1 KORINTUS 8 - Bahasa Manggarai New Testament

Latang Te Takung Pina-Naéng

¹ Tombo ho’o, latang te nuru hiot takung kudut io pina-naéng. Bet data: “Sanggéd ité manga taung pecingd.” Pecing nenggitu pandé ata ciri mésé naiy, maik momang hitu te pandé di’a.

² Émé manga ata hiot le betn te hia manga “pecingn,” hia hitu toé di haéng pecing ata délemn.

³ Maik ata hiot momang Mori Keraéngy, hia hitu pecingy le Mori Keraéng.

⁴ Ngong hang nuru situt takung oné io pina-naéng, pecing lité: “Toé manga io pina-naéng oné lino ho’o agu toé manga Mori Keraéng bana, ai hanang ca kanangy kali Mori Keraéng.”

⁵ Bo manga apa situt carod “dewa” éta awang agu oné lino.

⁶ Maik latang te ité hanang manga ca kanangy kali Mori Keraéng, Hi Ema, ata dédékd sanggéd cao-ca. Latang te Hiat ité moséd. Agu ca kanang kali Morin ngong hi Yésus Kristus, ata lut Hia sanggéd cao-ca poli dédék agu landing le Hia, ité moséd.

⁷ Maik toé sanggén taung ata manga pecing nenggitud. Manga kid ata siot danong io pina-naéng. Teho’on noing lisé te nuru hitut takung latang te io pina-naéng, tu’ung kéta hang latang te io pina-naéng. Wiga émé hang lisé, noing lisé te isé pandé ndékok. Ai isé toé di mberes tu’ung imbid.

⁸ “Apa ata hang dité, toé ngancéng ba ité te céwé ruis agu Mori Keraéng. Toé manga rowak apa-apad, émé ité toé hang, agu toé manga ontong apa-apad émé ité hang.”

⁹ Maik jerék koé, kudut ba weki situt sara-nai, néka ciri watu timpok laing latang te isét les kin imbid.

¹⁰ Ai émé ita lata haut manga “pecingm”, hitu lari lonto hangm oné mbaru io pina-naéng, toé weli ata siot les imbid ného ata dur kaut kudut hang nuru hitut takung lata te io pina-naéng?

¹¹ Ali hitu, isé situt les imbid, ngong asé-ka’ém situt ca imbi, ciri ampus ali “pecingm”, hitu, kali po hi Kristus poli matan latang te isé kolé.

¹² Émé nenggitu hau pandé ndékokm kamping asé-ka’ém situt ca imbi, agu pandé réu nai disét les imbid, cetu’ungn hau pandé ndékok kamping hi Kristus.

¹³ Landing hitu, émé ali hang situ ciri watu timpok laing latang te asé-ka’ém situt ca imbi agu aku, aku toé gorig te hang nuru kolé dengkir tédéng lén, wiga aku toé ciri watu timpok laing latang te asé-ka’é situt ca imbi agu akus.