MATÉUS 22 - Bahasa Manggarai New Testament

Rapang latangt Ramé Kawing 22:1-14

¹ Itug kali Mori Yésus curup koléy, ba le rapang moléy agu isé:

² “Paté Adak Surga rapang ca raja ata pandé ramé kawing te anakn.

³ Hia wuat mendin te bénta weki situt poli taéd te ramé kawing hitu, maik ata situ toé gorid te mai.

⁴ Hia jera kolé mendi cebanan, mai pedén: Taé agu isé situt poli taéd: Moro matan, hang poli taungs wédid, japi laki agu paéng ata liwing daku poli taungs mbeléd; poli taungs nangket, mai koém kali ga oné ramé kawing ho’o.

⁵ Maik isét poli béntad toé pinga lisé; manga ata duat oné umad, manga ata ngo wintuk gejur koéd,

⁶ agu ata iwod deko mendi situ, wahéng agu mbelés lisé.

⁷ Rabo kétay raja hitu, itu kali jera lawan ngo nitu kudut pandé ampus taungs isét ala mendi situ agu tapa bendar disé hitu.

⁸ Poli hitu taé taung agu mendin: Hang ramé kawing polisg wédid, maik ata so’ot poli taéd, toé remo te hitu.

⁹ Landing hitu ngo taung oné salang-salang dangka agu bénta taung céing kaut ata cumang de méu, kudut mai oné ramé kawing hitu.

¹⁰ Itu kali ngod mendin situ agu impung taung lisé sanggéd ata cumang disé oné salang ata da’at molé, ata di’a molé, wiga penong ndéi ramé kawing hitu le meka.

¹¹ Du ngoy onén raja hitu te cumang agu meka situ, ita liha cengata toé paké ceca raméy.

¹² Mai taén agu hia: Oé asé-ka’én, apa maim hau cé’é ho’o, toé paké agu ceca latangt ramé? Maik ata hitu hema kin.

¹³ Itu kali mai taé de raja hitu ngong mendin: Pongos wa’i agu limén, poli hitu oké oné nendep hitut tuil da’at. Nitu manga jéjéng agu’ kérek ngis.

¹⁴ Ai dod ata béntad, maik cekoés kali ata piléd.”

Latang Te Bajar Taki Agu Kaisér 22:15-22

¹⁵ Poli hitu ngos ata Parisi; jangka disé, co’o moléy lisé ngancéng seréntén Mori Yésus le can réi.

¹⁶ Isé jera ata nungku disé cama laing agu ata Hérodian kudut réi agu Hia: “Tuang Guru, baé lami Ité ata molor, agu molor kolé toing salang de Mori Keraéng, agu Ité toé manga rantang céing kautd, ai Ité toé manga pilé atad.

¹⁷ Taé koé agu ami, co’o nuk Dité: Ngancéng ko toé téing taki agu Kaisér (raja data Roma)?”

¹⁸ Maik baé le Mori Yésus nai da’at disé agu mai taén: “Co’o tara damang Akus méu, oé ata pisik?

¹⁹ Toto damang agu Aku le méu séng hitut kudut taki laingy.” Ba lisé ca dinar oné Hia.

²⁰ Itu kali Hia réi isén: “Gambar agu tulis diong ho’o?”

²¹ Mai walé disé: “Gambar agu tulis de Kaisér.” Mai taé de Mori Yésus agu isé: “Téing agu kaisér apa ata paka téing le méu agu kaisér agu oné Mori Keraéng le méu apa ata paka téing oné Mori Keraéng.”

²² Dengé walé hitu lenget kétas isé, agu ledong Mori Yésus, poli hitu ngos ga.

Réi Data Saduki Latang Te Mosé Du Poli Mata 22:23-33

²³ Du leso hitu mai pisa taus ata Saduki oné Mori Yésus, ata le ita disé, toé manga mosé kolé du poli mata. Réi lisé agu Hia:

²⁴ “Tuang Guru, taé di Musa, émé mata cengata agu toé manga na’a waén, asé-ka’én paka lili winan, kudut manga na’a waén, latang te asé-ka’én hitu.

²⁵ Mangag de pitu taus asé-ka’é, hiat ngaso kawingy, maik poli hitu matay. Landing le toé manga na’a waén, ledong winan hitu te lili le asé-ka’én.

²⁶ Nenggitu kolé hiat tesuan agu hiat te telun dengkir agu hiat tepitun.

²⁷ Agu cemol ga, du poli taungs matad isé, mata kolég inéwai hitu.

²⁸ Céing oné mai isét pitu situ te ciri rona laing de inéwai hitu du leso mosé koléd ata mata? Ai sanggéd isé poli wina laing inéwai hitud.”

²⁹ Walé de Mori Yésus agu isé: “Méu wéléngm, ai méu toé pecing Surak Nggelukm, nenggitu kolé kuasa de Mori Keraéng!

³⁰ Ai du leso to’o kolé, manusia toé laki agu toé wais, maik mosé ného malékat éta Surga.

³¹ Maik latang te to’o koléd sanggéd ata mata, toéd bacang le méu ko, apa ata taé le Mori Keraéng, du Hia curup:

³² Akuy Mori Keraéng di Abraham, Mori Keraéng di Ishak, agu Mori Keraéng di Yakub? Hia toé Mori Keraéng data matay, maik Mori Keraéng data moséy.”

³³ Ata do situt dengén, lenget laing lisé toingN.

Perénta Ata Mésén 22:34-40

³⁴ Du dengén lata Parisi, te Mori Yésus poli pandé jenger ata Saduki, itus nekekd weki disé

³⁵ agu cengata oné mai isé ata pecing Tauraty, réi te damang Hia:

³⁶ “Tuang Guru, perénta nia ata mésén oné Taurat?”

³⁷ Mai walé de Mori Yésus agu hia: “Momang Mori Keraéng, mai wa mai nain, lawang wakarm agu lawang taung nuk naim.

³⁸ Hituy perénta ata mésén agu taki lén.

³⁹ Agu perénta tesuan, ata cama ného hituy, momang ga haé atam cama ného weki rum.

⁴⁰ Oné mai perénta so’o sua, wéod sanggéd Adak Taurat agu surak de sanggéd nabi.”

Woé-joé De Mori Yésus Agu Hi Daud 22:41-46

⁴¹ Du rémé impung kid ata Parisi, réi le Mori Yésus, mai taén:

⁴² “Co’oy nuk de méu latang te Mésias? Anak diong Hia?” Mai taé disé ngong Hia: “Anak di Daud.”

⁴³ Mai taé Diha agu isé: “Émé nenggitu, co’o weli hi Daud le titong de Nai Nggeluk ngancéng caro Hia Morig, du taén:

⁴⁴ Mori Keraéng poli curup agu Mori dakun: lonto ga oné racap wanang Daku, dengkir sangged ata bali de hau na’a Laku wa mai wa’im.

⁴⁵ Jari émé hi Daud caro Hia, Mori daku, co’oy néng Hia tara anak dihan koléy?”

⁴⁶ Toé kéta manga cengatan ata ngancéng walé Hia, agu pu’ung leso hitu toé kéta manga cengatan kolé ata mberes te réi cao-ca agu Hia.