Yoshua 24 - NTSHOB NSI

Newat kàn Sikém

¹ Yoshua tsiaṅ njoṅ nzwit Israél fa Sikém, ntsiaṅ ghakwé mbwe, fenfen tse, ghasa'kam tse boa tse tàmànjô. Bo se' mbwe Nsi.

² Yoshua tshob ngô fa ndù: Tshù ju ze Tshùaben Nsi Israél tshob li: A lo be mbwe, tà tsine, Térak, tà Abraham bo Nakor, nke ntswe yoṅ ta'ntse, nke mfa' tsemo' nsi.

³ Me lo lo' tà zin Abraham mo' yoṅ ta'ntse, ngù a zinte ntùm ngô Kanaan fa; me ghù nzwil i yàm, mfà Isak yi.

⁴ Me lo fà Yakob bo Esau Isak, mfà mbat Seir Esau mba tse tsha' là, là ngù Yakob boa bon tse swe' nèn mà Egipto.

⁵ Me lo tum Mosé bo Aron bo, ntshùa njam nu netshàm tse me ghù netèt bwe là, ndab Egipto, ndo' zin ntum yi bwe.

⁶ Me lo ghù tà tsin tum Egipto, bin zin nkum dibantse. Ba Egipto lo lo' nkalig boa nyàmdiaṅ njoṅ tà tsin yi tà nkum dibantse meba.

⁷ Tà tsin lo kua' ntsiaṅ Tshùaben. Tshùaben lo kag njam netèt bin bin à ba Egipto, ndo' dibantse nse' yi num bo, nkabte yub yi. Miag min lo yen ju ze me na' ngù num ba Egipto là. Bin lo tswe kônkwa yàme.

⁸ Me lo lo' zin nèn yi ntùm ngô Amor z'a be mo' yoṅ nà, ben bo ke ntswe bwe là ma' zin ntsho. Me lo fà yub mum mbu mine, mbiagte yub mbwe bin, bin lo' ngô yube.

⁹ Balak nshum Tsipor, mfen Moab, lo nsi ma' Israél ntsho. A tum bo tsiaṅ Balaam nshum Béor ndù a se' nso ndon tu bin.

¹⁰ Là, me lo ke ju' ju ze Balaam tshob là, ndùlal'a tam ntse bin, tu wul àm tshu' zin bu Balak.

¹¹ Bin lo dut Yordan, nzin nkum Yériko. Ba Yériko lo ma' zin ntsho, ba Amor, ba Kanaan, ba Hétia, ba Guirgasia, ba Hévia boa ba Yébusia ma' zin ntsho. Me lo fà yub mum mbu mine.

¹² Me lo tum makùakoṅ mbwe bin, ndù bo ta' yub ntshag ngùanesà num miag mine, mba bo na' nta' fenfen Amor bàa là. Ṅwi o, ke két so lo, lo ke ghù mo' ju bwe.

¹³ Me lo fà ngô ze bin na' mbe ke bèn ndù' là bin, mfà ntusô mi bin tswe bwe ke be ndù bin bèn nkut là, mfà nkùa boa ntshom mi bin ke' bèn mbwe là bin num jujù zine.

¹⁴ Ndonni a bwô ndù bin bwôg Tshùaben, mfa' yi ke tshù njam, njoṅ ngô ntù zin fa. Bin sô njoṅ nsi fa tse tà tsin na' nke mfa' bo mo' yoṅ ta'ntse, mba Egipto là. Bin ke mfa' Tshùaben.

¹⁵ Là, sènni a bwô bin tsho' mèn ze bin kô neke mfa' yi là, a be ze neke mfa' Tshùaben bag zin nà: K'a b'a nsi tse tà tsin ke mfa' bo yoṅ ta'ntse, k'a b'a nsi ba Amor tse bin tshwèt ntswe ntùm ngô yub lo. Bin yôg ndèn ndù me bag tunndà àm nsi ke fa' yag à Tshùaben.

Nka'ni tunndà Israél

¹⁶ Ngô bùnte ndù: Nkwate neghua' Tshùaben mfa' tsemo' nsi tsin ngùanesà mbaṅ bag.

¹⁷ Tshùaben Nsi yag b'a mèn z'a na' ngù bag ko' ndà kuan mà Egipto bag à tà tshag là. Tu wul i lo ghù nu netshàm tse nekuni num miag mage, a bèn mbéb yag num manze ze nesag ze bag na' nzin bwe, netèt tshen ngôngô tse bag tôg netèt bo là.

¹⁸ Tshùaben lo yoṅ tshen ngô là mbwe bag, njoṅ mba ba Amor tse bo ke ntswe ntùm ngô là. Mba bag yag nsi fa' Tshùaben, nummb'a b'a Nsi yag.

¹⁹ Yoshua tshob ngô ndù: Be bin ke ku'ni nefa' Tshùaben, nummb'a b'a Nsi Nelàne, mbe Nsi lànghe'e, mbe ndù a ke nsi lagte tsin tatu ke nukebwô tsin no.

²⁰ A be ze bin tam i mvèn zin, mfa' tsemo' nsi là, mb'a nsi tam zin mvèn i, ghù nukebwô num bin, biagte zine, mba mb'a ghù numebwô num bin nà.

²¹ Ngô bùnte ndù: Nga, a b'a Tshùaben ze bag kô nefa' yi là.

²² Yoshua tshob bo ndù: Bin b'a ghakwénta tu wut tsin ndù bin tsho' a Tshùaben neke mfa' yi. Bo bùnte ndù: Bag be tshag a ghakwénta yen nu là.

²³ Yoshua tshob bo ndù: Ndonni a bwô ndù bin sô nsi ba tum tse bo netèt bin nà, mfà ntù tsin Tshùaben Nsi Israél.

²⁴ Ngô bùnte Yoshua ndù: Bag nsi fa' Tshùaben nsi yag, ke ju' ntshu i.

²⁵ A tshùa ndùlala, Yoshua wat kàn bo ngô num sen lé'njù là, mfà ntshù' yi boa ntag Sikém.

²⁶ Yoshua kite njoṅ i fa ntùm ṅwa'ni ntshù' Nsi. Yen nà be tôg a lo' ta' loṅ ndùb nte bwe, tun tshalon s'a be mbwe' Tshùaben nà.

²⁷ Yoshua tshob ngô ndù: Tshù, sen loṅ ni b'a ngakwénta num be, nummb'a ju' njoṅ ntshob fa mi Tshùaben tshob be là; a nsi be ngakwénta num bin, ndù kà bin kag ku Nsi zin.

²⁸ Ndùlala Yoshua lé'te ngô, mba we lo bèn njam num tse tsha'.

Yoshua kwù

²⁹ Yoshua nshum Nun, ngafa' Tshùaben lo be kwù, ndù a ghù ngu'njù mén mbùm nkù.

³⁰ Bo tshoṅ i ntùm tse tsha' tse bo fà yi là, Timnat-Sérak num mbat Efraim, num bag mbat Gash z'a tu là.

³¹ Israél lo ke mfa' Tshùaben ndùse Yoshua ke' ntùn nà mba ndùse tsentshu tse bo lèn njoṅ nu fa tse Tshùaben na' ngù num Israél ke' ntùn nà.

³² Bo tshoṅ mba mvôg Yosèf mi ba Israél lo' nko' yi Egipto là Sikém; bo yab mvôg Yosèf a ntùm kam tsha' ze Yakob na' njun bon Hamor, tà Sikém ndô nkàb nkù là. Tshen tsha' là lo tù' ze ju bon Yosèf.

³³ Eléazar nshum Aron kwù, bo tshoṅ i Guibéa-Finéas, ze bo na' mfà bon Finéas, num mbat Efraim nà.