2 TIMOTÉUS 4 - Bahasa Manggarai New Testament

Toing Hi Timotéus Latang Te Dungkang Tuang Guru Tangké

¹ Mori Keraéng Nai Nggeluk si’ang kéta curup’N, te nggere-olon tai mangas ata iwod toég imbi toing de Mori Yésus, maik lorong toing de guru tangké ata titong le jing da’at.

² Ici naid de guru tangke situ penong ali nggopét, ai poli tapa le beci kolang te wetik wekid, wiga toe gancéng woléngn lisé nia ata di’an agu nia ata da’atn.

³ Isé toing agu ré’ing ata néka kawing, néka hang hang ata dédék le Mori Keraéng, kali po hang situ dédék le Mori Keraéng kudut tiba agu wali di’a lata imbi oné hi Kristus agu poli pecing toing molor oné-mai Mori Keraéng.

⁴ Sanggéd taung situt dédék de Mori Keraéng di’ad, agu toé manga can ata te ireng laing, émé tiba agu wali di’as hang situ oné ngaji.

⁵ Ai ali berkak de Mori Keraéng agu ngaji, wiga hang situ toé manga ireng laingd.

⁶ Émé sanggéd situ toings le hau oné asé-ka’é ca imbi, hau te ciri ata keturu di Kristus Yésus ata di’a. Agu hau kole paka ambi wekim te pecing pu’ud imbi toing molor, situt poli lut le hau lawang ho’o.

⁷ Maik tadang koé oné-mai hau, sanggéd tombo io pina-naéng ata toe manga betuad. Nungku koé weki rum kudut ngaji lété bari.

⁸ Nungku te rai weki manga dopon ai cekoéy kali lahén, maik nungku te racang rak-rai ati do kéta betuan, ai mésé lahén latang mosé te ho’on agu latang te mosé tai.

⁹ Curup ho’o molorn, naun agu patun te imbi lité.

¹⁰ Itup tara ité ho’o mping agu tili-mpoét keta te racang rak-rai ati, ai ité bengkes oné Mori Keraéng hitut mosé. Hia dé ata pandé selamak sanggén manusia, céwén kéta isét imbi Hia.

¹¹ Kerébay agu toing ga, sanggéd taung situ.

¹² Néka manga cengatan ata hep hau, méséng kaut hau rémé uwam. Hau paka ciri toming laing le sanggén ata imbi, oné sanggéd curupm, ba wekim, toto momangm, junggum, agu oné nggelok naim.

¹³ Lari nggitun, dengkir caig aku cepisa, seber koéh te bacang Surak Nggeluk, agu wintas betuad oné isét sengét, toing agu titong kid isé.

¹⁴ Hau néka ngondé te papé tabing situt téing de Nai Nggeluk, du sanggéd tu’a de weki serani berkak agu témba liméd béta mai ulu de hau agu sanggéd nabi poli tombo pedé de Mori Keraéng latang te weki de hau.

¹⁵ Idep di’a-di’a taung situ, pandé tu’ungs le hau mai wa mai naim, wiga sanggén ata, te ita tambang kéta mésén imbi de hau.

¹⁶ Jerék koé ba wekim agu sanggéd toingm. Tejo koéh oné pandé sanggéd taung situ, ai ali hitu hau te selamak weki rum agu selamak ata séngét.