TITUS 2 - Bahasa Manggarai New Testament

Dis Data Tu’a, Data Reba Agu De Mendi

¹ Landing hau Titus, nahé hau kali titong ata kopd agu palong ata molord.

² Titongs ata tu’a rona kudut jeper kaut moséd, hiangs lata, nai ngalis-tuka ngéngga, molor imbid oné momang agu seber.

³ Nenggitu kolés iné-wai tu’a, paka seber koés te ngaji, néka pocu ata, néka inung tuak, maik ciri guru te toing sanggéd taung ata di’ad.

⁴ Ali hitu, toing sanggéd ata molas kudut momang ronad agu anakd,

⁵ nggalas agu nggélok nai, seber te wintuk oné ka’éng kilod, nai di’a, junggu agu ronad, wiga reweng de Mori Keraéng toé loér latay.

⁶ Nenggitu kolé ata reba, toing isé kudut isé kuasa wekid oné sanggén cao-ca.

⁷ Latang te hau Titus, hau paka ciri ata toming laing oné sanggéd pandé ata di’ad. Poro hau kali paka molor nai agu tu’ung-tu’ung oné toingm,

⁸ molor agu toé manga celad oné kerébam hitu, wiga sanggéd ata balim ciri ritaks, ai toé manga ata da’atd te tombo lisé latang te ité.

⁹ Toing kolé sanggéd mendi, poro isé junggu agu morid oné sanggén cao-ca, agu patun latang te isé, émé toé léwang jera de morid,

¹⁰ toé nggopét, maik poro junggu agu tipek, wiga ali hitu, oné sanggén cao-ca isé te bong toing de Mori Keraéng, Mori Sambé dité.

Tabing De Mori Keraéng Pandé Selamak Taung Manusia

¹¹ Polig si’angn tabing de Mori Keraéng pandé selamak taung manusia.

¹² Hia toing ité kudut ité okés nggopé-nggapét, belek de lino, paka mosé nggalas, agil agu seber te ngaji oné lino.

¹³ Te ho’on ité rémé géréng leso hitut bengkes dité; du leso hitu lino ho’o te ita mengit de Yésus Kristus ngong Mori Keraéng Pu’un Kuasa agu Mori Sambé dité.

¹⁴ Mori Yésus poli condo wekiN latang te ité, kudut céla ité oné-mai sanggéd da’at agu oné-mai ndékok, wiga ité ciri weki serani Diha agu wingker te pandé di’a.

¹⁵ Keréba ga sanggéd taung situt poli toing daku, titongs ata imbi agu wéwa nggere-oné isét kembe-lu’ak. Hau paka toing, titong agu wéwa agu gala taram, néka sendong céing kaut te pandé rendak hau.