IBRANI 6 - Bahasa Manggarai New Testament

¹ Landing hitu, mait ga, ledong musis raja pu’u situ te nggere-olo oné bekad toing ata céwé penong latang te hi Kristus. Ité kali ga, néka pu’ung kolé toing raja pu’u so’o: sanggéd pandé siot toé manga betuad, latang te imbi oné Mori Keraéng,

² ko toing latang te do tarad cebong le waé serani, témba limé lobo ata, to’o koléd ata mata agu wahéng tédéng lén.

³ Hitus ata paka pandés lité, émé sendo le Mori Keraéng.

⁴ Émé isét poli dé’it pandé gérak naid, poli manté tabing éta-mai Surga agu manté tiba lahé oné-mai Nai Nggeluk,

⁵ manté tiba reweng di’a oné-mai Mori Keraéng agu kuasa du leso nggere-olon tai,

⁶ maik ledong imbid, isé situ toé ngancéng pandé weru kolés kudut teser. Isé situ pandé panggol kolé Anak de Mori Keraéng latang te weki disé agu loér Hia oné ranga data do.

⁷ Ai tana hitut omet waé usang ata dondé cai bétan, wiga ngancéng cir todo po’ong situt manga betuad latang te isét gorid, tiba berkak oné-mai Mori Keraéng.

⁸ Maik émé cir rami karot agu remang karot, tana hitu toé manga betuan agu ruis te hena le wada wiga cemoln ga tapa taung oné apis.

Metek Oné Bengkes

⁹ Asé-ka’én, ata momang lami, koném po ami curup nenggitukm latang te méu, imbi lami te méu haéng paéng cao-ca ata céwé di’an ata ngancéng pandé selamak laing.

¹⁰ Mori Keraéng hitu agiln, wiga Hia toé hémong latang te gori de méu agu momang hitut toto de méu ali ngasang Diha, le gori keturu latangt asé-ka’é ca imbi, ného bebolon agu nggere-olon.

¹¹ Ngoéng dami kudut néténg-néténg méu néka ngondé holes agu néka mejeng hesé dengkir cemoln wiga méu toét-toé tibas apa ata bengkes de méu.

¹² Méu kali ga wingker koém, tunti isét ali imbid agu lembakd, mbaté sanggéd reké situ.

¹³ Du Mori Keraéng reké oné hi Abraham, Hia wada le ngasang de Run, ai toé manga ata céwé mésé kuasan oné-mai Hia.

¹⁴ Mai taén, “Aku téing berkak do kéta oné hau agu te pandé beka agu buar waé de hau.”

¹⁵ Hi Abraham géréng ali ngéngga-nai, ali hitu hia tiba apa ata poli reké le Mori Keraéng.

¹⁶ Manusia wada le ngasang de ata céwé mésé kuasan, wiga wada hitu pandé ndeng agu pandé cemol sanggéd léwang tau.

¹⁷ Landing hitu, Mori Keraéng waday du Hia ngoéng te si’ang tu’ung nggere-oné isét tiba mbaté reké Diha, te Hia toé célung kolé rekéN.

¹⁸ Wada agu reké de Mori Keraéng ho’o toé manga célung koléd. Hia toé manga nggopétN. Itét kawé mo’éng oné Mori Keraéng, téing Liha mberes kudut metek tu’ung oné bengkes hitut manga olo mai itéy.

¹⁹ Bengkes hitu cama ného manggar ata mberes agu meler latang te wakar dité. Bengkes hitu burut rinding Lo’ang nggeluk oné Mbaru de Mori Keraéng.

²⁰ Mori Yésus poli karong salang latangt ité nggere-oné osang nggeluk hitu, du Hia ciri Imam Mésé tédéng lén ného hi Melkisédék.