Yoshua 4 - NTSHOB NSI

Ndoṅ ntshob bàa gham

¹ Tshùaben tshob Yoshua ndùse ngô dut Yordan nà ndù:

² Tsho' bandum ntshob bàa gham netèt ngô, ta' mèn nke ntum ntùm tunndà bon Israél tse ntshob bàa gham, tshob men ntshob li bo ndù:

³ Bin lo' ndoṅ ntshob bàa gham nsen ni, netèt Yordan, dù' ze ghale'te lo ntsin nà. Bin lo' men ndoṅ nà nèn yi, ntsho njab dù' ze bin zi là.

⁴ Yoshua tsiaṅ tshen bandum ntshob bàa gham ts'a tsho' yub netèt tunndà ntshob bàa gham nà.

⁵ A tshob bo ndù: Bin tshùa mbwe Koṅ Tshùaben Nsi zin, netèt ntse Yordan, mba we lo netèt bin yab ta' loṅ nkembe' i, num tu tunndà bon Israél ntshob bàa gham;

⁶ bin nsi lo' men ndoṅ nà kut ta' dù' yi netèt bin. A be z'a be mo' lé'njù bon tsin bètte zin mbagte ntun men ndoṅ nà là,

⁷ bin bùnte bo ndù: Ntse Yordan lo keb nkam mbàa mbwe Koṅ Kàn Tshùaben. Men ndoṅ ni b'a neke ndo' nkwimte yi ba Israél ndù ntse Yordan lo keb nkam mbàa kà bo ndule.

⁸ Ba Israél lo' ndoṅ ntshob bàa gham netèt Yordan ndaṅndaṅ mba Yoshua tshob là, ndaṅndaṅ mba Tshùaben na' ntshob Yoshua là. Bo ghù ndùlala num tu tunndà bon Israél ntshob bàa gham. Bo lo' men ndoṅ nà nèn njab dù' ze bo te mbàn bwe là.

⁹ Yoshua dù' ndoṅ ntshob bàa gham netèt Yordan, dù' ze nku ghale'te tse bo ket Koṅ Kàn be bwe là. Men ndoṅ nà ke' bwe tà nkum sènni.

¹⁰ Ghale'te tse bo ket Koṅ Kàn nà tswe netèt ntse Yordan tà nkum ndùse ngô na' mfa' njoṅ tshu fa tse Tshùaben na' ntshob Yoshua ndù bo ghù là. Bo ghù a ndaṅndaṅ mba Mosé na' ntshob là, nju' ntshu Yoshua. Ngô dut ntse kua' ndende.

¹¹ Ndùse njoṅ benntùn fa dut là, Koṅ Tshùaben boa ghale'te tse bo kel i là bèn ntshùa mbwe ngô.

¹² Bon Rubèn tse bandum, tse Gad bo kam tunndà Manasé lo dut ta'ntse ndù bo tshùb tshu ntsho, nèn mbwe Israél mba Mosé na' ntshob là.

¹³ Bo be nguan benntùn ntsha' ṅam nkuà, ndù bo nabte wut nele' ntsho. Bo zin mbwe Tshùaben nèn nze mà tômbo' Yériko.

¹⁴ Tshùaben bù'te Yoshua num miag njoṅ ba Israél fa num sen lé'njù là. Bo to' neke nju'ni Yoshua mba bo na' nju'ni Mosé num njoṅ yôg se fa là.

¹⁵ Tshùaben tshob Yoshua ndù:

¹⁶ Tshob ghale'te tse bo ket Koṅ kwénta là ndù bo tum ntùm Yordan.

¹⁷ Yoshua tshob bo ndù: Bin tum ntùm Yordan.

¹⁸ Ndùse ghale'te tse bo ket Koṅ Kàn yoṅ ntum ntùm ta'ntse kà nte ku yub njù, num tsha' njum nà, ntse Yordan bèn ntamte, nke ntèn nène, mb'a be mbwembwe là.

¹⁹ Ngô na' ntum ntùm Yordan a mum lé'njù gham ntùm mbwe maṅwù. Bo te mbàn Guilgal, num bag Yériko z'a tshù ntumnyam nà.

²⁰ Yoshua tete men ndoṅ ntshob bàa gham nà mi bo ket Yordan nà bwe.

²¹ A tshob ba Israél ndù: A be ze bon tsin bètte mbagte ntun men ndoṅ ni mo' lé'njù là,

²² mba bin nsi bùnte tshob bo ndù: Israél lo dut yen Yordan ni nku, ndù a jum;

²³ nummbe Tshùaben Nsi zin lo ghù ntse Yordan jum mbwe bin tà nkum ndùse bin dul i là. A b'a ju ze Tshùaben Nsi zin na' njà ghù num dibantse meba mi a na' njà ghù a jum mbwe bag tà nkum ndùse bag dul i là.

²⁴ Tshùaben na' nke nkô neghù a ndù ngôngô fa num nsitsha' lèn ndù bu i b'a ze neta, mba ndù tu wut tsin ke mbwôg Tshùaben Nsi zin njoṅ ndù fa.