Yoshua 3 - NTSHOB NSI

Bo dut Yordan

¹ Njù làn nkebnjù, Yoshua tsho' mbàn Sittim boa njoṅ bon Israél fa. Bo zin nkum mbaṅ Yordan, ntsin bwe kà njôg ndule.

² A be kum lé'njù tat ndù tàmànjô zinte ntùm mbàn,

³ nke ntshob men ntshob li ngô ndù: Ndùse bin yen Koṅ Kàn Tshùaben Nsi zin ndù ghale'te, ben Lévi ket là, bin tum mbàn zin, ntam njam bwe.

⁴ L'a bwô ndù kam manze z'a fagte zin mbaṅ Koṅ Kàn nà be nguan mbu ntsha' mbùm. Bin zete neghebte mbaṅ bwe. A nsi tshùa ndùlala bin ku'ni nelèn manze ze bin zin bwe là, nummbe bin ke' yoṅ nto' zin bwe.

⁵ Yoshua tshob ngô ndù: Bin sôg ndàne, nummbe Tshùaben nsi ghù tshu netshàm tôg netèt bin ndamnjù.

⁶ A tshob ghale'te tshob ndù: Bin ket Koṅ Kàn ntshùa mbwe ngô. Bo bù' Koṅ Kàn nsi, ntshùa mbwe.

⁷ Tshùaben tshob Yoshua ndù: Sènni m'a' to' nebù't'o num miag njoṅ bon Israél fa, ndùlala ndù bo lèn ndù bag wù nsi ke be mba bag Mosé na' nke mbe là.

⁸ Tshù ju z'o nsi tshob ghale'te tse bo ke nket Koṅ Kàn ni: Tshob bo ndù bo tsin ntùm ta'ntse ndùse bo nsi kum Yordan nà.

⁹ Ndùlala Yoshua tshob ba Israél ndù: Bin kù'te nse' nju' ntshob Tshùaben Nsi zin tshob là.

¹⁰ A bèn ntshob ndù: A nsi tshùa ndùlala bin lèn ndù Nsi z'a be ntùn nà num netèt bin, mba ndù a nsi yoṅ ba Kanaan, ba Hit, ba Hébéa, ba Férésia, ba Guirgasia, ba Amor boa ba Yébusia mbwe bin.

¹¹ Tshù, Koṅ Kàn Tshùaben njoṅ nsitsha' fa nsi dut Yordan mbwe bin.

¹² Bin tsho' bandum ntshob bàa gham ntùm tunndà bon Israél tse ntshob bàa gham.

¹³ Ndùse ghale'te nsi ket Koṅ Kàn Tshùaben, Tshùaben njoṅ nsitsha' fa là, kà te ku yub ntùm ntse Yordan nà, ntse mi a ta'ntse là nsi keb nkam mbàa, bù' te bag bag.

¹⁴ Ngô bote ntàb tshobe, ndut Yordan; ghale'te tse bo ket Koṅ Kàn nà kwé mbwe.

¹⁵ Ndùse ghaket Koṅ Kàn kum mbaṅ ta'ntse, ku ghale'te tshù' ntùm ntse là, ntse Yordan dun ntum num nkaṅntse num njoṅ ndùsàn fa.

¹⁶ Ntse mi a bù' nte bag bag là tam tu' se, kà bo nke ntsin ngùanesà, mbaṅ Adam nke njene. Adam b'a mbaṅ Sartan; ntse mi a ke nswe' nèn dibantse z'a mà tômbo' là, nze mà dibantse ngwa là, lo fiag num bwe kua' ndaṅndaṅ. Ngô diaṅ mbwe Yériko.

¹⁷ Ghale'te tse bo ket Koṅ Kàn Tshùaben nà tsin num tsha' njum dù' ntse kù ntùm Yordan nà. Israél nke ntôg ntùm Yordan dù' ntse keb nkam mbàa là. Bo ghù ndùlala tà nkum ndùse njoṅ benntùn fa dut nkum mo' yoṅ ntse là.