ÉFÉSUS 5 - Bahasa Manggarai New Testament

Mosé Oné Gérak

¹ Méu anak ata momang de Mori Keraéng, landing hitu méu paka tunti koé toming de Mori Keraéng.

² Meu momang tau, ného hi Kristus Yésus poli momang méun. Hia poli condo wekiN latang te ité, cama ného takung hélang ata bengén wiga cembes nain Mori Keraéng.

³ Méu dé ro’éng de Mori Keraéng, landing hitu sanggéd pandé da’at ného ngoéng ata, pandé ata toé patun ko gomeng, toé kopn te manga oné bahi-réha méu ného ata naun latang te sanggéd weki serani.

⁴ Nenggitu kolé latang te curup da’at siot toé manga betuad, ko tombo siot mbere-mbapas – ai sanggéd situ toé kopd – ata céwé di’an étan reweng wali di’a kamping Mori Keraéng.

⁵ Nuk di’a-di’a: ata mbérong, ata réngkes, ko ata gomeng, betuan dé cama ného ata hiot io pina-naéng, toé ngancéng tiba lahén oné-mai adak di Kristus agu de Mori Keraéng.

⁶ Méu néka wéléng landing le curup data siot toé manga betuan, ai curup disé situ pandé siro rabo de Mori Keraéng.

⁷ Landing hitu, méu néka haé reba agu isém.

⁸ Bo tu’ung danong méu ka’éng oné nendepm, maik te ho’on méu ka’éng oné gérak de Mori Keraéng. Ali hitu, méu paka mosé ného anak de gérakm,

⁹ ai gérak hitu cir wua di’a, agil agu molor.

¹⁰ Mping koém gori ata henan oné Mori Keraéng.

¹¹ Néka lut le méu pandé oné nendep situt toé manga cir laingd, ata céwé di’an si’ang taungs le méu tombod pandé da’at situ.

¹² Ai koném po le caro kauts apa ata pandé disé oné osang pété ceha, ngancéng ritak laing.

¹³ Maik sanggéd cao-ca situt téa le géraks, te si’ang itad.

¹⁴ Itu tara mangan curup nenggo’o: “Welam ga, oé méut toko, agu to’om ga oné-mai ata mata, ai hi Kristus te pandé gérak méuy.”

¹⁵ Landing hitu, nuk di’a-di’a, riko koé ba wekis. Néka mosé ného ata bapa, maik mosé koé ného ata nggalas nai.

¹⁶ Papé di’a sokor ata manga oné méu, ai leso te ho’on ga, do kéta da’atd.

¹⁷ Landing hitu méu néka ného ata bodokm, maik di’a koé wuli-wekis kudut pecing ngoéng de Mori Keraéng.

¹⁸ Néka langum le anggor, ai anggor hitu pandé kéngko belek da’at, maik poro méu kali penong le Nai Nggeluk.

¹⁹ Papé le méu mazmur oné tombo cama taus, rengguk déré naring Mori Keraéng mai wa-mai nain.

²⁰ Wali di’as sanggéd cao-ca oné ngasang de Mori dité Yésus Kristus latang te naring Mori Keraéng Ema dité.

²¹ Jinggop koé ba weki cama taus ali junggu oné hi Kristus.

Momang Tau Wina-Rona

²² Oé méut ngasang wina! Lorong koé ronas ného lorong Mori Keraéng,

²³ ai rona hitu tu’a de wina cama ného hi Kristus tu’a data weki serani. Hia dé ata pandé selamak weki serani ného weki de Run.

²⁴ Landing hitu, ného weki serani lorong hi Kristus, nenggitu kolé wina paka lorong ronan oné ka’éng kilo.

²⁵ Oé méut ngasang rona! Momang koé winas ného hi Kristus poli momang agu poli téing wekiN latang te weki serani.

²⁶ Gori hitu di Kristus, kudut pandé nggélok weki serani le waé cebong serani agu le toingN, poli hitu podos Liha weki serani situ oné Mori Keraéng.

²⁷ Ali hitu, hi Kristus téing osang di’a latang te weki serani situ déméng angos, nggélok agu toé manga celad bolo-mai rangaN.

²⁸ Nenggitu kolé rona paka momang winan cama ného momang weki run.

²⁹ Céing ata momang winan, ngong momang weki run. Ai toé dé’it manga ata kodo weki run, maik tinu agu sapong liha cama ného hi Kristus sapong weki serani.

³⁰ Pecing hitu lité, ai ité nggota weki di Kristus.

³¹ Landing hitu, ata rona legong endé-eman kudut lut neki ca agu winan, wiga isét sua situ ciri ca wekis.

³² Curup ho’o délem betuan, ngong woé-joé di Kristus agu weki serani.

³³ Latang te sanggés taung méu: rona paka momang winan cama ného momang weki run, nenggitu kolé wina paka momang ronan.