Yoshua 20 - NTSHOB NSI

Ntusô ndàlem ntôge

¹ Tshùaben tshob Yoshua ndù:

² Tshob bon Israél ndù bo lé' ntusô ndàlem, mba me na' ntshob Mosé ndù a tshob bo là.

³ Mèn z'a be zwi mèn ke bèn nkô là nsi ke kù nèn lem bwe. Men ntusô là nsi be ndàlem mèn ze bo tshwèt nkô neyagte mba' num i là.

⁴ Ngazwi mèn nsi kù nèn ntùm ta' tusô netèt men nà. Ndùs'a kum bwe là, a tshob ze nu kam sen tusô là num nsém dù' z'a nsi kum bwe tsin nà. Bo nsi lo' i mbaṅ bo ntùm tusô, fà dù'ntswe ndù a ke ntswe bwe netèt bo.

⁵ A be ze ngayagte mba' bwe i nkum bwe là, mba bo ke nsi fà ngazwi mèn mum mbu mi. Nummb'a be zwi mfèl i, yen nà ke ko' a ntù i, ke be ndù bo yi lo ke mbane.

⁶ A nsi tswe ntùm sen tusô là, tà nkum ndùse bo tsho't'é mbwe mbumte là, tà nkum ndùse ngale'te ze ndùb z'a be num fa' yen ngelaṅ nà nsi kwù là. A yen ngelaṅ nà ze ngazwi mèn nsi bèn njam la' i, ntùm se tusô dù' z'a tum bwe nkù là.

⁷ Ndùlala bo yab men ntusô li njam: Kédesh z'a Galiléa, num mbat Néftali là; Sikém z'a num mbat Efraim nà; Kiriat-Araba z'a b'a Hébron num mbat Yuda là;

⁸ bo nèn mo' yoṅ Yordan num bag Yériko z'a ntumnyam nà, ndo' Betser num kônkwa, ntùm tômbo'o, ntùm nzwit Rubèn; Ramot z'a Galad, ntùm nzwit Gad là; Golan z'a Basan, ntùm nzwit Manasé là.

⁹ Men ni b'a ntusô mi bo na' ntsho' njab njam num njoṅ bon Israél fa bo ngùn z'a tshwèt ntswe netèt bo là. Yen nà b'a dù' ze mèn be zwi mfèl i ke be ndù a ko' a ntù i, mb'a nsi kù lem bwe, ke yoṅ nkwù ze mum mbu ngayagte mba' là. Nummb'a bwô bo bwôgmbwe ntsho't'é mbwe mbumte nkane.