Yoshua 13 - NTSHOB NSI

Dù' tse bo ke' yoṅ nton yub là

¹ Yoshua lo ywène, nummbe ngu'njù tse lo tènte. Ndùlala Tshùaben tshob yi ndù: O tù' a njwèn mèn, nummbe ngu'njù tsho tènte. Ngô z'a bwô ndù o lo' là ke' a be yàme.

² Tshù ngô z'a tù' li: Njoṅ taṅ ngô Filistia fa bo njoṅ ngô Guershom fa,

³ neto' Shishor ntse mi a be nswe' mbwe Egipto là nkum ndùnsi Ekron nze tu. Yen bag là b'a dù' bo be ndo' i mba ngô Kanaan, ndù fenfen Filistia tàn be netèt bwe là. Tshen fenfen nà b'a ze Gaza, ze Asdod, ze Askalon, ze Gat, ze Ekron mba ze ba Hévia.

⁴ Neto' mà ntèn, njoṅ ngô Kanaan fa, bo Meara z'a dù' ze ngô Sidon, Afék ta nèn nkum ndùnsi Amor;

⁵ njoṅ ngô Guiblia fa, njoṅ ngô Liban fa nze ntumnyam, neto' Baal-Gad tun mbat Hermon nèn nkum ntshu Hamat;

⁶ njoṅ ngô mbat fa, neto' Liban nkum Misrefot-Maim bo Sidon. Me nsi ta' yub mbwe bon Israél. Lo' nda' tô ngabte yen ngô là yi Israél mba me na' ntshob là.

Neghabte ngô z'a mbaṅ Yordan nze ntumnyam nà

⁷ A ndùlala, ghabte yen ngô là tshé' nzwit Israél bwe'e ts'a tù' là bo kam nzwit Manasé z'a tù' là.

⁸ Tse ben Rubèn, tse Gad bo mo' kam ben Manasé lo kwé yub bag i Mosé mo' yoṅ Yordan, nze ntumnyam, ndaṅndaṅ mba Mosé ngafa' Tshùaben na' mfà bo là.

⁹ Neto' Aroer z'a be mbaṅ fub Arnon bo tusô s'a be tèt tômbo' là, njoṅ kônga Médeba fa tà nkum Dibon;

¹⁰ njoṅ ntusô Sion fa, mfen Amor z'a na' nke ntô Hesbon nà tà nkum ndùnsi bon Ammon;

¹¹ Galad, ngô Guershon, bo ze Maaka, njoṅ mbat Hermon fa, njoṅ Basan fa tà nkum Salka;

¹² njoṅ ze nufen Og Basan fa, z'a na' nke ntô Ashtarot bo Edrei z'a b'a nda' tshé' ba Refaim nà. Mosé na' mbèn ma' tshen fenfen nà ntsho nta' yube.

¹³ Là bon Israél lo ke ta' ba Guershom boa ba Maaka; bo ke ntswe à netèt ba Israél tà nse' nkum mba sènni.

¹⁴ A nda' ze nzwit Lévi là ze Mosé na' mbe ke fà ntsi' bo là. Mi ntsi' b'a tshule'te tse mbwôg be nkù i mbwe Tshùaben Nsi ba Israél, ndaṅndaṅ mb'a na' ntshob yi là.

¹⁵ Ndùlala Mosé lo fà ze dù' ben Rubèn ndaṅndaṅ mba tshob tunndà be yi là.

¹⁶ Tshob tsha' lo ke ndo Aroer, mbaṅ fub Arnon bo tusô s'a tèt tômbo' là; mba njoṅ tômbo' fa mbaṅ Médeba b'a be bwe.

¹⁷ Hesbon boa njoṅ mi ntusô fa ntùm tômbo'o, Dibon, Bamot-Baal, Bét-Baal-Meon.

¹⁸ Jahats, Kedémot, Méfaat,

¹⁹ Kirjataim, Sibma, Tséret-Hashashar num mbat z'a tômbo' là.

²⁰ Bét-Béor, dù' swe'swe' Pisga, Bét-Yesimot,

²¹ njoṅ ntusô fa mà tômbo'o, njoṅ ze nufen Sion fa, mfen Amor, z'a na' nke ntô Hesbon nà. Mosé lo ton i ntsho a boa fenfen Madian: Evi, Rékem, Tsur bo Réba. Bo na' mb'a nte' Sion, nke ntswe ntùm ngô.

²² Mba Balaam nshum Béor ngaka, ngangàm lo be netèt ben tse bon Israél na' ngwatte yub là.

²³ Yordan na' mbèn mbe ze ndùnsi tse tsha' ben Rubèn. Tshù ze bag ben Rubèn nà, ntusô boa ngô, ndaṅndaṅ mba tshob tunndà be là.

²⁴ Mosé lo fà mba tse tsha' ben Gad, ndaṅndaṅ mba tshob tunndà be là.

²⁵ Tshob tsha' na' mb'a: Yazer, njoṅ ntusô Galad fa, ta' kam ngô bon Ammon tà nkum Aroer z'a be mbwe Rabba là,

²⁶ neto' Hesbon nkum Ramat-Mitspa bo Bétonim, neto' Mahanaim nkum ndùnsi Debir,

²⁷ bo tômbo'o, Bét-Haram, Sukkot bo Tsafon, tshé' nufen Sion, mfen Hesbon. Yordan bèn mbe ndùnsi tà nkum tôg dibantse Kinnéret z'a be mo' yoṅ Yordan, nze ntumnyam nà.

²⁸ Tshù mi ntsi' nshumnshum Gad là, ndaṅndaṅ mba tshob tunndà be là. Mub ntusô boa tshob ngô b'a bwe.

²⁹ Mosé lo fà ze bag tshé' kam nzwit bon Manasé, ndaṅndaṅ mba tshob tunndà be là.

³⁰ Tshob tsha' to' Mahanaim, njoṅ Basan fa, njoṅ ze nufen Og, mfen Basan fa mba taṅ ngô Yaïr Basan fa. A ghù ntusô ṅam ntôge.

³¹ Ta' tshé' kam Galad, Ashtarot bo Edrei, ntusô nufen Og mi a Basan nà, be ze ju nshumnshum Makir, nshum Manasé, bo fà ta' kam bon Makir, ndaṅndaṅ mba tshob tunndà be là.

³² Tshù dù' ze Mosé ghabte ndùs'a na' mbe tômbo' Moab, mo' yoṅ Yordan, mbwe Yériko, nze ntumnyam nà.

³³ Mosé ke fà ntsi' nzwit Lévi; Tshùaben bèn mbe mi ntsi' mb'a na' ntshob yi là.