LUKAS 4 - Bahasa Manggarai New Testament

Damang Oné Satar Mambak 4:1-13

¹ Mori Yésus hitut penong le Nai Nggeluky, kolé oné mai waé Yordan, itu kali titong le Nai Nggeluky oné satar mambak.

² Hia ka’éng nitu patmpulu leso béhéngn, agu damang le jing da’aty. Lawang nitun Hia, toé kéta manga hangn, agu du poli hitu Hia darém gi.

³ Itu kali mai taé de jing da’at ngong Hia: “Émé Anak de Mori Keraéng Hau, jera dé watu so’o ciri rotis.”

⁴ Mai walé de Mori Yésus agu hia: “Manga tulis: Mosén manusia toé le roti kanang.”

⁵ Poli hitu hia dadé Mori Yésus éta osang ata langkas, agu ca repa mata kaut hia toto taung agu Hias sanggéd menan de tana lino.

⁶ Mai taé de jing da’at ngong Hia: “Sanggéd situt kuasa agu di’a dirapn te téing Haus laku, ai sanggéd situ polig téing agu akud, agu aku téing oné céing kaut ata ngoéng laku.

⁷ Jari, émé Hau suju akuh, sanggéd menan situ, de Haus morid.”

⁸ Maik Mori Yésus taé agu hia: “Manga tulis: Hau paka suju Mori Keraéng, Sengajim, agu oné Hia kaut hau iom!”

⁹ Poli hitu, hia dadé Mori Yésus nggere-oné Yérusalém, agu peher Hia éta bubung Mbaru de Mori Keraéng, mai taén ngong Hia: “Émé Anak de Mori Keraéng Hau, woncekh dé nggere wah,

¹⁰ ai manga tulis: ‘Latang te Hau, Hia jera sanggéd taung malékatn kudut sémbéng Hau,

¹¹ agu isé te saka Hau lobo liméd, rantang boto timpok oné watu wa’im.’ ”

¹² Mai walé de Mori Yésus agu hia: “Manga curup, hau néka damang Mori Keraéngm, Sengajim.”

¹³ Du poli taung cemold sanggéd damang de jing da’at hitu, jing da'at hedong oné mai Hia, agu géréng leso ata di’an.

Mori Yésus Kolé Nggere Oné Galiléay 4:14-15

¹⁴ Le kuasa de Nai Nggeluk, koléy Mori Yésus nggere oné Galiléa. Agu émbo-wéron latang te Hia oné temu tana hitu.

¹⁵ Cang hitun, Hia toing ata oné sanggen Mbaru ngaji, agu sanggéd ata naring Hias.

Mori Yésus Toé Tibay Oné Nasarét 4:16-30

¹⁶ Hia ngo oné Nasarét, béo baté uwan, agu lorong laséngn du leso Sabat, Hia ngo oné Mbaru ngajiy, agu hesé kudut bacang Kitab Nggeluk.

¹⁷ Téing oné Hia Kitab di nabi Yésaya, agu du poli wukan Liha, Hia dumpu curup ata manga tulisn:

¹⁸ “Nai de Mori Keraéng manga oné Akuy, ali Hia palas Akuy, kudut caing keréba di’a oné ata lénggé; agu Hia poli wuat Akun

¹⁹ te tura caca wasé latang te isét dekong, agu ita ata latang te isét buta, kudut legod isét rené, te tombo ntaung nabit de Mori Keraéng cai gi.”

²⁰ Poli hitu tadu Liha buku hitu, téing kolé oné hiat caun, itug kali lonton; lepot oné Hia taungs mata disét manga oné Mbaru ngaji hitu.

²¹ Itu kali Hia pu’ung toing isé, mai taén: “Oné leso ho’o rapakn curup ho’o, du dengén le méu.”

²² Sanggéd ata situ naring molor Diha, agu isé lengets landing curupn situt manik laingd néng caron, itu kali mai taéd: “Toé weli anak di Yusuf Hia ho’o ko?”

²³ Maig taéN ngong isé: “Toét-toé, méu taé go’ét ho’o ngong Aku: Oé doktér, pandé ina koé weki rum di. Pandé koé cé’é ho’o kolé, oné béo rum ho’o, sanggéd situt dengé lami ata poli jarid oné Kapérnaum!”

²⁴ Agu mai kolé taén: “Aku taé agu méu, tu’ung kéta toé manga nabi ata hiang oné tana run.

²⁵ Agu Aku taé oné méu, -- agu curup Daku ho’o molorn: Du uwa di Élia manga dod inéwai luang oné Israél, lété hitu walis tédéng telu ntaung agu enem wulang, agu cain darem hena oné temu tana.

²⁶ Maik hi Élia, wuaty toé latang te cengatan oné mai isé, maik oné inéwai luang oné Sarfat, oné tana Sidon.

²⁷ Agu du uwa di nabi Élisa, dod ata boké oné tana Israél, toé kéta cengatan oné mai isé ata helis wekid hanang hi Naaman ata Siria hitu.”

²⁸ Dengé hitu, rabo da’ats ata situt oné mbaru ngaji.

²⁹ Isé hesés, agu wur Mori Yésus nggere-pé’ang mai béndar, agu dadé Hia oné lupi ngampang poco, osang baté hesén béndar hitu, kudut wéwéng Hia oné ngampang hitu wan.

³⁰ Maik hia lako seduk lagé oné beréha iséy, agu ngon.

Mori Yésus Oné Mbaru Ngaji Oné Kapérnaum 4:31-37

³¹ Poli hitu Mori Yésus ngo oné Kapérnaumy, ca béndar oné Galiléa, agu toing nitu néténg leso Sabat.

³² Isé lenget da’ats dengé toingN, ai penong kuasa kéta pa’u curupN.

³³ Oné mbaru ngaji hitu manga cengata ata hena le jingy agu hia ciékn:

³⁴ “Oé Hau Yésus ata Nasarét, apa sékékm Hau agu pandé dami? Ité mai te pandé calang amit? Pecing laku Tité: Ata Nggeluk oné mai Mori Keraéng.”

³⁵ Maik renti hia le Mori Yésus, mai taéN: “Hema, pé’ang hau oné mai ata hitum!” Mai jing da’at hitu péncar ata hitu oné beréha ata do, agu pé’ang oné mai hian, toé kolé pandé beti koé cekoén liha.

³⁶ Agu sanggéd ata lengets, mai taé cama taud: “Lengn tu’ung curup ho’o! Ai agu semengakn kéta, agu kuasaN Hia perénta sanggéd jing da’at agu pé’ang kauts isé.”

³⁷ Wéro-émbon tombo nia-nian Hia oné tana hitu.

Mori Yésus Pandé Ina Inang Di Pétrus Agu Ata Iwod 4:38-41

³⁸ Poli hitu Hia kolé oné mai mbaru ngaji hitu, ngo oné mbaru di Simon. Inang di Simon rémé kéta pémpang mésén, agu tegi lisé oné Mori Yésus kudut campé hia.

³⁹ Itu kali hesén Hia lupi inéwai hitu, agu kenta pémpang hitu; wiga pémpang hitu mora kéta muingy. Itu kali inéwai hitu hidi-hadan to’on, agu tiba isén.

⁴⁰ Du kolepn leso ga, sanggéd ata beti dadé oné Hia taungs, situt do kéta tarad beti. Itu kali témba limén Hia néténg isé agu pandé ina kéta taungs.

⁴¹ Oné mai isét do situ, pé’ang kolés jing da’at cang agu ciékd: “Ité Anak de Mori Keraéng.” Itu kali ré’ing kéta isé Liha néka curups, ai baé lisé, Hia hi Mesias.

Mori Yésus Toing Oné Sanggéd Béndar Bana 4:42-44

⁴² Du gérak tana ga, Mori Yésus angkak ngo oné ca osang ata lingi-lengot ketay. Maik ata do kawé Hia; du itan Hia ga, isé po’é kéta tu’ung Hia, kudut néka di pencang iséN.

⁴³ Maik taé Diha ngong isé: “Oné sanggéd béndar bana kolé, Aku wéro keréba di’a Adak de Mori Keraéng, ai latang te hituk Aku tara wuatg.”

⁴⁴ Agu Hia wéro keréba di’a oné sanggéd mbaru ngaji oné tana Yudéa.