Yoshua 17 - NTSHOB NSI

Tsha' tse bo fà nzwit Manasé là

¹ Bo tam tô num ze bag tsha' nzwit Manasé, nummb'a na' mb'a tuswe Yosèf. Mbe se' mba Makir, tuswe Manasé, tà Galad là, bo fà ngô Galad bo Basan yi, nummb'a na' mb'a ngama' ntsho.

² Bo fà mba ze bag tsha' tsemo' bon Manasé ndaṅndaṅ mba tshob tunndà be là. Bo fà tse tsha' bon Abiézer, tse bon Hélék, tse Asriél, tse Sikém, tse Héber, tse Shémida. Tshen ni b'a bon Manasé tse bandum, ndaṅndaṅ mba tshob tunndà be là. Manasé b'a nshum Yosèf.

³ Tselofshad nshum Héfer, nshum Galad, nshum Makir, nshum Manasé lo ke ghù mén mandum; l'a lo ghù bon bènnzwi. Tshù ndèn mub li: Makla, Noa, Hogla, Milka bo Tirsa.

⁴ Bo nèn mbwe Eléazar, ngale'te, nèn mbwe Yoshua nshum Nun mba mbwe kamkam ntshob ndù: Tshùaben lo tshob Mosé ndù a fà mag ntsi' netèt fèt tshage. Bo fà mub ntsi' netèt fèt tà yub ndaṅndaṅ mba Tshùaben na' ntshob là.

⁵ Bo fà tsha' Manasé bag gham ke tùnte ts'a ghù yoṅ Yordan, a be Galad bo Basan nà.

⁶ Nummbe ngonngon Manasé lo ghù mub ntsi' netèt bon tse tse bandum, ngô Galad be ze tsemo' bon Manasé tse bandum.

⁷ Ze ndùnsi Manasé lo ke nto' Aser ntôg Makmetat, mbwe Sikém, ntshùa bu zwim, ntôg netèt ben bo ke ntswe En-Tappuash là.

⁸ Bo lo fà ngô ts'a be mbaṅ Tappuash bon Manasé, là Tappuash z'a be ndùnsi là lo b'a tse tsha' bon Efraim.

⁹ Ndùnsi ke nswe' à num fub Kana, tun fube. Men ntusô li na' mb'a mi Efraim netèt ntusô Manasé. Ndùnsi Manasé z'a be tu fub là lo ke nèn nkum dibantse.

¹⁰ Ngô z'a be mà ntèn nà na' mb'a ze Efraim, z'a be tu là be ze Manasé. Dibantse na' mbèn mbe yub ndùnsi. Bo lo ke nkwag Aser tu, nkwag Isakar ntumnyam.

¹¹ Ntùm ngô Isakar bo Aser, Manasé ghù tshen dù' li ndù: Bét-Shéan boa ntusô mi, Jibléam boa ntusô mi, ben bo ke ntswe Dor là boa ntusô mi, ben bo ke ntswe Megiddo là boa ntusô mi. A tamte fa mbe taṅ ngô tat.

¹² Mba tà ndùlala, bon Manasé ke ku'ni nekwé men ntusô là, nummbe ba Kanaan lo jù vù neghô bwe.

¹³ Là, ndùse bon Israél na' nta ntshùa yub là, bo tam fa' tu ba Kanaan, ke ta' yube.

¹⁴ Bon Yosèf tshob Yoshua ndù: Numk'o mfà nda' ta' ntsi' bag à? O fà nda' ta' tsha' bag, nda' ta' kam tsha' ntshù'. O yen ndù bag b'a ta' ngô, ndù a yàm, mbe ndù Tshùaben tam ntse bag tà nkum ndonni.

¹⁵ Yoshua tshob bo ndù: A mbe ze bin yàm nà, bin ko' nèn ntem fèn, ngù dù' ntùm ngô Férésia bo Refaim, a be ze mbat Efraim kag num bin neshu là.

¹⁶ Là bon Yosèf bùnte ndù: Mbat ke nsi ku' num bag; ba Kanaan tse bo be tômbo' là bèn ngù nkalig ntùne, tse bo be Bét-Shéan boa tse bo ntùm ntusô mi là, tse bo be mà tômbo' Yizréel là.

¹⁷ Yoshua tshob tunndà Yosèf, ze Efraim bo ze Manasé ndù: Bin b'a nzwit mèn z'a yàme, ngù neta neshu là. Be bin ke ghù à nda' mekam tsha'a.

¹⁸ Là, bin nsi ghù mbale, nummb'a b'a fèn se bin nsi teme, bèn lo' dù' ts'a ghebte bwe là. Bin nsi ta' ba Kanaan, mba mba bo ghù nkalig ntùne, ngù neta neshu là.