KOLOSÉ 1 - Bahasa Manggarai New Testament

Tabé

¹ Surak ho'o oné-mai hi Paulus, rasul di Kristus Yésus ali ngoéng de Mori Keraéng, agu hi Timotéus asé-ka’é dité ca imbi.

² Latang te méu, weki serani agu ata nai ca anggit agu hi Kristus oné béndar Kolosé. Widang agu hambor-libur oné-mai Mori Keraéng, Ema dité, loréng méuy.

Wali Di’a Agu Ngaji

³ Ami toé hema bogm, wali di’a oné Mori Keraéng, Emad Mori dité Yésus Kristus, néténg-néténg ami ngaji latang te méu.

⁴ Ai ami poli dengé latang te imbi de méu oné hi Kristus Yésus agu latang te momang de méu kamping te sanggéd ata serani,

⁵ landing bengkes hitut poli mengkekn latang te méu éta Surga. Latang te bengkes hitu poli dengé olon le méu oné-mai curup molor ngong Keréba Di’a,

⁶ hitut poli wéwan oné méu. Keréba Di’a hitu wuay agu bekay oné temu tana lino, nggitu kolé oné bahi-réha méu, pu’ung kaut du dengén le méu agu baé tu'ung mantén widang de Mori Keraéng.

⁷ Sanggéd taung situ poli pecingd le méu oné-mai hi Épafras, haé-reba ata keturu laing ata momang lami. Hia hitut junggu agu ciri ata keturu di Kristus latang te méu.

⁸ Hia hitu kolé ata poli si’ang oné ami, momang de méu ali kuasa de Nai Nggeluk.

⁹ Landing hitu, pu’ung kaut du dengén lami, ami toé manga beténg ami ngaji latang te méu. Tegi lami te Nai Nggeluk widang méu ali sanggéd nggalas agu baé-paéln latang te pecing ngoéng de Mori Keraéng.

¹⁰ Ali hitu, mosé de méu naun olo mai ranga Diha agu henan oné nai Diha. Oné sanggén gori de méu, manga cir wua ata di'ad agu tambang beka pecings latang te Mori Keraéng.

¹¹ Nahé ali kuasa de Mori Keraéng hitut angos ketay, méu mberes te ta'ong kélo oné sanggéd cao-ca ali seber agu lembak,

¹² agu wali di’a oné hi Ema. Hi Ema hitu dé ata pandé naun méu kudut tiba maki ata poli wérét latang te sanggéd ata serani oné adakN hitut gérak.

¹³ Hia poli ledo ité oné-mai kuasa de nendep agu hésing ité nggere-oné Adak de Anak Diha hitut momang.

¹⁴ Le AnakN hitu pandé céla ite; betuan, ngong sangged ndékok dité poli taungs ampongd .

Lando Di Kristus

¹⁵ Hiay gambar de Mori Keraéng ata toé ita le matay, ata ngaso, céwé lando oné-mai sanggéd ata poli dédék.

¹⁶ Ai létang Hiay poli dédék sanggéd cao-ca ata manga éta Surga agu oné lino, ata ita le matad agu ata toé ita le matad, seriga ko tana perénta de raja, pemerénta ko ata cau kuasa, sanggén cao-ca dédék ali Hi Krsitus agu latang te Hia.

¹⁷ Be olo mai sanggéd cao-ca, polig mangan Hia, agu sanggéd cao-ca neki-cas oné Hia.

¹⁸ Hiay sa’i de weki, ngong ata serani. Hiay ata ngaso, ata laring cain to’o kolé oné-mai ata mata, wiga Hia muing ata céwé landon oné-mai sanggén cao-ca.

¹⁹ Ai sanggén taung besik de Mori Keraéng manga taungs oné weki de AnakN.

²⁰ Lut Hiay, Mori Keraéng pandé hambor sanggén cao-ca agu weki ruN, siot manga oné lino ko siot manga éta Surga, du Hia poli pandé hambor agu dara oné panggol di Kristus.

²¹ Méu kolé hiot danong mosé tadang oné-mai Mori Keraéng agu ciri ata bali Diham oné nais agu oné nuks cama ného hitut si’ang kéta ali pandé da’at de méu,

²² te ho’on pandé hambor Liha oné weki di Kristus ali mata Diha kudut méu ciri nggeluk agu toé manga celas oné ranga Diha.

²³ Landing hitu méu paka seber oné imbis, kong kis mberes agu toé gégom agu néka lorong le méu kudut hésing oné-mai bengkes de Keréba Di’a, hitut poli dengé de méu agu hitut poli keréban oné temu tana lino agu aku ho’o hi Paulus poli ciri ata keturu laing.

Gori Keturu Agu Susa Di Paulus

²⁴ Te ho’on aku nisang kéta naig, ai aku ngancéng ta’ong susa landing méu, agu pandé rapak oné weki daku apa ata géongd oné susa di Kristus latang te weki Diha, ngong weki serani.

²⁵ Aku poli ciri ata keturu latang te weki serani hitu lorong agu dis hitut téing de Mori Keraéng oné aku kudut keréba ruda oloy tombo Diha ali jepek tu’ung latang te méu,

²⁶ ngong pété ceha hitut cehep kin pulu liwag ata sinan, agu oné-mai waé ca haéng waé ca, maik te ho’on betas kétay agu sanggéd ro'éngN.

²⁷ Mori Keraéng ngoéng toi oné isé, leng kétay boran agu mengitn pété ceha hitu oné bahi-réha sanggéd wa’u: Ngong hi Kristus manga oné bahi-réha méuy, wiga méu bengkes te tiba mengit de Mori Keraéng

²⁸ Hi Kristus hitu dé ata keréba dami, émé toing lami sanggéd nggalas oné néténg ata, kudut titong néténg ata te ciri besik ali nai ca anggit agu hi Kristus.

²⁹ Hituy rébok agu tili-mpoét daku ali sanggén mberes, lorong agu mberesn kuasa di Kristus hitut gori oné aku.