Yoshua 7 - NTSHOB NSI

Mfànnu Akan bo nge' ba Israél

¹ Mba ndùlala ba Israél fàn kàn num bu' se bo tam nà. Akan, nshum Karmi nshum Zabdi, nshum Zérak, ntùm tunndà Yuda yi tshu tse bo na' ntam bu' bwe là. Ndùlala yantù Tshùaben kam num ba Israél.

² Yoshua lo tum benntùn mbaṅ Aï z'a be mbaṅ Bét-Avèn, Bétél, nze bag ntumnyam nà. Yoshua tshob bo ndù: Bin ko' nèn ntsha' ngô. Tshen ben ni ko' nèn ntsha' Aï.

³ Bo bèn njam mbaṅ Yoshua, ntshob yi ndù: A ke' ywimte nelo' njoṅ benntùn fa nèn yi bwe. Nguan benntùn ntsha' bàa ke tat lo ku'ni nelo' yen ngô là. Kà kag bot num njoṅ benntùn fa, nummbe ben bo ntùm yen ngô là kag neshu.

⁴ Ndùlala nguan benntùn ntsha' tat tsho nze; là ben tse bo be Aï là kù,

⁵ bo bèn nzwite benntùn bo ntshob ntôg ṅam ntat; njoṅ yub neto' fe ntshu nsém tà nkum Shébarim, nkab mbu num bo dù' swe'swe'e. Ndùlala mbu ngô yub, fènntù mi ntù bo.

⁶ Yoshua fagte nzwe tse, nte nkekwi' mi nsi, ngwù nsi kabkab tà nèn nkum mfetnjù. A ghù ndùlal'a mbwe Koṅ Tshùaben, yi boa ghakwé mbwe ba Israél fa; bo lo' mbab nse' njoṅ tu yub yi fa.

⁷ Yoshua tsiaṅ Tshùaben Nsi ntshob ndù: O na' ngù yen nzwit mèn ni dut Yordan num nefà yag mum mbu ba Amor, bo biagte yag à numke? Ke z'a na' ngù bag ke ghô yen yoṅ ta'ntse din à?

⁸ Wé! Tshùaben, me nsi tshob à ndùke ndonni ze Israél kaṅ wul i mbwe ghakeban tse l'à?

⁹ Njoṅ ba Kanaan fa boa ba ntùm ngô nsi ju' yen nu là; bo a' lam yag mbume, mbiagte lén sag num nsitsha'a. A be ndùlala mb'o nsi ghù à ndùke num lén so se ndùb à?

¹⁰ Ndùlala Tshùaben tshob Yoshua ndù: Bù' wul o nsi. Numk'o ngwù nsi kabkab num tsha' ndùlal'à?

¹¹ Israél fàn nu num kàn se bag yi wat là. Bo lo' ju ze bo tam bu' bwe là, bo yi ju bwe, ndeme, bo yi ju bwe ndem ntùm tshu tshobe.

¹² A ndùlala, be ba Israél ke tshùa ghakeban tshobe; bo nsi kaṅ wut yub mbwe ghakeban tshobe, nummbe bo vù ntùm ntshù'. A be ze bin ke' sô mfànnu netèt bin nà, mba me ke nsi bèn be bag à bin.

¹³ Nèn ndànte ngô; tshob ngô lànte wul i ndamnjù. Nummbe tshù ju ze Tshùaben Nsi tshob Israél li: Israél, nefàn ntshù' num netèl o. B'o ke tshùa ghakeban tsho, a be z'o ke' yoṅ nsô mfànnu netèt bin nà.

¹⁴ Bin nsi se' ndamnjù, nzwit nzwit; nzwit ze Tshùaben nsi la'te là nsi se' tunndà tunndà; tunndà ze nu nsi kwag i là nsi se' ba' ba'; ba' ze Tshùaben nsi la'te là, ba ndà nsi se' ntshù' ntshù'.

¹⁵ Mèn ze nu kwag i là mba bo nsi ton i, yi boa tshu ts'a ghù là, nummb'a fàn kàn Tshùaben, mbèn ngù tshùaya'nu ntùm ngô Israél.

¹⁶ Njù lo làne, Yoshua ghù ngô se' nzwit nzwit, ndùlala nu vù tu nzwit Yuda.

¹⁷ Yen nà be tôg tse tunndà Yuda ghebte, nu vù tu tunndà Zérak. A ghù tunndà Zérak se' ba' ba', nu vù tu tunndà Zabdi;

¹⁸ benntùn ntùm yen ba' li se' ntshù' ntshù', nu vù tu Akan, nshum Karmi, nshum Zabdi, nshum Zérak ntùm nzwit Yuda.

¹⁹ Yoshua tshob yi ndù: Nshum àm, fà ghamte bo nyàmte Tshùaben; tshob nunenùn num ju z'o ghù là Tshùaben Nsi Israél. Kà lemt'é sàm ju.

²⁰ Akan bùnte Yoshua ndù: Ṅ, a b'a kua' me bèn ngù nukebwô num Tshùaben, Nsi Israél. Tshù ju ze me ghù li:

²¹ Me lo yen mo' kummbaṅ mebwô ntùm ntsha', lèn s'a fe Shinear là, boa ndô nkàb silba nkù bàa, ta' tu' gol nguan ndô nkàb ṅam ntàn. Me lo ghe'te tshen tshu là ndo'o. Me lem tshen tshu là ntùm tsha' tètndà àm netèt ntàb àm, silba b'a bam kummbaṅ.

²² Yoshua tum benntùn bo kù nde nèn ntùm ntàb; bo tèt tshu ndù bo tshoṅ nsi, silba be bam bwe.

²³ Bo lo' tshen tshu là nse' yi mbaṅ Yoshua boa njoṅ ba Israél fa, njabte mbwe Tshùaben.

²⁴ Ndùlala Yoshua lo' Akan nshum Zérak mbwe ba Israél boa silba, kummbaṅ, tu' gol, nshumnshum Akan, ngonngon tse, nyàmna' tse, kekwèn tse, mbwe tse, ntàb i mba zit ju lo z'a ghù là. A ghù njoṅ i fa ko' nèn tômbo' Akor.

²⁵ Yoshua tshob ndù: Numk'o ntshu' tu yag à? Tshùaben nsi tshu' tu o sènni. Njoṅ ba Israél fa tamt'é ndoṅ. Ndùse bo miagte netamte yub ndoṅ nà, bo ton yub mbwôge.

²⁶ Yen ni be tshùa bo bom mo' tse ndoṅ num Akan. Yen tse ndoṅ nà ke' tà nse' nkum sènni. A tshùa ndùlala yantù Tshùaben fite. A ndùlala lén yen dù' là b'a tômbo' Akor tà nse' nkum mba sènni.