.”

³² Agu hi Yohanés téing sakasi, mai taén: “Aku poli ita Nai Nggeluk wa’u éta mai awangn ného tekur jaway, agu ka’éng be-éta mai Hiay.

³³ Agu aku kolé danong toé di baé Hiak, maik Mori Keraéng ata susung aku te cebong le waéy, poli téing rewengn agu aku: Émé ita le hau Nai Nggeluk hitut wa’u béta mai cengata ata agu ka’éng be-éta mai Hiay, Hia hitu dé kudut te cebong manusia le Nai Nggeluk.

³⁴ Polig itan laku Hia, ho’og laku téing sakasin: Hia ho’o tu’ung Anak de Mori Keraéng.”

Ata Nungku de Mori Yésus te Laring Cain 1:35-51

³⁵ Ného diang leson ga hi Yohanés hesé nitu koléy agu sua taus ata nungkun.

³⁶ Agu du ita liha lakon Mori Yésus, mai taé diha: “Lélo ga, hio dé Anak Jimbal de Mori Keraéng!”

³⁷ Dengé le ata nungku situt sua tau apa ata curup diha hitu, itug kali ngod isé lut Mori Yésusd.

³⁸ Maik Mori Yésus holés nggere-musiy. Ita Liha, te isé lorong Hias, itu kali réin agu isé: “Apa kéta hitut kawé de méu?” Mai taéd agu Hia: “Rabi (ngong te nggo’o: Guru) nia wan ka’éng Dité?”

³⁹ Mai taé Diha agu isé: “Mai ga, manga kaut itan le méu.” Itug kali ngod isé agu ita lisé nia wan Hia ka’éngn, agu leso hitu isé ka’éng camas agu Hia; du hitu anggat ongga pat.

⁴⁰ Cengata oné mai isét sua ata dengé curup di Yohanés, agu ata lut Mori Yésus, ngasangn hi Andréas asé di Simon Pétrus.

⁴¹ Hi Andréas laring cain ngo cumang ka’én hi Simon, agu mai taén: “Ami poli cumang agu hi Mésias (ngong hi Kristus)”

⁴² Dadé hia liha oné Mori Yésus. Lélo agu rupa di’a kéta hia le Mori Yésus, mai taéN: “Hau Simon, anak di Yohanés, ngasangm te caron hi Kéfas (ngong: Pétrus).”

⁴³ Ného diang leson kolé ga, Mori Yésus poli ngalis'N te ngo nggere-oné Galiléa, Hia cumang agu hi Pelipus, agu mai taén ngong hia: “Mai ga, lut Akuh!”

⁴⁴ Hi Pelipus hitu oné mai Bétsaidan, béndar disé Andréas agu hi Pétrus.

⁴⁵ Hi Pelipus cumang agu hi Natanaél, agu mai taén ngong hia: “Ami poli cumang Hiagm, ata hiot caro di Musa oné Surak Taurat agu le sanggéd nabi, Mori Yésus anak di Yosép oné mai Nazarét.”

⁴⁶ Mai taé di Natanaél agu hia: “Ba’ang kéta néng, manga ata di’an oné mai Nazarét ko?”

⁴⁷ Mai taé di Pelipus ngong hia: “Mai agu lélo ga!” Ita le Mori Yésus hi Natanaél mai kamping Hiay agu tombo latangt hia: Lélo ga, ho’o dé cengata ata Israél tu’ung, toé manga tangké cekoén oné hia.”

⁴⁸ Mai taé di Natanaél kamping Hia: “Co’o tara baég aku Lité?” Mai walé de Mori Yésus agu hia: “Du toé di bénta li Pelipusm hau, polig itam hau Laku wa mai pu’u haju ara.”

⁴⁹ Mai taé di Natanaél kamping Hia: “Rabi, Ité Anak de Mori Keraéng, Ité Raja data Israél!”

⁵⁰ Walé de Mori Yésus, mai taéN: “Méséng tombo Laku agu hau: Aku ita hau wa mai pu’u haju ara, itu tara imbin le hau? Hau kudut te ita kolé apa ata céwé mésén oné mai hitu.”

⁵¹ Poli hitu taé le Mori Yésus oné hia: “Aku tombo agu hau, moro matan, ata tu’ungn hau te ita léngay awang, agu sanggéd malékat de Mori Keraéng nggere-wa nggere-étas mai cé’é Anak Manusia.”