MARKUS 1 - Bahasa Manggarai New Testament

Hi Yohanés Cebong 1:1-8

¹ Ho’o dé kréba di’a laring cain te tombo Mori Yésus Kristus Anak de Mori Keraéng.

² Ného manga poli tulis oné Surak de nabi Yésaya: “Lélo ga, Aku wuat penggawag be bolo mai Hau, hia ata arong salang latang te Hau,

³ manga reweng data ata kepok oné satar mambak: We’ang ga salang latang te Morin, Pandé helek koé salang baté lako Diha.”

⁴ Nenggituy dé hi Yohanés Cebong tombo oné satar mambak ba keréba te cebong kudut tesér agu ampong ndékoks.

⁵ Itug kali maid sanggéd ata oné mai tana Yudéa agu ata béndar Yérusalém, ndarut kaut agu tura ndékokd, cebongs liha oné waé Yordan.

⁶ Hi Yohanés cuki juba wulu untay, agu kantengn oné mai luit, agu hangn pusu agu waé ruang.

⁷ Nenggo’oy keréba diha: “Poli aku te cai Hia hitut céwé mésé kuasan oné mai aku; te tengguk caca wasé sepatu Diha kaut, toé remok aku.

⁸ Aku te cebong méu le waé, maik Hia cepisa cebong méu le Nai Nggeluk.”

Mori Yésus Cebong Li Yohanés 1:9-11

⁹ Du hitu mai Mori Yésus oné mai Nasarét tana Galiléa, agu Hia cebong li Yohanés oné Waé Yordan.

¹⁰ Du mai oné mai waén Hia, rodo ita Liha léngay awang agu Nai Nggeluk wa’u ného Tekur Jawa lobo Hiay.

¹¹ Itug kali dengé reweng éta mai Surga: “Hau dé Anak cembes Daku, Hau kéta ata henan oné nai Daku.”

Mori Yésus Damang Le Jing Da’at 1:12-13

¹² Poli hitu muing dadé Hia le Nai Nggeluk nggere-oné satar mambak.

¹³ Oné satar mambak hitu Hia ka’éng patmpulu leso béhéngn agu damang le jing da’aty. Hia kaéng nitu oné bahi-réha kaka mila, maik malékat-malékat gatang Hias.

Mori Yésus Manga Oné Galiléa 1:14-15

¹⁴ Du poli dekon hi Yohanés, itug kali main Mori Yésus nggere-oné Galiléa te toing Keréba Di’a de Mori Keraéng,

¹⁵ mai taén: “Ho’o dé cekengn ga, tiong te cai Adak de Mori Keraéng. Tesérm ga, agu imbi koé Keréba Di’am!”

Mori Yésus Pilé Ata Nungkun Laring Cain 1:16-20

¹⁶ Du Mori Yésus lako loléng lupi sano Galiléa, itas Liha hi Simon agu asé-ka’én hi Andréas. Isé rémé kéta oké ndalad oné sano, ai isé ata ndala ikangs.

¹⁷ Mai taé de Mori Yésus ngong isé: “Mai é, lut Akum, agu méu te toing agu titong Laku kudut ndala manusiam.”

¹⁸ Og kali isé lego wa kaut ndalad agu lorong Hias.

¹⁹ Agu du Mori Yésus toé di tadang koé lakon, itas Liha hi Yakobus anak di Zébédéus agu asén hi Yohanés rémé kéta besik ndalad bonén wangka.

²⁰ Mori Yésus gélang-gélang bénta isé agu isé legong kaut emad hi Zébédéus oné wangka cama agu ata pala disé, og kali lut Hiad.

Mori Yésus Oné Mbaru Ngaji Oné Kapérnaum 1:21-28

²¹ Mori Yésus agu ata nungkun cai oné Kapernaums. Du pu’ungn leso Sabat, Mori Yésus lampuk oné mbaru ngajin agu toing atay.

²² Isé jenger kéta taungs dengé toing Diha, ai Hia toing isé ného toing data hiot manga kuasan, toé ného toing disét pecing Taurat.

²³ Du hitu oné mbaru ngaji hitu manga cengata ata tamang le jing da’aty. Mai kepok data hitu:

²⁴ “Co’o kéta betuan tara mai cé’é amim hau Yésus ata Nasarét? Asa kudut mai pandé kosé ami Hau? Pecing laku, céi Hau hitu: Ata Nggeluk oné mai Mori Keraéng.”

²⁵ Maik Mori Yésus kenta jing da’at hitu, mai taén: “Hemah ga, pé’ang ga oné mai ata ho’om!”

²⁶ Jing da’at hitu ké’u-ka’ul ata hitu; cang agu rémé werésn hia mbetér nggere-pé’ang oné mai ata hitun.

²⁷ Isé jenger kéta taungs, wiga isé réi cama taud, mai taéd: “Apa kéta ho’o gé? Ho’o toing ata werun. Hia curup déméng agu kuasan. Sanggéd jing da’at kolé peréntas Liha agu lorong kaut Hias.”

²⁸ Itug kali gélang kéta wéro-émbon tombo ngasang Diha oné temu tana Galiléa.

Mori Yésus Pandé Ina Inang Di Pétrus Agu Ata Bana 1:29-34

²⁹ Du kolén oné mai mbaru ngaji hitu Mori Yésus cama laing agu hi Yakobus agu hi Yohanés ngo nggere-oné mbaru di Simon agu Andréas.

³⁰ Inang di Simon halas kin nitu ai pémpangy. Gélang-gélang lisé tombon oné Mori Yésus.

³¹ Hia ngo ruis osang de inéwai hituy, cang agu candang limén hia campé te to’on, wiga ina muing pémpangn. Poli hitu inéwai hitu gatang iséy.

³² Du manég tana agu kolepg leso, dadé lata nggere-oné Mori Yésus sanggéd ata beti agu ata hena le jing da’at.

³³ Itu kali impung taung ata oné béndar hitu be olo mai para mbaru hitu.

³⁴ Hia pandé ina taungs ata do situt susa ali beti do, agu mbérs jing da’at; toé ondangs Liha sanggéd jing da’at situ te curup, ai pecing lisé Hia.

Mori Yésus Toing Oné Béndar Cebana 1:35-39

³⁵ Le gula ucap, du ngili-ngelak kin tana, to’o Hia agu ngo nggere-pé’angy. Hia ngo oné osang ata lingi-lengot kéta agu ngaji nituy.

³⁶ Maik hi Simon agu haé lakon kawé Hias;

³⁷ Du dumpun Hia lisé, mai taéd: “Sanggéd ata kawé Ites.”

³⁸ Mai walé Diha: “Mai ga, ité ngo osang cebanat, nggere-oné bendar ata ruis ho’o, kudut nitu kolék Aku tombo Keréba Di’a, ai latang te hituk Aku tara maig.”

³⁹ Itug kali ngon Hia oné temu tana Galiléa agu tombo Keréba Di’a oné sanggéd mbaru ngaji disé agu mbér taungs sanggéd jing da’at.

Mori Yésus Pandé Ina Ata Bokéy 1:40-45

⁴⁰ Cengata ata hena le beti boké mai wa ranga de Mori Yésus, cang agu tikuln oné ranga Diha, hia tegi campé Diha, mai taén: “Émé ngoéngd Ité, Lité koé ngancéng inan beti daku.”

⁴¹ Itug kali kendut kéta nai Diha ali momang, og kali Hia los limén asur ata hitu agu mai taén ngong hia: “Ngoéng’g Aku, inah betim ga.”

⁴² Du hitu kéta muing moray beti boké data hitu, agu nggomas kéta wekin.

⁴³ Jera muing Liha ata hitu te koléy agu ré’ing tu’ung:

⁴⁴ “Nuk di’a-di’a, néka kéta tombo le hau apa ho’o agu céing-céing kaut, maik ngoh ga toto wekim oné imam agu ba takung lut ina betim, baté perénta di Musa kudut pecing kolé lisé.”

⁴⁵ Maik ata hitu ngo wéro-émbon pandé hitu agu tombo taung néténg ata, wiga Mori Yésus toé ngancéng kolé liba si’ang kétay nggere-oné béndar. Hia ka’éng bepé’angy oné osang ata lik mentuk kétay; koném nenggitu mai kéta kid ata do oné Hia, oné mai temu tana.