MATÉUS 28 - Bahasa Manggarai New Testament

To’on Mori Yésus 28:1-10

¹ Du laun leso Sabat, le gula ucap, du leso laring cain minggu hitu, ngo hi Maria Magdaléna agu hi Maria bana, te lélo boa hitu.

² Itu wan cai nupung mésé, ai cengata malékat de Mori wa’u éta mai awangn agu dur watu hituy agu nggoléngy liha, poli hitu lonto bétan.

³ Rangan cama ného hilaty agu ceca pakén mbot mana kampas bombong.

⁴ Isét lami situ ndéwer taungs wekid le rantang agu cama kaut kudut matas.

⁵ Maik malékat hitu taé agu inéwai situ: “Néka rantang méu; ai baé laku méu, kawé Mori Yésus, hiot wéo oné panggol.

⁶ Hia toég manga cé’é ho’on, ai Hia poli to’o kolén, cama ného hiot poli tombo le Run. Mai, lélo damang osang baté lolingn.

⁷ Agu gélang koé ngos te tombo agu rasul-rasul te Hia polig to’on oné mai ata mata. Cai olo Hia po méu lé Galiléa; nitu méu te itan Hia. Tadan, polig dé taén Laku agu méu.”

⁸ Gelang-gélangs isé koléd oné mai boa hitu, déméng agu rantangd, maik kais kéta naid agu tendi kétas mburukd te tombo agu rasul-rasul de Mori Yésus.

⁹ Calak doing, Mori Yésus cumang dungka agu isé mai taén: “Tabé latang te méu.” Isé ngo ruis Hia agu nggao wa’in agu suju Hias.

¹⁰ Mai taé de Mori Yésus ngong isé: “Néka rantang. Ngom ga, agu tombo oné asé-ka’é Daku, kudut isé ngo oné Galiléas, agu nitus isé te tiba Akus.”

Nggopét Disét Adak Agama 28:11-15

¹¹ Du isé ngai oné beréha salangd, mais pisa taus oné mai isét lami ngo nggere-oné kota agu tombo taung sanggéd apa ata poli itad lisé agu imam-imam kepala.

¹² Agu du poli bantang agu iséd taung tu’a, tepo kaut lisé, og téing séng do-do kauts serdadu-serdadu situ,

¹³ agu mai taéd: “Méu paka tombo, te rasul-rasul Diha mai le wiés agu tako Hia du méu lari tokos.

¹⁴ Agu émé dengé keréba ho’o li Pilatus, ami te tombo agu hia, wiga méu toé manga co’o laings.”

¹⁵ Isé tiba séng situ agu pandé lorong ného baté pedé disé oné isé. Agu tombo ho’o wéro-émbon oné sanggén ata Yahudi dengkir te ho’on.

Wuat Rasul-Rasul Te Keréba Injil

¹⁶ Og ngod rasul situ campulu ca oné Galiléas, oné golo hiot poli toi le Mori Yésus agu isé.

¹⁷ Du ita Hiad isé, suju Hia, maik manga pisa taus ata sesenga’is.

¹⁸ Mori Yésus mai ruis isé agu mai taén: “Oné Aku poli téing kuasa, oné Surga agu oné lino.

¹⁹ Landing hitu ngom ga, pandé koé ciri ata nungku Dakus sanggéd ata agu cebong koé isé le méu, le ngasang de Ema, agu de Anak, agu de Nai Nggeluk,

²⁰ agu toing koé isé te pandé sanggéd apa ata poli jera Laku agu méu. Agu paka idep di’a le méu, Aku loréng méu mtaungk dengkir cemoln lino.”