Yoshua 18 - NTSHOB NSI

Mba bo ghabte tsha' ts'a tù' tunndà sammbàa là

¹ Njoṅ mbumte bon Israél fa tse'te Silo, nte ntàb ntse'te bwe; ngô lo ke bù' tu nsi mbwe bo.

² Là, tshé' nzwit bon Israél lo tù' sammbàa, tse bo na' mbe ke yoṅ mfà tshob tsha' là.

³ Ndùlala Yoshua tshob bon Israél ndù: Bin nsi ke bébe, ke lo' ngô ze Tshùaben Nsi tà tsin na' mfà bin nà tà kum à ndùke?

⁴ Bin tsho' ben tat mba ntùm zit nzwit lo, m'a' tum yub bo nèn nzinte ntùm ngô; bo nsi lo' netshaṅ ngô, mb'a be bo lo' ngabte ngô yi là, bèn bèn njam mbaṅ àm.

⁵ Bo nsi ghabte ngô nkam sammbàa, nummbe ze dù' Yuda z'a ntèn nà ghô yi, tunndà Yosèf bèn ngô bo ze dù' z'a tu là.

⁶ Ndùlala bin nsi be lo' netshaṅ ngô ke te ndùnsi tshen tsha' sammbàa là. Ndùse bin miagte là, bin se' mfà me, me tam tô bin bwe mbwe Tshùaben Nsi be.

⁷ Tse ben Lévi ke nsi ghù yub bag i netèt bin, nummbe fa' Tshùaben bèn mbe yub bag i. Mbe se' mba Gad, Rubèn bo kam nzwit Manasé là, bo lo yà kwé yub bag i yoṅ Yordan, ntumnyam, yub bag i ze Mosé ngafa' Tshùaben na' mfà bo là.

⁸ Ndùse tshen ben ni tam nze nenèn lo' netshaṅ ngô là, Yoshua tshob men ntshob li bo ndù: Bin nèn nzinte ntùm ngô, ndo' netshaṅ i, mbèn mbèn njam mbaṅ àm; tu wul àm nsi tam tô bin bwe mbwe Tshùaben, Silo.

⁹ Tshen ben ni nèn, nzinte ntùm ngô, ndo' netshaṅ ngô, ngù tsha' num bwe nkam sammbàa ndaṅndaṅ mba ntusô lo' mbe yi là ntùm ta' bu' ṅwa'ni; bo bèn njam mbaṅ Yoshua Silo, ntùm mbàn.

¹⁰ Yoshua tam tô bo bwe Silo, mbwe Tshùaben; ngabte ngô netèt bon Israél, mfà mba ze kam we lo.

¹¹ Tô bwôg jù num nzwit Benjamin, ndaṅndaṅ mba tse tunndà be yi là, mfà ngô z'a be netèt bon Yuda bo tse Yosèf là yi.

¹² Yub ndùnsi tu ke nto' a Yordan, nko' nèn num dù' ko'ko' ts'a Yériko là, nko' ndùlala nkum num mbat z'a mbinyam nà, nèn nkum kônkwa Bét-Avèn.

¹³ Ndo bwe ntôg ntèn dù' swe'swe' Luz z'a be Bétél là, ndùnsi na' nke nswe' a Atarot-Addar nèn nkum num mbat z'a be ntèn, mbaṅ Bét-Horon z'a mà tun nà.

¹⁴ Ndùnsi z'a mbinyam lo ke nèn ndiaṅ ntèn, neto' num mbat z'a se Bét-Horon nà, nèn nkum ntèn, nèn nte tu i Kiriat-Baal z'a be Kiriat-Jearim nà; yen nà b'a tusô bon Yuda. Yen nà na' mb'a bag mbinyam.

¹⁵ Bag i z'a ntèn nà ke nto' à tôg Kirjat-Jearim. Ndùnsi lo ke nèn nze mbinyam tà nkum ntshu ntse Neftoash.

¹⁶ Ndùnsi lo ke nswe' tôg mbat z'a be se tômbo' Ben-Hinnom nà, nèn nkum tômbo' Refaim z'a tu là. A lo ke nswe' tômbo' Hinnom, num bag i z'a be ntèn Yébusia là tà nèn nkum En-Roguel.

¹⁷ Ndùnsi lo ke nèn nze tu nkum En-Shemesh, mbèn nkum Guelilot z'a be se dù' ko'ko' Adummim nà; ndo bwe nswe' nkum num loṅ Bohan, nshum Rubèn.

¹⁸ Ndùnsi ke ntshùa bag tu, mbwe Araba,

¹⁹ ndo Araba nswe' ndiaṅ nze bag Bét-Hogla z'a tu là, nèn ndùlala nsob tu i num ku dibantse ngwa z'a tu, mbwe Araba là, yen nà b'a mbumte Yordan mà ntèn. Tshùa ndùnsi z'a ntèn nà.

²⁰ Tshù, Yordan na' mbèn mbe ndùnsi ntumnyam. Tshù mba mi ntsi' bon Benjamin be là, ndaṅndaṅ mba tshob tunndà be là, boa tshob ndùnsi bag bag.

²¹ Tshù ndèn ntusô nzwit bon Benjamin ndaṅndaṅ mba tshob tunndà be li: Yériko, Bét-Hogla, Emok-Kotsits,

²² Bét-Araba, Tsémaraim, Bétél,

²³ Avim, Para, Ofra,

²⁴ Kefar-Ammonaï, Ofni bo Guéba; njoṅ i fa ntusô ntshob bàa gham boa ntaṅla' mube.

²⁵ Gabaon, Rama, Béerot,

²⁶ Mitspé, Kéfira, Motsa,

²⁷ Rékem, Yirpéel, Taréala,

²⁸ Tséla, Elef, Yébus z'a be Yérusalém nà, Guibéa, bo Kiriat; njoṅ i fa ntusô ntshob kuà gham boa ntaṅla' mube. Tshù mi ntsi' bon Benjamin nà, ndaṅndaṅ mba tshob tunndà be là.