LUKAS 3 - Bahasa Manggarai New Testament

Hi Yohanés Te Téing Cebong 3:1-20

¹ Oné ntaung campulu liman perénta de Kaisér Tiberius, lété hi Ponsius Pilatus ciri wakéln tana Yudéa, agu hi Hérodés rajan tana Galiléa, hi Pelipus, asé-ka’én rajan tana Ituréa agu Trakonitis, agu hi Lisanias rajan tana Abiléné,

² du hi Anas agu hi Kaipas ciri Imam Mésé, cain curup de Mori Keraéng oné hi Yohanés, anak di Zakarias oné satar mambak.

³ Itug main hi Yohanés oné temu tana Yordan, ba keréba te cebong kudut tesérm agu ampong ndékoks,

⁴ ného situt poli tulis oné Kitap di nabi Yésaya: “Manga reweng hitut ngahol kin oné satar mambak: Arong salang latang te Mori, pandé heleks salang latang te Hia.

⁵ Néténg bengkok te ronés, agu bilang poco agu golo te pandé béas, situt wiki-wekokd te pandé heleks, situt wa-étas te pandé béas,

⁶ agu sanggéd ata té ita selamak hitut oné mai Mori Keraéng.”

⁷ Mai taén ngong ata do situt mai oné hia te cebong: “Oé méut waé de ular mbangi! Céingy ata tura agu méu, losim oné mai rabo hitut kudut caiy?

⁸ Itu tara cir koé wua ata pakep tau agu teser. Agu néka nuk oné nai koés: Hi Abraham ema dami! Ai taé laku agu méu: Mori Keraéng ngancéng pandé sanggéd anak latang te hi Abraham oné mai sanggéd watu so’o!

⁹ Cola polig mangan lobo waké haju, agu néténg pu’u situt toé cir di’ad, te pokas agu longgo oné apis.”

¹⁰ Mai réi disét do agu hia: “Émé nenggitu, co’o kétag pandé dami kali ga?”

¹¹ Mai walén: “Céing ata manga suad bajun, porong pati liha agu hiat toé mangan; agu céing ata manga ni’ang, hia paka pati kolé nenggituy.”

¹² Manga kolés maid isét tegi béa, kudut cebongs agu mai réid agu hia: “Guru, apa kétag pandé dami?”

¹³ Walé liha: “Néka tegi dancu oné mai hitut poli cerepn latang té méu.”

¹⁴ Agu serdadu-serdadu réi kolé agu hia: “Agu ami ga, apa kétag pandé dami?” Walé di Yohanés agu isé: “Néka enggerep agu néka loma ata; remo kaut agu nggajing koé de rum.”

¹⁵ Maik soho ata do ngai géréngd agu bengkes kid, agu réi taung oné naid latang te hi Yohanés, am te hia kétay Mésias.

¹⁶ Mai walé di Yohanés agu taé oné sanggéd ata situ: “Aku cebong méuk le waé, maik Hiat ata céwé mésén oné mai Aku té maiy; té caca wasé sepatun kaut laku, aku toé kopg. Hia te cebong méu le Nai Nggeluk agu le api.

¹⁷ Doku te tepi polig lobo limé Diha kudut nding babi baté rikn agu te nongko gandum na’a oné langkokn, maik ba’o situ, te tapa oné apis hitut toé ngancéng pesan.”

¹⁸ Le do toing bana, hi Yohanés wéro keréba di’a oné ata do.

¹⁹ Maik hia du poli rondong raja Hérodésn, campit bicar di Hérodias, wina de asé-ka’én, agu ali do sala bana ata pandé liha,

²⁰ raja hitu danga-danga da’atn le na’a oné bui hi Yohanés.

Mori Yésus Anak De Mori Keraéng, Cebongy 3:21-22

²¹ Du sanggéd ata do situ, poli taung cebongd, agu du Mori Yésus kolé cebongy agu rémé ngajin, rodo cengka awang,

²² agu wa’un Nai Nggeluk, ba tara de Tekur Jaway lobo Hia. Agu dengé reweng éta mai awang: “Hau Anak ata momang Daku, oné Hau kéta ata henan Laku.”

Tulur Latang Te Mori Yésus 3:23-38

²³ Du Mori Yésus pu’ung gorin, ubun am manga telumpulu ntaungy. Lorong le taé data, Hia anak di Yosépy, anak di Éliy,

²⁴ Anak di Matat, anak di Léwi, anak di Mélkhi, anak di Yanai, anak di Yosép,

²⁵ anak di Matica, anak di Amos, anak di Nahum, anak di Hésli, anak di Nagai,

²⁶ anak di Maat, anak di Matica, anak di Siméi, anak di Yosékh, anak di Yoda,

²⁷ anak di Yohanan, anak di Résa, anak di Zérubabél, anak di Séaltiél, anak di Néri,

²⁸ anak di Malkhi, anak di Adi, anak di Kosam, anak di Élmadam, anak di Ér,

²⁹ anak di Yésua, anak di Éliésér, anak di Yorim, anak di Matat, anak di Léwi,

³⁰ anak di Siméon, anak di Yéhuda, anak di Yosép, anak di Yonam, anak di Éliyakim,

³¹ anak di Méléa, anak di Mina, anak di Matata, anak di Natan, anak di Daud,

³² anak di Isai, anak di Obét, anak di Boas, anak di Salmon, anak di Nahason,

³³ anak di Aminadab, anak di Admin, anak di Arni, anak di Hézron, anak di Pérés, anak di Yéhuda,

³⁴ anak di Yakob, anak di Ishak, anak di Abraham, anak di Térah, anak di Nahor,

³⁵ anak di Serug, anak di Réhu, anak di Pélég, anak di Éber, anak di Salmon,

³⁶ anak di Kénan, anak di Arpakhsad, anak di Sém, anak di Nuh, anak di Lamékh,

³⁷ anak di Métusalah, anak di Hénokh, anak di Yaréd, anak di Mahalaléél, anak di Kénan,

³⁸ anak di Énos, anak di Sét, anak di Adam, anak de Mori Keraéng.