TOMBO PÉTÉ GORI DE RASUL-RASUL 11 - Bahasa Manggarai New Testament

Hi Pétrus Papong Cebong Di Kornélius Oné Yérusalém

¹ Rasul-rasul agu sanggéd asé-ka’é situt ca imbis oné Yudéa dengé te uku bana kolé tiba reweng de Mori Keraéngs.

² Du cain hi Pétrus oné Yérusalém, sanggéd taung ata Yahudi ata poli imbi Mori Yésus, woléng tau nukd agu hia.

³ Mai taé disé: “Hau poli ngo oné mbaru data toé sunat agu hang cama-cama agu iséh.”

⁴ Maik hi Pétrus tombo si’ang kéta sanggéd cao-ca, pir ca-cas, mai taén:

⁵ “Aku lari ngajig oné béndar Yopé, rodo penong kaut déwa daku ali kuasa nggeluk agu aku urék: Manga ca ného towé ngéngga ata wéo oné patd bincungn, wa’u éta mai awangn haéng olo mai ranga daku.

⁶ Lélo di’a-di’a kéta laku, agu bonén ita laku, sanggéd kaka wa’i pat agu kaka mila agu kaka horos wa tana, agu kaka lélap.

⁷ Dengé kolé laku reweng ata curup agu aku: To’o ga Pétrus, mbelés agu hangs ga!

⁸ Maik mai taé daku: Toé o Mori, ai toé dé’it manté laku hang ata ireng agu rinek.

⁹ Maik latang te sua ngkalin, reweng éta mai Surga, taé agu aku: Apa ata kopn le Mori Keraéng, néka manga taé ireng kaut le hau!

¹⁰ Uré hitu telungkalin, poli hitu poto kolé taungs nggere-éta awang.

¹¹ Du hitu muing dumuk hesé ata telus olo mai mbaru baté ka’éng dami, isé mai cumang akus oné mai Kaisaréa.

¹² Mai taé de Nai Nggeluk agu aku: Ngo ga cama laing agu isé agu néka pandé woléng-woléngs le hau! Asé –ka’é daku situt enem-tau lut akus. Ami ocok oné mbaru data situkm,

¹³ agu hia tombo agu ami, co’o hia ita cengata malékat hesé oné mbarun agu taé oné hia: Jera ata, ngo oné Yopé kudut curu hi Simon ata te caron hi Pétrus.

¹⁴ Hia te ba keréba di’a latang te méu agu sanggéd haé mbarus te selamakm.

¹⁵ Du pu’ung tombog aku, wa’u éta mai Nai Nggeluk oné isé, cama ného oné ité danong.

¹⁶ Du hitu nuk kolé laku latang te curup de Mori Yésus: Hi Yohanés cebong ata le waé, maik méu te cebong le Nai Nggelukm.

¹⁷ Jari, émé Mori Keraéng téi nabit ata camas oné isé ného oné ité, du ité imbi oné Mori Yésus Kristus, wiga co’o laku ré’ingn Hia?”

¹⁸ Du dengén lisé tombo hitu, itus kali toé ngaokd, agu naring Mori Keraéngs, mai taéd: “Jari latang te wa’u bana kolé Mori Keraéng téing teser kudut titong nggere-oné mosé tédéng lén.”

Hi Barnabas Agu Hi Saulus Ngo Oné Antiokhia

¹⁹ Lari nggitun asé-ka’é ca imbi siot wécak ali pandé da’at hiot poli mbelé hi Stéfanus, losi haéng oné Fénisia, Siprus agu Antiokhia, maik isé wéro Injil oné ata Yahudi kanang.

²⁰ Maik oné mai isé manga pisa taus ata Siprus agu ata Kiréné ata poli imbid, cai oné Antiokhia agu tombo oné sanggéd ata curup Yunani agu keréba latang te Mori Yésus.

²¹ Kuasa de Mori Keraéng loréng iséy, wiga do kolé ata imbi agu holés nggere-oné Mori Keraéngs.

²² Keréba latang te isé situ dengé kolé le weki serani oné Yérusalém, itu kali weki serani situ wuat hi Barnabas ngo oné Antiokhia.

²³ Du cain hi Barnabas agu ita widang de Mori Keraéng latangt isé, nisang kéta nain. Hia toing isé, kudut sanggéd isé mai wa mai nain junggu oné Mori Keraéng,

²⁴ ai hi Barnabas cengata ata di’a, penong le Nai Nggeluk agu imbi. Wiga do kéta ata imbi Mori Keraéngs.

²⁵ Poli hitu ngo hi Barnabas oné Tarsus, kudut kawé hi Saulus, agu du poli cumang agu hia, dadé liha nggere-oné Antiokhia.

²⁶ Isé ka’éng cama-camas agu ata serani nitu tédéng ca ntaung, cang agu toing atas. Oné Antiokhia hitu laring cain caro lata, sanggéd ata nungku situ ata Kristén.

²⁷ Du hitu pisa taus nabi mai oné mai Yérusalém, ngo oné Antiokhia.

²⁸ Cengata oné mai isé ata ngasangn hi Agabus to’o ali kuasa de Nai Nggeluk, mai taé diha, oné temu tana lino te cai darem mésé. Jarin darem mésé hitu oné uwa di Klaudius.

²⁹ Og kali sanggéd ata nungku ca nais kudut katu campé disé lorong manga néténg weki agu katu lisé latang asé-ka’é situt ca imbi oné Yudéa.

³⁰ Campé disé situ katu oné sanggéd taung ata tu’a laing, lut hi Barnabas agu hi Saulus.