ÉFÉSUS 1 - Bahasa Manggarai New Testament

Tabé

¹ Oné-mai aku, hi Paulus, rasul di Kristus Yésus lorong ngoéng de Mori Keraéng, latang te méu sanggéd weki serani ata imbi hi Kristus Yésus oné béndar Éfésus.

² Widang agu hambor-libur oné-mai Mori Keraéng, Ema dité, agu oné-mai Mori Yésus Kristus loréng méuy.

Bora Disét Poli Piléd

³ Naring ga Mori Keraéng, Emad Mori dité Yésus Kristus. Hia poli berkak itén le sanggéd widang nggeluk oné Surga, ai ité nai ca anggit agu hi Yésus Kristus.

⁴ Létang laing Hia, Mori Keraéng poli pilé ité be bolon dédék lino, kudut ciri nggeluk agu toé manga celad.

⁵ Ali momangN, sanggéd ité poli wérétd le Mori Keraéng te ciri anakN, pu’ung du wangkan lut hi Yésus Kristus, ai hitu muing ngoéng Diha.

⁶ Naring ga Mori Keraéng hitut mengit, ai létang laing le Anak MomangN, Hia momang tu’ung itéy.

⁷ Ai landing le mata di Kristus, ité célad le Mori Keraéng, ngong Hia poli ampongd sanggéd ndékok dité.

⁸ Pandé hitu Diha ai momang tu’ung itéy, agu momangN hitu pati do latangt ité oné sanggéd nggalas agu anor.

⁹ Lorong ngoéng de weki Run, Mori Keraéng poli si’ang oné ité latang te sanggéd situt pété ceha; lut nanéng agu lilekN. Poli wérétN Liha, nanéngN hitu te ciri jepeky lut hi Yésus Kristus.

¹⁰ Ho’oy nanéngN hitu: sanggéd caoca, éta Surga ko oné lino, nai ca anggit agu hi Yésus Kristus tu’ad sanggéd caoca.

¹¹ Mori Keraéng poli dédék sanggéd caoca lorong ngoéng agu wérét Weki Run. Pu'ung du wangkan, poli pilé ité Liha te ciri ro'engN ai nai ca anggit agu hi Kristus.

¹² Wiga ité ata laring cain kéta bengkes oné hi Kristus, naring Mori Keraéng landing mengit Diha.

¹³ Méu kolé ciri ro’éng Diham, ai méu poli dengé reweng molorN, ngong Keréba Di’a ata pandé selamak méu. Méu imbi oné Mori Yésus, landing hitu Mori Keraéng palas tarad le Nai Nggeluk hitut poli rekéN.

¹⁴ Nai Nggeluk hitu dé pa’arn mbaté dité dengkir agu tiban sambé, wiga ité ciri paéng de Mori Keraéng latang te naring mengit Diha.

Ngaji Di Paulus

¹⁵ Landing hitu, du poli dengén laku imbi de méu oné Mori Yésus agu momang de méu latang te sanggéd weki serani,

¹⁶ aku kolé toé ké’ét te téti wali di’a landing méu. Aku nuk mtaung méu oné ngajig.

¹⁷ Tegi kolé laku oné Mori dité Yésus Kristus, kudut Hia widang koé Nai Nggeluk te si’ang Mori Keraéng oné méu wiga méu pecing tu’ung Hiam.

¹⁸ Aku gesar oné Mori Keraéng, kudut Hia pandé gérak nais, kudut ngancéng idep apa ata deming laingn oné-mai Mori Keraéng hitut poli bénta méuN. Te baé kolé le méu, co’o kéta penongn berkak ata manikn hitut poli ambin le Mori Keraéng latang te sanggéd weki serani.

¹⁹ Lengn kolé mésén gori de Mori Keraéng ata penong kuasa oné weki dité ata imbi Hia. Kuasa de Mori Keraéng hitu cama ného kuasa hiot toé cung,

²⁰ hitut papé Liha du pandé to’o kolé hi Kristus oné-mai ata mataN agu téing osang baté lontoN oné racap wanang Diha éta Surga.

²¹ Kuasa di Kristus hitu céwé langkas oné-mai sanggéd pemerénta ata cau kuasa, ata cau adak agu ata tu’a laing, ko céing kaut ata ciri tu’a laing, toé hanang mosé oné uwa te ho’on, maik agu mosé nggere-olon kolé.

²² Mori Keraéng poli pandé kodad sanggéd cao-ca agu na’as be wa-mai wa’i di Kristus. Hia kolé téing hi Kristus oné weki serani te ciri Tu’a oné-mai sanggéd caoca.

²³ Weki serani situ ngong weki di Kristus, ata pandé jepek Liha te rapakd sanggéd cao-ca nia kaut wan.