TOMBO PÉTÉ GORI DE RASUL-RASUL 18 - Bahasa Manggarai New Testament

Hi Paulus Oné Béndar Korintus

¹ Poli hitu hi Paulus legong Aténa, itu kali ngo oné Korintus.

² Nitu hia cumang agu cengata ata Yahudi ngasangn hi Akwila, ata oné mai Pontus. Hia, hitu di cain pé’ang mai Italia agu winan hi Priskila, ai Kaisér Klaudius poli perénta kudut sanggéd ata Yahudi paka pé’ang oné mai Roma. Hi Paulus cénggo oné mbaru disé.

³ Ai camas gori disé, itu tara hia ka’éng cama-cama agu isé. Isé cama-cama ata laséng pandé ndéi.

⁴ Néténg-néténg leso Sabat hi Paulus toing ata oné mbaru ngaji agu gejur pandé imbi sanggéd ata Yahudi agu ata Yunani.

⁵ Du hi Silas agu hi Timotéus mai oné mai tana Makédonia, hi Paulus wangkag ba keréba di’a agu téi saka-si oné ata Yahudi, te Mori Yésus hitu Mésias.

⁶ Maik du sanggéd ata situt dungkang agu loér hia, péntang liha kebok oné mai ceca pakén agu mai taén ngong isé: “Nahé dara rus bowo oné sa’i rus, aku nggélokg, toé manga salag. Pu’ung ho’o ga, aku kudut ngo oné wa’u-wa’u banak.”

⁷ Hia pé’ang nitu main, itu kali ngo oné mbaru di Titius Yustus, ata hiang Mori Keraéngy, agu mbaru diha cimping mbaru ngaji.

⁸ Maik hi Krispus, tu’an mbaru ngaji hitu, imbi oné Mori Yésus cama laing agu sanggéd haé mbarun agu do kolé ata Korintus situt dengé keréba di Paulus ciri imbis agu cebong le waé seranis.

⁹ Manga ca wié, mai taé de Mori Keraéng ngong hi Paulus oné urén: “Néka rantang! Ruda olo kin ba keréba di’a agu néka hema kaut!

¹⁰ Ai Aku loréng hauk agu toé manga cengatan ata cégong ko ongga hau, ai dod ro’éng Daku oné béndar ho’o.”

¹¹ Itug kali ka’éng nitun hi Paulus tédéng ca ntaung enem wulang agu hia toing reweng de Mori Keraéng oné bahi-réha isé.

¹² Maik du ciri Gubernur oné tana Akhayan hi Galio, sanggéd ata Yahudi cama-camas dungkang hi Paulus agu sorok hia oné ranga de adak.

¹³ Mai taé disé: “Hia ho’o toing ata kudut suju Mori Keraéng, maik toé hena taud agu Wintuk Taurat.”

¹⁴ Du kudut tombon hi Paulus, mai taé di Galion ngong sanggéd ata Yahudi situ: “Oé ata Yahudi, émé baro de méu campit lagé ko pandé da’at toét-toé tiba laku bicar de méu,

¹⁵ maik émé le léwang taud curup ko wau ngasang ko wintuk agama hitut manga oné bahi-réha méu, co’om le rus kaut cacan mbolot hitu; aku toé gorig te ciri adak latang te bicar nenggitu.”

¹⁶ Poli hitu, hia wéling isé pé’ang oné mai osang beté-bicar.

¹⁷ Itug kali isé ngo léok hi Sosténés, tu’a de mbaru ngaji, itu kali onggan lisé olo mai ranga de adak hitu, maik hi Galio toé pinga pandé disé situ.

Hi Paulus Kolé Nggere-oné Béndar Antiokhia

¹⁸ Hi Paulus ka’éng pisa lesoy oné béndar Korintus. Itug kali pele-kana oné asé-ka’é situt ca imbi nitu agu lajar nggere-oné Siria, du poli longké wukn oné Kéngkréa ai hia cemol radin ga. Hi Priskila agu hi Akwila cama-cama agu hia.

¹⁹ Itu kali caid isé oné béndar Efésus. Hi Paulus legong hi Priskila agu hi Akwila nitu. Hanang koén hia ngo oné mbaru ngaji agu tombo oné ata Yahudi.

²⁰ Tegi lisé agu hia kudut béhéng koé ka’éng cama agu isén nitu, maik toé gorin hia.

²¹ Hia pele-kana agu isé agu mai taén: “Aku te mai kolék cé’é méu, émé ngoéngn Mori Keraéng.” Itu kali kolén oné mai béndar Efésus.

²² Hia cai oné béndar Kaisaréa, agu du lako nggere-pé’ang tana masan, téi tabé oné sanggéd ata serani, itu kali ngon oné Antiokhia.

²³ Du remo béhéngn ka’éng nitun, ngo kolé hia, agu lako temu tana Galatia agu Frigia kudut pandé ndeng nai de sanggéd ata nungku.

Hi Apolos Oné Béndar Efésus

²⁴ Lari nggitun cai cengata ata Yahudi oné Éfésus, ngasangn hi Apolos, ata oné mai béndar Aléksandria. Hia cengata ata pecing curup agu pecing taung icin Surak Nggeluk.

²⁵ Hia poli tiba toing Salang de Mori Keraéng. Séméngak kétay woko tombo agu mbajik kéta toingn latang te Mori Yésus, maik hia hanang pecing cebong di Yohanés.

²⁶ Wangkag hia toing agu toé rantangy oné mbaru ngaji. Maik du dengé li Priskila agu hi Akwila, og dadén lisé nggere-oné mbarud agu mbajik kéta si’ang oné hia Salang de Mori Keraéng.

²⁷ Ai hi Apolos ngoéng te ngo oné Akhaya, asé-ka’é situt ca imbi oné Éfésus katu surak latang te ata nungku oné Akhaya, kudut tiba hia lisé. Du cain oné Akhaya, hia ciri ata deming laing latang te sanggéd ata imbi ali widang de Mori Keraéng.

²⁸ Ai ali séméngak hia koléng ata Yahudi wa ranga data do agu si’ang taung liha oné mai Surak Nggeluk te Mori Yésus hitu Mésias.