1 KORINTUS 16 - Bahasa Manggarai New Testament

Campé Latang Te Weki Serani Oné Yérusalém

¹ Émé réco séng kudut te sanggéd ata nggeluk, poro pandé le méu lorong agu toing daku latang te weki serani oné Galatia.

² Oné leso laring cain néténg minggu, nahé sanggés méu – téing lorong apa ata tiba de méu – cimpa koé cekoén, agu na’a, agu réco situ néka nongko du hitu di caig aku.

³ Du caig aku, aku te jera ata, atat patun le méu latang te hitu, ba agu surak te karongd nggere-oné Yérusalém kudut tombo téing de méu situ.

⁴ Émé sékék tu’ung paka ngo agu aku, itu po ngo cama agu akus.

Bet Di Paulus

⁵ Aku kudut mai oné méuk émé poli liba oné Makédonia, ai aku paka liba oné tana hituk.

⁶ Aram remo naisg aku te ka’éng cama agu méu oné Korintus, ko aram kudut ka’éng lawang cekeng cés, wiga méu ngancéng campé aku te ruda olon lako daku.

⁷ Ai aku toé ngoéng te lélo méu mbalep nggitu kaut. Bengkes daku kudut remo béhéng ka’éng agu méu, émé henan le Mori Keraéng.

⁸ Maik aku kudut ka’éng oné Éfésus dengkir leso adak Péntékostén,

⁹ ai manga kin linga latang te aku kudut pandés gori ata dai méséd agu mengit, koném po manga ata léwangn.

Pisa Tarad Tura

¹⁰ Émé cai hi Timotéus, anor di’a le méu kudut hia toé rantangy émé manga oné bahi-réha méu, ai hia pandé gori de Mori Keraéng cama ného akuy.

¹¹ Jari, néka manga ata oné-mai méu te rékéng jengge-li’o hia! Ata di’an campé hia, kudut hia ngancéng ruda olo lakon wiga selamaky, kudut hia mai koléy oné aku, ai aku cé’é ho’o géréng cai diha agu sanggéd asé-ka’é ca imbi situt iwod.

¹² Latang te asé-ka’é dité hi Apolos, dongkalin laku sorén kudut ngo la’at méu cama laing agu asé-ka’é ca imbi situt iwod, maik hia toé kéta kin gori te mai ho’o gi. Émé manga lingan cepisa, hia kudut maiy.

¹³ Jerék di’a-di’a! Metek koé imbis! Rani agu mberes koé nais!

¹⁴ Pandé sanggéd gori de méu le momang!

¹⁵ Manga ca kolé tegi daku agu méu asé-ka’én. Pecingp le méu hi Stéfanas, agu haé kilon, isé ata laring cain teser oné Akhaya, agu isé poli oké moséd ciri keturu latang te sanggéd ata nggeluk.

¹⁶ Landing hitu, lorong koé le méu ata nenggitu agu néténg ata siot lorong gori agu rébok do.

¹⁷ Aku naka kétak ali cai di Stéfanas, hi Fortunatus agu hi Akhaikus, ai isé luing manga ranga de méu.

¹⁸ Isé pandé ciar nai daku agu nai de méu. Hiang koé sanggéd ata nenggitu!

Tabé

¹⁹ Tabé latang te méu, de weki serani oné-mai Asia Koé, oné-mai hi Akwila, oné-mai hi Priskila, agu sanggéd ata serani oné mbaru disé téi tabé do oné ngasang de Mori Keraéng latang te méu.

²⁰ Tabé latang te méu, oné-mai sanggéd asé-ka’é ca imbi. Téi koé tabé oné ata iwod ali omo nggeluk.

²¹ Ali limé rug aku tulis surak ho’o: Tabé oné-mai hi Paulus.

²² Céing ata toé momang Mori Keraéng, nahé niury. Maranatha!

²³ Widang de Mori Yésus loréng méuy.

²⁴ Momang daku loréng sanggés méu oné hi Kristus Yésus.