TOMBO PÉTÉ GORI DE RASUL-RASUL 14 - Bahasa Manggarai New Testament

¹ Oné Ikonium rasul situt sua, ngo oné mbaru ngaji data Yahudis, toing ata nitu, wiga do kéta ata ciri imbis, isét Yahudi agu isét Yunani.

² Maik ata Yahudi ata toé tiba keréba di’a disé, reku ata toé Yahudi kudut rabos lisé asé-ka’é situt ca imbis.

³ Hi Paulus agu hi Barnabas remo béhéng ka’éng nitud. Isé tombo ali rani nai latang te Mori Keraéng ata pandé mberes keréba latang te widang Diha ali téi oné isé kuasa latang te pandé gantang agu tanda lenget.

⁴ Maik ata do oné béndar hitu biké pati laing suas, manga ata cecupumai ata Yahudis, manga kolé ata cecupumai rasul-rasul situ.

⁵ Og kali pu’ungs isét toé Yahudi agu isét Yahudi cama-cama agu tu’a disé wuli wekid kudut ongga agu peké rasul-rasul situ le watu.

⁶ Woko pecing nenggitu, itus kali ngod rasul-rasul situ oné sanggéd béndar tana Likaonia: Listra, Dérbé agu tana situt baling mai.

⁷ Nitu kolés isé ba Keréba Di’a.

⁸ Oné Listra manga cengata ata rona, ngai lonto kin ai les taung wa’in agu péko pu’ung du loasn, agu toé kéta manga lako dé’itn.

⁹ Hia séngét hi Paulus hitut lari tombon. Lélo di’a-di’a li Paulus agu ita liha manga imbin agu ngancéng pandé inan.

¹⁰ Itu kali mai taé di Paulus: “Hesé cedekh ga!” Ata hitu hidi-hadan hesén agu pu’ung lako nggere-salé, nggere-awo.

¹¹ Du ita hesen ata péko hitu lata do, isé situ ciék oné curup disét Likaonia: “Dewa- dewa poli wa’u oné bahi-réha ité ba tara de manusia.”

¹² Hi Barnabas caro lisé hi Zéus, agu hi Paulus caro lisé hi Hérmés, ai hia ata tombon.

¹³ Itu kali main imam déwa Zéus, ata compangn be-pé’ang mai béndary, aru pisad japi laki agu ba wéla oné lewang béndar kudut te takung cama-cama agu ata do oné rasul-rasul situ.

¹⁴ Dengé hitu, rasul-rasul situ, hi Barnabas agu hi Paulus, pandé beté taung bajud, itu kali ngo oné bahi-réha lawa do situ agu mai taéd:

¹⁵ “Oé asé-ka’én, co’o tara pandé nenggitus méu?” Ami ho’o manusia bogm, cama ného méu. Tara manga cé’é ho’og ami, kudut ba Keréba Di’a latang te méu, kudut okés le méu pandé pina-naéng so’o agu holés nggere-oné Mori Keraéng hitut mosé, ata poli dédék awang agu lino, tacik agu sanggéd icin.

¹⁶ Médé Mori Keraéng sondang sanggéd wa’u lorong salang de rud,

¹⁷ maik Hia bom toé toto weki Run ali sanggéd pandé di’a, ali usang éta mai awang agu téing cekeng dani latang te méu ali mosé agu nombong raks.

¹⁸ Koném nenggitu taé de rasul-rasul situ, isé toé ngancéng pampang lawa do situ te ba takung oné isé.

¹⁹ Maik mais ata Yahudi oné mai Antiokhia agu Ikonium agu isé cocong lawa do situ wiga cecupu mai isés. Itu kali peké le watun lisé hi Paulus agu sorok nggere-pé’ang mai béndary, ai bet disé hia polig rowan.

²⁰ Maik du ata nungku situ hesé léok hias, to’o kolé hia, itu kali ngo kolé oné béndarn. Ného diangn ngo hia cama laing agu hi Barnabas nggere-oné Dérbé.

Kolé Nggere-oné Antiokhia

²¹ Hi Paulus agu hi Barnabas ba Keréba Di’a oné béndar hitu agu do kéta ata ciri ata nungku. Itu kali kolé nggere-oné Listra, Ikonium agu Antiokhia.

²² Oné osang situ isé pandé mberes imbi de ata nungku situ agu toing isé kudut harat nai oné imbi agu taé kolé lisé kudut ngo oné Adak de Mori Keraéng, ité paka cukung susa.

²³ Oné néténg-néténg weki serani situ, rasul-rasul situ wérét muing ata tu’a laingn latang te weki situ agu du poli ngaji agu puasa, téis lisé ata tu’a situ nggere-oné Mori Keraéng ai oné Hia isé imbid.

²⁴ Isé lako taung temu tana Pisidia agu cai oné Pamfilia.

²⁵ Nitu isé ba Keréba Di’a, oné Perga, poli hitu oné Atalia.

²⁶ Mai nitu maid, isé lajar nggere-oné Antiokhia; oné osang hitu danong isé tiba nabit de Mori Keraéng kudut pu’ung gori hitut poli lisé cemoln.

²⁷ Du caid nitu, isé bénta taung weki serani kudut nempung. Itu kali tombo taung sanggéd cao-ca situt pandé le Mori Keraéng lut isé, agu Hia poli céngka para latang te wa’u bana nggere-oné imbi.

²⁸ Nitu isé béhéng ka’éng cama-cama agu ata nungku situ.