Yuda 1 - NTSHOB NSI

Tsha'te

¹ Me Yuda, nkuan Yésu Kristô, mfèt Yakobo, me kite yen ṅwa'ni li à ben tse Nsi Tà kô yube, ben ts'a lé' yub num Yésu Kristô, ben ts'a tsiaṅ yub là.

² Kondèn, fite, mba nkôni be bin yàm yàme.

Ghatswite tse tatte

³ Fèt tshàm tse nkôni, mba me ke nànte neshu nekite bin num nu yôg be s'a b'a ntam nà, me lo yen ndù a bwô me kite bin, ndùlala ndù me tsiaṅ zin num ntsho bamntù, bamntù ben nelàn na' nkwé yoṅ ntshù' num njoṅ yoṅ tse fa là.

⁴ Nummbe tsemo' benntùn tsho netèt bin, bo lo à kite yub nevù ntsha fe ndùke lo, bo b'a ghakeghamte Nsi tse bo num mbagte kondèn Nsi be ntùm yôg ngùa, nke nga ta' tàndà be mba Tshùaben Yésu Kristô là.

⁵ Me kô nekwimte bin, bin tse bin à lèn njoṅ tshen tshu là fa là, ndù Tshùaben z'a yôg nzwil i, nsô i ntùm ngô Egipto là, lo bèn ngù ben tse bo ke' bam nà bite.

⁶ Mbe se' mba ba Angél tse bo be ke lé' yub dù' fa, là ngua' dù'ntswe yub là, a lé' yub ntùm nkù ts'a tswe yoṅ ntshù' là, ntùm njame, num netsho'te ntsha lé'njù ndùb.

⁷ Be ndaṅndaṅ, Sodom, Gomora, mba ngô ts'a be mbaṅ bo tse bo na' mfà wut tshob num kat mba bo, nèn njam mo' mbàb wut ghua là, tshen ngô li b'a mfi', bo b'a ntùm mbwôg z'a tswe yoṅ ntshù' là.

⁸ Be ndaṅndaṅ, tshen ben nà tse bo tsiag ntùm miaglo là, tshwèt nsagte mbàb wut, nke ngwag Tshùaben, mbèn nke ntshabte ba nkuni.

⁹ Mba Angél ze ndùb Mikaél lo ke bote tse Satan ntùm tshabte, ngelaṅ ze bo yi ke nta ntshu mbèn nke nsoṅ fe Mosé là, là, a lo tshob ndù: A bwô ndù Tshùaben tshobt'o!

¹⁰ Là tshen ben ni tshwèt ntshabte tshu tse bo ke' lèn nà, bo lèn nda' yôg mbàb wut mba ba nyàm tse bo ke' ghù zenu là, bo bagte wut tshob ntùm bwe.

¹¹ Nge' num bo! Bo zin num manze Kaïn, bo vù ntùm nefàn manze Balaam njam nkôni ntsho'fa', bo bi ntùm tatu Koré.

¹² Tshen ben ni b'a lo' ntùm ba jujù nkôni zine; bo num njù, mbèn nu bin à bo ke bwôg, bo num nkém wut tshob yub tu, bo b'a ndot ts'a ke' ghù ntse, ndot tse fetmbaṅ tshwèt ntèn yub là; bo b'a ntù mi a ke' ghù mfu mi, ke ghù ntàm mi, ntù mi a kwù yoṅ bàa, ntù mi bo tsho' yub là,

¹³ bo b'a fet dibantse tse neta, tse bo num nsô nswe tuswe yub là; bo b'a nsa mi bo fàn manze, nsa mi bo lé' njam nesènte bo yoṅ ntshù' là.

¹⁴ A num bo ze Hénok , mbatte mèn sammbàa fe num Adam, na' ntshob ntshob Nsi, ntshob ndù: Tshù, Tshùaben se' boa bwoṅ benntùn nelàne,

¹⁵ num netsho'te njoṅ benntùn fa, naṅ ntsha tu njoṅ ghakeghamt'é fa tse bo fa' mfa' kebwô ntùm yub nebe ke ghamte Nsi là.

¹⁶ Tshen ben ni num ntshobte tunntô, bo b'a ghatshabte, nke nzin ntùm ghe'te yub, ntshob ko'tewut dun ntshu bo, bo ke nyàmt'a mèn ze bo jù bin i là.

¹⁷ Fèt tshàm tse nkôni, là bin, bin kwimte tshu tse ghantum Tshùaben be Yésu Kristô bwôgmbwe ntshob là,

¹⁸ nummbe bo lo tshob bin ndù: A nsi be ngelaṅ mànjam, ghatshabte tume, nke nzin ntùm ghe'te yub, ntùm yub nebe ke ghamte Nsi.

¹⁹ Tshen ben nà b'a ghakag fagte, mbe ben nyiaṅtu, ke ghù Ywèle.

Ntage

²⁰ Fèt tshàm tse nkôni, là bin, bin kut wut tsin num bamntù zin ze nelàne, bin le'te Nsi ntùm Ywèt Nelàne,

²¹ bin ghô ntùm nkôni Nsi, nke mbéb kondèn Tshùaben be Yésu Kristô num yôg matmat.

²² Bin ko ndèn ben tse bo tshwèt magte là;

²³ bin yôg yube, nsô yub ntùm mbwôge; mbe se' mba tsemo' là, bin ko ndèn mub ntùm bwôg; bin ghù kebàn tà nkum num nzwe ze mbàb wut sagt'é là.

²⁴ Ghamte be mèn z'a ku'ni nebéb zin njoṅ nevù fa, ngù bin tsin mbwe nkuni mi, kelo', ntùm tsiaṅte là;

²⁵ ghamte neghu' ze ndùb, neta, ngù' be ta' Nsi ntshù' ngayôg be njam Yésu Kristô Tshùaben be, ghamte lo be yi, ghamte num yi, ghamte nsi be yi ngu'ngu'. Amén.