WIDANG SI’ANG ONÉ HI YOHANÉS 17 - Bahasa Manggarai New Testament

Beté-Bicar Latang Te Babél 17:1-18

¹ Itug kali main cengata oné-mai malékat pitu situt ba pitud piala, taé oné aku, “Mai ga, aku kudut toto oné hau wérét latang te iné-wai mbérong mésé, hitut lonto oné osang ata do waén.

² Sanggét raja oné lino poli loma agu hiad, agu sanggéd ata oné lino poli langud taung le anggor loma diha.”

³ Poli hitu Nai Nggeluk de Mori Keraéng kuasa akuy, agu dadék aku le malékat hitu nggere-oné satar mambak. Ita laku cengata iné-wai lonto bétan ca kaka ata wara kuntem wulun. Kaka hitu manga pitud sa’in agu cepulud ranggan, agu oné wekin penong le tulis loér-lokét Mori Keraéng.

⁴ Iné-wai hitu paké ceca lango agu towé wara kuntem ata rimbi-roék le emas, luju agu mutiara. Oné limén manga ca piala emas ata penong le nelung agu rinek cir de pandé loman.

⁵ Oné sa’i galan manga tulis ca ngasang ata toé pecing lata betuan. Ho’oy ngasang hitu, “Aku dé Babél mésé, endé de sanggéd iné-wai mbérong agu ata hiwe-hawek oné lino.”

⁶ Ita laku iné-wai hitu, langu le dara de weki serani agu dara datat mata landing le téing sakasi latangt Mori Yésus. Du itan laku iné-wai hitu, lenget kétak aku.

⁷ Itu kali taé de malékat hitu oné aku, “Co’o tara lengetm hau ta! Aku kudut tombo oné hau pété ceha de iné-wai hitu agu pété ceha de kaka hitut léti diha, ngong kaka hitut pitud sa’in agu cepulud ranggan.

⁸ Kaka hitut ita le hau, mosé dé’ity danong, maik te ho’on toég mangay. Tiong te tua koléy oné-mai ngampang mata, agu te ampusy. Sanggén ata oné lino, ata toé manga ngasangd oné Buku Data Mosé du pu’ung dédékn tana lino, ciri lengets émé ita kaka hitu, ai danong mosé dé’ity, maik te ho’on toég mangay, landing te tua koléy.

⁹ Ata sékékn ho’o ga, idep agu nggalas nai. Pitu sa’i situ, ngong pitud golo ata lonto de iné-wai mbérong hitu.

¹⁰ Pitu sa’i situ kolé, ngong pitud raja: Limad polis kenid ga, hitut ca rémé cau kuasa kin agu hitut ca kolé, toéd caiy. Émé cai hia tai, dokong kaut cau kuasan.

¹¹ Kaka hitut manga dé’ity danong, maik te ho’on toég mangay, ngong raja te alon. Hia hitu cengata oné-mai pitud raja situ ata tiong te ampusy gi.

¹² Cepulu rangga situt ita le hau, ngong cepulu raja ata toé di cau kuasas. Maik isé te cau kuasas cama laing agu kaka hitu, ce-jam kali béhéngn.

¹³ Cepulu raja situ, nai ca anggit-tuka ca léléngs kudut téing mberes agu kuasad oné kaka hitu.

¹⁴ Isé kudut rampas dungkang Anak Jimbal. Maik Anak Jimbal hitu agu sanggéd ata situt imbi Hias, ngong isét poli piléd agu poli béntad, ngancéng pandé kodas raja situ, ai Anak Jimbal hitu dé, Mori de sanggéd mori agu Raja de sanggéd raja.”

¹⁵ Mai kolé taé de malékat hitu, “Sanggéd waé situt poli itad le hau, ata lonto le iné-wai mbérong hitu, ngong sanggéd wa’u, uku, ro’éng, tana agu curup.

¹⁶ Cepulu rangga agu kaka hitut ita le hau, te kodo lisé iné-wai mbérong hitu. Enggerep lise sangged cao-can agu pandé laco hia; hang lisé nurun agu tapa ngkewusy le api.

¹⁷ Ai Mori Keraéng poli pandé gérak nai disé, kudut pandé sanggéd nanéng Diha, wiga isé nai ca anggit-tuka ca léléng te téing kuasad oné kaka hitu dengkir rapakd sanggéd reweng de Mori Keraéng.

¹⁸ Iné-wai mbérong hitut ita le hau, ngong béndar mésé hitut perénta sanggéd raja oné lino.”