1 KORINTUS 5 - Bahasa Manggarai New Testament

Ndékok Oné Bahi-Réha Weki Serani

¹ Poli dengén laku, te manga ata inung toé nipu agu hang toé tanda oné bahi-réha méu. Ngot pandé nenggitu toé dé’it manga dumpun laku oné wa’u bana ata toé pecing Mori Keraéngs, te manga ata jurak agu wina de eman.

² Koném po nenggitu, méu mésé nai kis. Céwé di’an méu ngawa-ngaés agu mbérs ata situt pandé da’at oné-mai bahi-réha méud.

³ Ai aku koném po tadang oné-mai méu, maik naig ruis agu méu. Ali hitu aku manga oné bahi-réha méu kudut wahéng ata te pandé da’at hitu.

⁴ Émé impung kis méu, aku manga oné bahi-réha méu ali kuasa di Yésus, Mori dité,

⁵ ata hitut pandé da’at paka téing oné jing da’at le ngasang de Mori Yésus, wiga ampus taung wekin, maik wakarn ga pandé selamak du leso de Mori Keraéng.

⁶ Toé di’an mésé nai de méu hitu. Toé néng baé le méu ko, koném cekoén kaut ragi maik ngancéng pandé bombong taung roti?

⁷ Oké koés ragi manga situ, ngong ndékoks, wiga méu ciri hamol weru. Pecing laku te méu toé manga ndékoks. Ai anak jimbal Paska dité ngong hi Kristus, polig mbelén.

⁸ Landing hitu mai ga ité pandé ramé, toé ali ragi manga, ngong gauk da’at agu pandé da’at, maik ali roti ata toé manga ragin, ngong nggeluk agu molor.

⁹ Olo poli tulis laku latang te méu, kudut méu néka léjong agu ata situt pandé jurak.

¹⁰ Betuan daku, toé ngong sanggéd taung ata pandé jurak oné-mai lino ho’o, ko ata gomeng, ata nggopét ko agu ata io pina-naéng, ai émé nenggitu, méu paka legong lino ho’o.

¹¹ Betuan tulis daku hitu, kudut méu néka léjong agu ata situ, koném po carod asé-ka’é ca imbi, maik isé situ ata jurak, ata gopa, ata io pina-naéng, loér ata, ata langu agu ata nggopét, néka kéta manga hang cama agu ata nenggitu.

¹² Ai le kuasa apa aku ngancéng beté-bicar isé situt be pé’ang-mai weki serani? Toé weli méu paka pandé beté-bicar isét manga oné bahi-réha weki serani?

¹³ Isét manga be pé’ang mai weki serani kudut beté-bicar le Mori Keraéngs. Mbérs le méu ata situt pandé da’at oné-mai bahi-réha méu.