LUKAS 24 - Bahasa Manggarai New Testament

¹ Leso laring cain minggu hitu, du gula ucap, iné-wai situ ngo oné boas, ba rewos ata poli améngd lisé.

² Ita lisé watu para boa poli nggolingn.

³ Agu du cai onéd, toé ita lisé rapu de Mori Yésus.

⁴ Rémé di’a heséd agu ngingi-ngangangd landing ita hitu, itu wan ita sua taus ata, hesé ruis isé, paké ceca ata silep kétas.

⁵ Isé rantang da’ats agu tenggukd, maik ata situ sua curup agu isé: “Co’o tara kawé Hiat mosés méu, oné mai isét mata?

⁶ Hia toé manga cé’é ho’on. Hia polig mosé kolén. Nuk kaut apa ata poli dé’it taé Liha agu méu, du Hia ngai oné Galiléa kin,

⁷ hiot nggo’o taén: Anak Manusia, paka téing lobo limé disét ndékoky, agu pépék du panggoly, agu to’o koléy du leso te telun.”

⁸ Hituy di nukn lisé curup hitu de Mori Yésus.

⁹ Agu du kolé oné mai boad, tombo taung lisé sangged situ, oné ata nungkun situt campulu ca, agu oné asé-ka’é situt iwo.

¹⁰ Ho’os iné-wai situ: hi Maria oné mai Magdala, hi Yohana, agu hi Maria endé di Yakobus. Agu manga kolé iné-wai bana situt cama laing agu isé, tombo agu ata nungku.

¹¹ Maik latang te isé, sanggéd tombo situ, ného curup bod, agu isé toé imbi iné-wai situs.

¹² Alim po nenggitu, hesé hi Pétrus, agu hidi-hadan ngo oné boa hitu. Du ninik liha nggere-oné, ata itan liha, hanang buing kanang. Itu kali hia kolén, agu réi oné nai koén, apa kéta péng ho’ot poli jarin.

Mori Yésus Toto Wekin Oné Salang Nggere-oné Émaus 24:13-35

¹³ Du leso hitu kolé, sua taus oné mai ata nungku de Mori Yésus, ngo oné ca béo, ngasangn Emaus, ata tadangn, am campulu-ca kilo oné mai Yérusalém.

¹⁴ Agu isé rémé tombo sanggéd apa situt poli jarid.

¹⁵ Du isé lari di’a kéta tombod, agu réi sina-cé’éd, dumuk cain weki run Mori Yésus ruis isé, poli hitu lako camas.

¹⁶ Maik manga cao-ca ata caka mata disé, wiga isé toé ngancéng pecing Hiad.

¹⁷ Mori Yésus réi oné isé: “Apa kéta tombo de méu ho’ot rémé lakos?” Itug kali asid isé, agu ngai sango rangad.

¹⁸ Cengata oné mai isé, ngasangn hi Kléopas, mai walén ngong Hia: “Kiram Ité kanang ata mbéot, ata toé pecing apa hitut jari oné Yérusalém pisa leso ho’o koé di?”

¹⁹ Mai taén ngong isé: “Apa hitu ta?” Mai walé disé: “Apa hitut jari oné weki de Mori Yésus ata Nasarét. Hia cengata nabi, ata manga kuasaN oné gorin agu curupN oné ranga de Mori Keraéng, nenggitu kolé oné ranga de sanggéd uku dami.

²⁰ Maik imam kepala agu tu’ad uku dami, poli téing Hia te wahéng mata muingy, agu isé poli pépék Hia oné panggol.

²¹ Alang bengkes dami lété ho’o, Hia hitu kudut mai célan uku Israél. Maik ho’og telu leson ata laun, du pu’ung mangad taung sangged situ.

²² Rodo tombo de pisa taus iné-wai dami, ata pandé ného wetér ami: Le gula ucap isé ngo oné boas.

²³ Cais isé oné boa, toég ita rapu Diha. Itug kali koléd isé, mai tombod, isé poli ita malékats, hitut taéd: ‘Te Hia mosé koléy.’

²⁴ Agu pisa taus haé dami poli ngo oné boad, agu ita tu’ung, te laing molorn apa hitut tombo de iné-wai situ; maik Hia toé itay lisé.”

²⁵ Maig taé de Mori Yésus ngong isé: “Oé méut bapa-béngot, lengn tu’ung cesn nai de méu, wiga toé imbis le méu, sanggéd situt ata poli taung taéd le nabi!

²⁶ Toé weli hi Mesias paka cukung susa taung situ, kudut ngo nggere-oné dirapn?”

²⁷ Itug kali Hia tombo si’ang agu isé, apa ata poli tulis latang te Hia oné Surak Nggeluk, wangka oné mai Surak di Musa agu surak de sanggéd taung nabi.

²⁸ Ruis te cais oné béo hitut kudut ngo disé. Hia ga, pisik lako ruday.

²⁹ Maik po’é kéta Hia lisé, mai taéd: “Toko cama-cama cé’é ho’ot, ai kudut wiég tana, agu leso tiongn te kolep gi.” Itu kali Hia ngo onéN, “Kudut ka’éng cama agu iséy.”

³⁰ Du Hia rémé hang agu iséN, emi Liha roti, itu kali berkakN, poli hitu, pu’il agu téing isé.

³¹ Du hitu di wukan mata disé, agu pecing Hia, maik poli hitu Hia mora oné mai isén.

³² Mai taéd cama taud: “Toé weli biber kéta pucu dité bao, du Hia curup agu itén oné salang, agu Hia tombo si’ang taungs Surak Nggeluk agu ité?”

³³ Itu kali to’od, agu kolé nggere-oné Yérusalémd. Cai nitu, isé ngo oné ata nungku situt campulu ca. Isé ngai lipur kid agu haé rebad.

³⁴ Mai taé disé situ: “Moro matan tu’ung, Mori Yésus poli to’o kolén, agu poli toto wekiN oné hi Simon.”

³⁵ Itu kali isét sua, tombo taung apa siot curup disé oné salang, agu co’o isé tara pecing Mori Yésus, du Hia pu’il rotiN.

Mori Yésus Toto Wekin Oné Sanggéd Ata Nungkun 24:36-49

³⁶ Rémé di’ad isé tapi-taokd curup sanggéd, itu wan Mori Yésus, hesé oné beréha isén, agu mai taén ngong isé: “Hambor agu libur latang te méu!”

³⁷ Isé géga agu rantangs, bet disé cala ita potis.

³⁸ Maik Hia curup agu isé: “Co’o tara gégas, agu tara sesenga’is oné nais?

³⁹ Lélo damang wa’i agu limé Dakum, weki rug Aku ho’o; damang mai asur Akus; ai poti toé manga ici agu tokon, ného ho’ot ita le méu oné Aku.”

⁴⁰ Cang agu curup nenggitun, Hia toto liméN agu wa’iN oné isé.

⁴¹ Agu du toé kin di imbi lisé, ai nisang naid agu lenget kid, maig taé Diha, ngong isé: “Manga hangs méu ko?”

⁴² Mai isé téing ca ropo ikang tapa.

⁴³ Tiba Liha agu hang wa ranga diséy.

⁴⁴ Hia curup agu isé: “Ho’op hiot curup Daku, ata poli taé Laku oné méu, du Aku ngai ka’éng cama agu méug, hitut paka cai olo taungs, situt poli tulis latang te Aku oné Surak Taurat di Musa, Surak de taung nabi, agu Mazmur.”

⁴⁵ Mai Hia wuka nuk disé, wiga isé haéng pa’éln Surak Nggeluk.

⁴⁶ Mai taéN ngong isé: “Manga tulis nenggo’o: Hi Mesias paka matay agu to’o kolé oné mai ata matan, oné leso te telun;

⁴⁷ agu manga kolé tulis: le ngasang Diha, keréba latang te teser, agu ampong ndékok, paka caing oné sanggén ata, pu’ung oné mai Yérusalém.

⁴⁸ Méu dé ata sakasia taung sanggéd so’o.

⁴⁹ Agu Aku te katu oné méu, apa hitut reké de Ema Daku. Maik méu paka ka’éng oné béndar ho’om, dengkir méu jemut le kuasa éta mai osang langkasm.”

Héndéng De Mori Yésus 24:50-53

⁵⁰ Itu kali Mori Yésus dadé isé be pé’ang mai béndar, haéng ruis Bétania. Nitu Hia téti liméN agu berkak isé.

⁵¹ Cang agu berkak iséN, Hia bécang agu iséy, agu héndéng nggere-éta SurgaY.

⁵² Isé suju agu io Hias, poli hitu kolé agu naka kétas nggere-oné Yérusaléms.

⁵³ Isé naring agu bong mtaung Morin oné Mbaru de Mori Keraéng.