TOMBO PÉTÉ GORI DE RASUL-RASUL 8 - Bahasa Manggarai New Testament

^1a Hi Saulus lorong kolé liha mbelé hi Stéfanus.

Hi Saulus Wahéng Taungs Ata Serani Oné Yérusalém

^1b Du hitu wangkag wahéng taungs weki serani oné Yérusalém. Sanggéd taung isé, pi-pot losid oné tana Yudéa agu Samaria, maik rasul-rasul toé gorid te losi.

² Sanggéd ata nggeluk boak rapu di Stéfanus agu rétang taungs.

³ Maik hi Saulus wuli kin te wahéng ata serani situ, agu hia ngo oné nété-néténg mbaru agu ndola nggere-pé’ang ata rona agu iné-waid agu téi isé kudut na’a oné buis.

Hi Pelipus Oné Tana Samaria

⁴ Isét mbihi-mbehar situ labok oné tana hitus cang agu wéro Keréba Di’ad.

⁵ Hi Pelipus ngo oné ca béndar oné tana Samaria agu tombo Mesias oné sanggén ata nitu.

⁶ Du dengén lata do situ tombo di Pelipus agu ita gantang situt pandé diha, sanggéd taung isé séngét tu’ung-tu’ung kéta apa kaut tombo diha.

⁷ Ai oné mai isét hena le jing da’at, pé’ang taungs jing da’at situ cang agu werés kétas agu dod kolé ata péko agu ata senggét ina taungs.

⁸ Landing hitu naka taungs sanggéd ata oné béndar hitu.

⁹ Oné béndar hitu manga cengata ngasangn hi Simon ata danong main ciri ata mbeko da’at, ata pandé lenget taung ata Samaria. Agu mékok néhot hia cengata ata mésé.

¹⁰ Sanggén ata, ata tu’a agu ata koé, lut hia agu mai taén: “Ata ho’o cau kuasa de Mori Keraéng ata caron Kuasa Mésé.”

¹¹ Isé lut hia, ai dondé bailn ga pandé lenget isé ali mbekon.

¹² Maik te ho’on isé imbi hi Pelipus hitut ba Keréba Di’a latang te Adak de Mori Keraéng agu latang te Mori Yésus Kristus agu cebong isé le waé serani, ata rona agu iné-wai.

¹³ Hi Simon kolé imbiy, agu du poli cebong le waé serani, hia cama-cama molé taung agu hi Pelipus agu lenget kolé hia, du itad liha gantang agu tanda lenget situt mésé.

¹⁴ Du dengé le rasul-rasul oné Yérusalém, te oné tana Samaria poli tiba reweng de Mori Keraéng, isé wuat hi Pétrus agu hi Yohanés ngo nitu.

¹⁵ Cai nitus, rasul situ sua, ngajis, kudut sanggéd ata Samaria situ tiba Nai Nggeluks.

¹⁶ Ai Nai Nggeluk toé di wa’u oné cengatan oné mai isé, ai isé hanang cebong oné ngasang de Mori Yésus.

¹⁷ Og kali isét sua situ témba liméd éta sa’i disé, itu kali tiba lisé Nai Nggeluk.

¹⁸ Du ita li Simon Nai Nggeluk hitu téi ali témba limé de rasul-rasul situ, hia awar isé ali téi séng,

¹⁹ agu mai taén: “Téing koé oné aku iwon kuasa hitu, kudut émé témba kolé limé daku éta sa’i data, hia kolé ngancéng tiba Nai Nggeluk.”

²⁰ Maik mai taé di Pétrus agu hia: “Nahé ampus kéta taung séngm situ cama agu hau, ai le nuk de hau, ngancéng le hau weli le séng nabit de Mori Keraéng.

²¹ Toé manga hakm hau oné bicar ho’o, ai naim toé helek oné ranga de Mori Keraéng.

²² Landing hitu, paka teser oné mai ndékokm ho’o, agu ngaji kamping Mori Keraéng, kudut ampong koé Liha nuk naim ho’o.

²³ Ai ita laku, nai de hau cama ného pesu hiot pa’it agu hena le serénté da’at.”

²⁴ Mai walé di Simon: “Ngaji koé kolé méu latang te aku oné ranga de Mori Keraéng, boto cai ruda oné akus sanggéd situt poli taéd le méu.”

²⁵ Du poli taung téi saka-si agu keréba reweng de Mori Keraéng, og kali koléd nggere-oné Yérusalém agu oné salang, isé tombo Keréba Di’a oné néténg-néténg béo tana Samaria.

Pegawé De Raja Étiopia

²⁶ Poli hitu taé le malékat de Mori Keraéng agu hi Pelipus: “Angkakh ga, agu ngo sili lut salang redu oné mai Yérusalém nggere-sili Gaza.” Salang hitu lingi-lengotn.

²⁷ Itug kali hesén agu ngon hi Pelipus. Manga cengata ata Étiopia, cengata pegawé de raja, ata mésé agu kepala ata nipu bora di Sri Kandaké raja iné-wai disét tana Étiopia ata ngo oné Yérusalém kudut ngaji.

²⁸ Ata hitu lari lako kudut koléy, agu lonto oné kerétan, lari kéta bacang surak di nabi Yésaya.

²⁹ Mai taé de Nai Nggeluk agu hi Pelipus: “Ngo nituh, agu lako ruis keréta hituh.”

³⁰ Gélang-gélang hi Pelipus ngo nitun, agu dengé liha pegawé de raja hitu lari kéta bacang surak di nabi Yésaya. Mai taé di Pelipus: “Pecing lité apa hitut bacang dité?”

³¹ Mai walén: “Co’o kong pecingn laku émé toé manga atan te toing aku?” Itu kali tegi liha te léti kerétan agu lonto baling mai hia.

³² Surak hitut bacang diha nenggo’oy: Cama ného jimbal aru kudut mbeléy, agu cama kolé ného anak jimbal dopel du rémé longké wulun, nenggitu kolé néng Hia, toé wuka mu’un.

³³ Hia rendak latay, agu toé pati-agil latang te Hia; céing weli ata tombon uku Diha? Ai mamurg nawan oné mai lino.”

³⁴ Mai taé de pegawé de raja hitu agu hi Pelipus: “Aku réi ité, ngong céing tombo de nabi ho’o? Tombo weki run ko tombo ata banay?”

³⁵ Itug kali pu’ung tombon hi Pelipus lorong oné mai surak hitu, ba Keréba Di’a de Mori Yésus latang te pegawé hitu.

³⁶ Isé lako rudas, dengkir cai oné ca osang ata manga waén. Mai taé de pegawé de raja hitu: “Lélo, nitu manga waé; manga kin do’ong latang te aku kudut cebong le waé serani?” [

³⁷ Walé li Pelipus: “Émé mai wa mai nain tu’ung imbi dité, ngancéng.” Mai walén: “Imbi laku te Mori Yésus Kristus hitu Anak de Mori Keraéng.”]

³⁸ Ata Étiopia hitu jera asi kerétan, agu isét sua wa’u ngo wa waés, hi Pelipus agu pegawé hitu, og kali cebongn hia li Pelipus.

³⁹ Du koléd wa mai waé, Nai Nggeluk dumuk dadé kaut hi Pelipus, wiga pegawé de raja hitu toé ita hian ga. Hia lako ruday déméng agu nisang nain.

⁴⁰ Kali hi Pelipus rodo manga kaut oné béndar Asdod. Hia liba tana hituy agu ba Keréba Di’a oné sanggén béndar dengkir agu cain oné Kaisaréa.