IBRANI 10 - Bahasa Manggarai New Testament

Takung Ata Patun

¹ Oné Adak Taurat hanang nénu kanang oné-mai sanggéd ata di’ad situt kudut mais, toé ba tara tu’ung. Adak Taurat toé ngancéng pandé besik laing isét mai ngaji, koném po hélang situt camas takung mtaungs lété ntaung.

² Ai émé sanggéd ata situt mai ngaji tu’ung-tu’ung poli koso ndékokd, isé kolé toég manga noing ndékok, wiga toé manga ba takung kolé.

³ Maik nonong ali sanggéd takung situ, lété ntaung pandé doing sanggéd ata, te isé manga ndékokd.

⁴ Ai toé le dara de japi laki ko dara de mbé laki ngancéng koso ndékok laings.

⁵ Landing hitu du hi Kristus mai oné linoy, nggo’o taéN agu Mori Keraéng: “Hélang agu takung toé tibas Lité -- ai Ité poli ambi weki Daku --.

⁶ Latang te hélang tapa agu hélang te ampong ndékok, toé patun Lité.

⁷ Itu kali mai taé Daku: “Ho’ok Aku caig Yo Mori, te pandé lorong ngoéng Dité, ného ata poli tulis latang te Aku oné Surak Nggeluk.”

⁸ Éta hio bao, taé li Kristus, “Hélang agu takung, hélang tapa agu hélang te koso ndékok toé patun agu toé kopn Lité”, – koném po takung lorong Adak Taurat.

⁹ Poli hitu mai kolé taéN, “Ho’ok Aku caig Yo Mori, te pandé lorong ngoéng Dité.” Jari, Mori Keraéng kosos takung manga, kudut cedeks takung weru.

¹⁰ Ai ali ngoéng di Kristus, ité poli pandé nggeluk cangkalin latang te tédéng lén, le takung weki de Run.

¹¹ Néténg imam Yahudi gori keturu lété leso agu pandé mtaung hélang ata camas. Sanggen taung situ, toé ngancéng koso ndékok laings.

¹² Maik du poli takung cangkalin kaut hélang léca, hituy kali ata ngancéng koso ndékok laing, hi Kristus lonto baling racap wanang de Mori Keraéng tédéng lén.

¹³ Te ho’on ga, hi Kristus géréng kaut rapak leson te na’a wa mai wa’i Diha taungs sanggéd ata baliN le Mori Keraéng.

¹⁴ Ai ali ca kaut hélang léca, hi Kristus poli besik tédéng lén sanggéd isét poli pandé nggélokd oné-mai ndékok.

¹⁵ Agu Nai Nggeluk kolé téing saka-si oné ité,

¹⁶ ali curupN: “Ho’oy reké ata kudut pandé Laku agu isé du leso nggere-olon.” Nenggo’o curup de Mori Keraéng: “Aku na’a Adak’G oné utek disé, agu tulis oné nai disé.

¹⁷ Aku toé nuk kolés sanggéd ndékok agu lagé disé.”

¹⁸ Jari, émé sanggéd ndékok agu lagé poli ampongd, toé sékékn kolé te takung hélang latang te ampong ndékok.

Toing Agu Langga

¹⁹ Jari, asé-ka’én, ali dara de Mori Yésus itét ho’on ga cukung te ngo oné Lo’ang Nggeluk Kéta.

²⁰ Mori Yésus poli céngka salang weru ata widang mosé latang te ité. Salang hitu lagé ca rinding, ngong weki Run Mori Yésus.

²¹ Ité te ho’on ga, manga cengata imam mésé ata ciri tu’an Mbaru de Mori Keraéng.

²² Landing hitu, mait ga ité ngo cumang Mori Keraéng ali molor nai agu metek imbi; ai nai dité poli pandé nggélokn oné-mai ici nai da’at agu weki dité poli cebong le waé gélon.

²³ Mait ga ité metek tu’ung oné tura latang te bengkes dité, ai Mori Keraéng toé manga reké adongN.

²⁴ Mait ga ité, kéngko taud te rani-nai agu racang rak oné momang ali pandé ata di’ad.

²⁵ Ité kali nai ca anggit te ngaji cama laing, néka ngondé holes ného pandé de pisa taus ata. Mait ga ité toing cama taud, ai pecing lité te leso de Mori Keraéng ruisn ga.

²⁶ Ai émé ité kunjung kéta pandé ndékok, kalim po ité poli pecing do keréba molor, ngong toé kéta manga kolé hélang te ngancéng koso ndékok situ.

²⁷ Ngot ata mangan kali, géréng kaut beté-bicar de Mori Keraéng agu dila haok kéta api rabon hitut ngkewang taungs sanggéd ata lawang Hia.

²⁸ Landing saka-si de sua ko telu tau ata, hia ata toé lorong Adak di Musa, wahéng mata muingy, toé manga ampongn.

²⁹ Nuk kaut, leng kéta mendon wahéng hitut paka tiba lata hitut wedi le wa’is Anak de Mori Keraéng. Hia pandé rinek dara hitut poli reké de Mori Keraéng, ngong dara di Kristus ata poli pandé nggeluk hia. Hia kolé poli loér Nai Nggeluk ata poli tabing widang!

³⁰ Ai ité pecing Hia hitut taé: “Léko hitu hak Daku. Akuy kali ata soléng léko.” Agu ho’o kolé taéN: “Mori te beté-bicar ro’éngn.”

³¹ Da’at kéta tu’ung émé wahéng le limé de Mori Keraéng hitut téing mosé.

³² Asé-ka’én, nuk de-di’a mosé de méu danong. Du hitu, du méu poli tiba géraks, do ngkalis méu tili-mboét oné ta’ong susa.

³³ Du méu loér latam agu ta’ong susa bolo-mai ranga data do, nggitu kolé méu lut ta’ong susa le ita isét loér latas.

³⁴ Bo tu’ung, méu poli lut oné ta’ong susa de sanggéd ata siot hena le wahéng. Du enggerep latas paéng de méu, tiba kauts le méu ali nisang nai, ai pecing le méu, te méu tiba paéng ceca ata céwé di’an agu céwé makengn.

³⁵ Landing hitu, metek kin imbis, ai mésén lahén hitut ngai géréng.

³⁶ Méu paka gepek, kudut méu ngancéng lorong wintuk de Mori Keraéng, wiga méu tiba apa ata poli reké Diha.

³⁷ Manga tulis oné Surak Nggeluk: “Ai ruisn ga, toég don sokor. Hia hitut mai te cai gi, toé manga renggé kolén.

³⁸ Maik ro’éng Daku situt molor, te mosé ali imbis. Émé manga ata hedong kolé, Aku toé henan latang te hia.”

³⁹ Ité ho’o toé ata hedong kolé ko ata wéléng, maik ata imbi agu tiba mosé.