KOLOSÉ 4 - Bahasa Manggarai New Testament

¹ Oé meut ngasang sengaji, agil agu molor koém agu mendis. Nuk dé, méu kolé manga sengajis éta Surga.

² Seber koém oné ngaji, agu jerék koém oné wali di’a.

³ Ngaji kolém latang te ami, kudut Mori Keraéng wuka para latang te keréba dami, wiga ami ngancéng tombo latang te pété ceha di Kristus, ai landing hitu tara buig aku.

⁴ Ngaji ga, kudut aku ngancéng tombo si'ang pété ceha hitu wiga gétas kétay.

⁵ Oné woé-joé de méu agu sanggen ata situt toé imbi, nggalas koé mosés agu paké di’a sokor ata mangan.

⁶ Poro curup de méu kanang ata cembesd agu minak dengén. Poro baé le méu, co’oy ata di'an te walé sanggéd réi data.

Cemoln Agu Tabé

⁷ Sanggéd keréba latang te aku kudut toi agu méus li Tikhikus, asé-ka’é dité ca imbi ata momang. Hia ata junggu agu haé reba dami ata keturu laing latangt Morin.

⁸ Hia jera laku ngo oné méuy, betuan ga kudut pecing le méu keréba latang te ami agu kudut hia lémbu nai de méu.

⁹ Hia jera laku cama laing agu hi Onésimus, asé-ka’é ca imbi dité hitut junggu agu momang, cengata oné-mai bahi-réha méu. Isé kudut toi taung agu méu sanggéd cao-ca ata jari cé’é ho’o.

¹⁰ Tabé latang te méu oné-mai hi Aristarkhus, haé réba ata bui agu aku, agu oné-mai hi Markus bangkong di Barnabas – latang te hia méu poli tiba pedé; tiba koé hiam, émé hia mai oné méuy –

¹¹ agu oné-mai hi Yésus ata ngasangn hi Yustus. Hanang isét telu so’o, oné-mai isét poli sunat ata ciri haé reba ca gori daku latang te Adak de Mori Keraéng. Isé situ poli ciri ata lémbu latang te aku.

¹² Tabé oné-mai hi Épafras latang te méu; hia cengata oné-mai méu, mendi di Kristus Yésus, ata ngaji mtaung latang te méu, kudut méu mberes kis hesés ného ata tu’am agu imbi tu’ung oné sanggén cao-ca lorong ngoéng de Mori Keraéng.

¹³ Ai aku ngancéng téing saka-si latang te hia, te hia wuli-mpuir latang te méu agu latang te isét oné Laodikia agu oné Hiérapolis.

¹⁴ Tabé latang te méu oné-mai doktér Lukas ata momang agu oné-mai hi Démas.

¹⁵ Tombo koé le méu tabé dami, latang te asé-ka’é ca imbi oné Laodikia agu latang hi Nimfa agu sanggéd ata serani oné mbaru diha.

¹⁶ Émé poli bacangn surak ho’o oné bahi-réha méu, gejur koém kudut bacang koléy oné weki serani Laodikia agu surak latang te isét Laodikia ngancéng bacang kolé oné méuy.

¹⁷ Tombo koé oné hi Arkhipus: Indang koé, kudut pandé di’a-di’ay gori keturu hitut tiba de hau oné-mai Morin.

¹⁸ Tabé oné-mai aku hi Paulus. Tabé ho’o tulis laku ali limé rug. Nuk koé lampang dakum oné bui ho'o. Widang de Mori Keraéng loréng méuy.