Yoshua 5 - NTSHOB NSI

Nu nesi ket bon Israél Guilgal

¹ Ngelaṅ njoṅ fenfen Amor fa, tse bo be num bag Yordan z'a tshù mbinyam boa njoṅ fenfen Kanaan fa tse bo nze mà dibantse ju' ndù Tshùaben lo ghù ntse Yordan jum mbwe ba Israél tà nkum ndùse bo dut là, ntù yub tum, fènntù ke bèn mbe bo mbwe ba Israél.

² Ndùlala Tshùaben tshob Yoshua ndù: Lo' mfé ndoṅ mba mbi là, mbèn nsi ket ba Israél yi.

³ Yoshua lo' mfé ndoṅ mba mbi là, nsi ket ba Israél num kônga Aralot.

⁴ Tshù ju z'a ghù kà yen nu là mbe li: A lo se' num benntùn tse bo tum Egipto là, njoṅ bon bandum tse ndùbndùb fa lo kwùte manze, num kônkwa.

⁵ Là, a be njoṅ benntùn fa tse bo tum Egipto na' mbe ndù bo si ket sob là, mba bwoṅ i ze bo bwe yub kônkwa là lo ke si ket ndùse fe ndùse bo tume, nke' a nze là.

⁶ Ba Israél lo zin num kônkwa ngu'njù ṅam nkuà. Num yen ngelaṅ nà, njoṅ benntùn fa tse bo tum Egipto, ndù bo ku'ni ghama' ntsho là lo kwùte, nummbe bo lo be ghatatu, ke kô neju' nze Tshùaben. A ndùlala, Tshùaben lo tshob nsaṅlaṅ bwe ndù bo ke nsi yen yen ngô là z'a na' mbù tà tshob nefà bo là. Mbùn nyàm bo ṅwa'a be nswe' ntùm yen ngô là.

⁷ A lo' bon tshob mbate yub yi. A yen zwiaṅ benntùn ni ze Yoshua na' nsi ket sob là. Ngub lo ke' num ntshùa wut yub, nummbe bo lo ke yoṅ nsi ket sob ndùse bo ke' nke nkatte là.

⁸ Ndùse bo miagte nesi ket njoṅ benntùn fa là, bo tswe be ntùm mbàn tà nkum ndùse mfaṅ tùn nà.

⁹ Tshùaben tshob Yoshua ndù: Me bù' tuswe Egipto num bin sènni. Bo tsiaṅ yen dù' là ndù Guilgal, sen lén nà ke' tà nkum ndonni.

Mbwe Pasa mà Kanaan

¹⁰ Ba Israél te mbàn Guilgal, njù Pasa mfetnjù lé'njù ntshob kuà gham ntùm ṅwù, mà tômbo' Yériko.

¹¹ Njù làn mba Pasa tôg là, bo jù lèn tse tshu yen dù' là, njù bàn ke te ywibte se, mfèt miag tshu tse bo ka là.

¹² Bo jù lèn tse tshu yen dù' là, njù làn mana ke bèn nevù. Ndùlala ba Israél ke bèn neghù mana. Bo jù a tshu tse bo tèt Kanaan nà num yen ngu'njù là.

Tàndà ntsho Tshùaben

¹³ Ndùse Yoshua tsin mbaṅ Yériko là, a bù' miag mi nke ndôte, njen mo' mèn tsin mbwe i se se, ndù a tshùb ṅwi bu i. Yoshua kù' nèn mbaṅ i mbètt'é ndù: O b'a mo' yag mèn ké k'o b'a mo' ngakeban yag à?

¹⁴ Mèn nà bùnte ndù: Nga, me b'a tàndà ntsho Tshùaben, me se' à kua' ndonni. Yoshua kôg ngwù nsi, ngwù nsi kabkab num tsha' ntshob yi ndù: Ke ze tàfa' àm tshob ngafa' i m'à?

¹⁵ Tàndà ntsho Tshùaben tshob ndù: Sô nketo' nku mu, nummbe dù' z'o tsin bwe là b'a dù' nelàne. Yoshua ghù be kua' ndùlala.