MATÉUS 15 - Bahasa Manggarai New Testament

Perénta Dé Mori Keraéng Agu Adak Yahudi 15:1-20

¹ Poli hitu mai pisa taus ata Parisi agu ata pecing Taurat oné mai Yérusalém kamping Mori Yésus, agu mai taéd:

² “Co’o ata nungku Dité tara lagé adak de empo ditéd? Isé toé samo liméd du turung hang.”

³ Maik walé de Mori Yésus ngong isé: “Co’o méu kolé tara lagé perénta de Mori Keraéngs, soho kaut adak de empos?

⁴ Ai taé de Mori Keraéng: Hiang ga endém agu emam, agu céwén kole: Céing-céing ata mawang eman ko endén toét toé mata le pakiy.

⁵ Maik taé de méu: céing kaut ata taé ngong eman ko endén: sanggéd campé ata, paka tiba le méu oné mai akun, hitus takung latang te Mori Keraéng,

⁶ ata hitu toé sékékn kolé te hiang eman agu endén. Ali hitu okes le méu reweng de Mori Keraéng, landing kaut le lut adak de rus.

⁷ Oé ata pisik! Kopn tu’ung curup di nabi Yésaya latang te méu:

⁸ Wa’u so’o bong Aku éta lobo wiwird, maik naid tadang oné mai AkuD.

⁹ Oké bod ngaji disé kamping AkuD, égém toing hitut wintuk disé perénta de manusia.”

¹⁰ Og béntad le Mori Yésus ata do situ, agu mai taén ngong isé:

¹¹ “Séngét agu idep koé oné nais: Toé hang ko waé inung ata pandé rinek, maik apa hitut loa oné mai mu’un, hituy ata pandé rinek laing.”

¹² Itu kali maid ata nungkun agu réi Hia: “Mori, baé lité, curup Dité hitu pandé kéré kéta naid isét Parisi?”

¹³ Mai walé de Mori Yésus: “Sanggéd po’ong ata toé weri le Ema Daku ata ka’éng éta Surga, kudut kebut agu waké-wakéd.

¹⁴ Kongd isé situ: Isé ata buta, todang cama butad. Émé ata buta todang cama butad, toét-toé, isét sua pa’u oné ngalis.”

¹⁵ Maig taé di Pétrus agu Hia: “Si’ang koé rapang hitu agu ami.”

¹⁶ Mai walé de Mori Yésus: “Toé tara pecing kin le méu ko?

¹⁷ Toé baé le méu, sanggéd apa ata hang agu inung dité, nggerewa tukas agu oké oné kakus?

¹⁸ Maik apa ata losa oné mai mu’ud, mai wa mai naid, hitu te pandé rinék atas.

¹⁹ Ai oné mai naid tekad sanggéd nuk da’at, mbelé ata, loma, mbérong, tako, wada nggopé-nggapét, agu mbécik.

²⁰ Ho’os de ata pandé rinek. Maik hang le limé saki, toé manga pandé rinek ata laingn.”

Iné-Wai Kanaan Ata Imbi 15:21-28

²¹ Itug kali ngo nitu main Mori Yésus hésing oné tana Tirus agu Sidony.

²² Main cengata inéwai Kanaan oné tana hitu agu ciékn: “Ba’éng koé aku, yo Mori, Anak di Daud, ai anak inéwai daku iling le jing da’aty agu leng kéta séréngn.”

²³ Landing toé kéta rimba le Mori Yésus. Og maid ata nungkun agu tegi oné Hia: “Co’om jera ngoy, ai hia lut ité agu ciék keta kin.”

²⁴ Mai walé de Mori Yésus: “Wuatg Aku hanang latang te jimbal-jimbal siot mora oné mai ata Israéld.”

²⁵ Landing inéwai hitu mai ruis agu suju Hia mai taén: “Mori, campé koé aku.”

²⁶ Maik mai walé de Mori Yésus: “Toé patun emi roti latang te anak koé, wéwéng oné acuy.”

²⁷ Mai taé de inéwai hitu: “Tu’ung Mori, maik acu hitu hang tora ata pa’u éta mai méja de morin.”

²⁸ Og walén le Mori Yésus agu mai taén ngong hia: “Oé endé, mésén tu’ung imbi de hau, itu tara jarin, ného baté tégim.” Agu du hitu muing inan anakn.

Mori Yésus Pandé Inas Ata Beti 15:29-31

²⁹ Du ledong tana hitu, Mori Yésus lako loléng sano Galiléay agu ngo éta golo agu lonto nituy.

³⁰ Remon wa, do ata cewur mai oné Hia, berotong ata péko, ata senggét, ata buta, ata dopel agu dod kolé ata beti bana, pehers lisé wa wa’i de Mori Yésus itu kali pandé ina kéta taungd Liha.

³¹ Wiga lenget kéta taungs ata do situ ai ita ata dopel ngancéng tombos, ata senggét inas, ata péko lakos, ata buta ngancéng itas, agu sanggéd isé, naring ngasang de Mori Keraéng data Israél.

Mori Yésus Téing Hang Pat Sebu ata 15:32-39

³² Itu kali bénta taungs ata nungkun Mori Yésus agu mai taén: “Wéong kéta nai Daku le momang ata do so’o. Telug leso isé lut Akus maik toé manga hangd. Aku toé gorig te jera isé kolé déméng daremd, rantang boats oné salang.”

³³ Mai taé data nungkun ngong Hia: “Co’oy oné osang lentong ho’o ité ngancéng dumpu roti te téing lawa do so’o?”

³⁴ Mai taé de Mori Yésus ngong isé: “Pisa mongkod roti de méu?” Mai waléd: “Pitu mongkod, agu manga kolé pisa mongkod ikang koé.”

³⁵ Itu kali susungd ata do situ le Mori Yésus, lonto wa tana.

³⁶ Poli hitu emis Liha roti pitu mongko agu ikang situ, ngaji wali di’a, pu’ils agu téing oné ata nungkun, mai ata nungkun gatang lawa do situ.

³⁷ Sanggéd lawa do situ hang wiga becurd. Poli hitu ligots ata récid, penong pitu langkangd.

³⁸ Lawa situt hang pat sebu ata ronad, toé rékéng inéwai agu anak koéd.

³⁹ Og jera lawa do situ le Mori Yésus te kolé. Hia léti wangka agu ngo oné tana Magadan.