2 TIMOTÉUS 5 - Bahasa Manggarai New Testament

Latang Te Asé-ka’é Ca Imbi

¹ Hau néka kembe-lu’ak agu ata tu’a, maik ris di’a-di’a hia cama ného emay. Ris taungs ata uwa cama ného asé-ka’ém.

² Nenggitu kolé latang te ngasang endé ris cama ného endés agu ata molasd ris cama ného weta rum ali nggélok nai.

Latang Te Iné-wai Luang

³ Hiangs ga sanggéd iné-wai luang ata tu’ung-tu’ung mosé hanang koén.

⁴ Maik émé cengata ata luang, manga anakn ko manga empon, nahé isé situ laring cain kéta nungku gori dia-di’a latang te oné kilo rud, agu léko pandé di’a data tu’a agu lopo disé, ai hitu ata henan oné Mori Keraéng.

⁵ Maik cengata ata luang ata tu’ung-tu’ung mosé hanang koén, nahé bengkes koé kin oné Mori Keraéng agu seber koéy oné tegi agu ngaji wié-leson.

⁶ Maik ata luang hiot bora agu mbasa-saék mosén, hia polig matan koném po mosé kin.

⁷ Langga koé curup so’o kamping sanggéd ata luang situ, kudut isé néka manga cela moséd.

⁸ Maik émé manga ata toé tinu asé-ka’éd, apan kolé oné ca mbarus, ata hitu ata da’aty, ngot céwé da’at oné-mai ata toé imbi.

⁹ Ata luang siot poli tulis ngasangd, émé: ubu diha toé di haéng enempulu-ntaung, danong hia cay kali ronan.

¹⁰ Tandan, baé lata te hia iné-wai ata gauk di’ay, ného: aréng anak, dumpek oné mbarun, waca wa’i de asé-ka’é ca imbi, campé ata siot mosé oné susa – wokokn ga, iné-wai luang siot poli papé sanggéd sokor latang te pandé di’a.

¹¹ Néka tulis ngasang de iné-wai luang siot rémé uwad. Ai isé émé cangkalin kaut lut belek da’at, ngong isé ngoéng te kawing kolés agu bécang oné-mai hi Kristus.

¹² Wiga salas dé isé, ai isé pali rekéd agu Hi Kristus, ali hitu isé siro wahéng latang te weki rud.

¹³ Céwén kolé émé isé seber kétas te ngo léjong oné mbaru data. Da’atn ga, du rémé léjongd hitu, hitus kali pocu atad, cambu-lalét raja data agu tombo ata pété da’atd kanang.

¹⁴ Landing hitu ngoéng daku, kudut sanggéd iné-wai luang situt lari uwad, kawing kolés, manga anakd, wintuk kilod wiga ata bali dité toé manga sokor te pandé wau ngasang dité.

¹⁵ Ai manga pisa taus oné-mai iné-wai luang situ, polis wéléngd ali lut jing da’at.

¹⁶ Émé cengata ata rona ko iné-wai ata imbi, manga asé-ka’éd ata luang, poro hia campé iséy, wiga isé toé ciri mendo laing latang te weki serani. Ali hitu, weki serani ngancéng campé ata luang situt mosé hanang koed.

Toi Salang Agu Toing Kolé

¹⁷ Sanggéd ata tu’a de weki serani ata di’a wintukd, naun kéta te hiang suangkali mpalé, céwén kéta isét ata nai-koéd te toing agu te titong.

¹⁸ Ai taé de Surak Nggeluk, “Hau néka pungkut mu’u de japi hitut lari kalékn.” Agu manga kolé, “Cengata ata gori, naun te tiba lahén.”

¹⁹ Néka imbis le hau mangkong latang te cengata ata tu’a de weki serani, bo émé tukeng le sua ko telu tau ata saka-si.

²⁰ Isét pandé ndékok paka rondongs le hau olo-mai ranga data do, kudut rantang bod kolé ata iwod.

²¹ Oné ranga de Mori Keraéng agu oné ranga di Kristus Yésus lawang malékat-malékat situt pilé Diha, tu’u-tu’ung kéta pedéd laku: pinga di’as toing salang so’o, néka semet, poro agil oné pandé sanggéd cao-ca, toé manga kambé céi-céing.

²² Hau néka hidi-hada témba limém bétan hiat cengata, agu émé manga ata pandé ndékok, hau néka lut oné ndékok disé. Jerek koé wekim kudut nggélok kin naim.

²³ Néka kolé inung waé kanang, maik tambang koé cekoén le anggor, ai wekim dondé beti.

²⁴ Ndékok de pisa taus ata, du toé di bicar si’angs itad, maik ndékok data bana musi-mais di po pecing.

²⁵ Nenggitu kolé pandé di’a hitu, lampuk si’angn. Agu émé pandé situt toé emongd te lélo, pandé situ toé ngancéng ruda cehad.