Yoshua 11 - NTSHOB NSI

Ntsho ndùb mbaṅ ntse mi a Mérom nà

¹ Yabin mfen Hatsor lo yoṅ mbe ju' tshen nu là, ntum ba ntum Yobab mfen Madon, mfen Shimron, mfen Akshaf,

² fenfen tse bo be tu, num mbale, ntùm tômbo'o, ntèn mà Kinnéret, tunnsi boa dù' mbù'mbù' Dor bag mbinyam nà;

³ ntum ba ntum fenfen Kanaan tse bo ntumnyam, bo mbinyam, tse Amor, tse Hétia, tse Férésia, tse Yébusia num mbale boa tse Hévia mbaṅ Hermon ntùm ngô Mitspa.

⁴ Ndùlala njoṅ yub fa tamte ndo nsi boa tshob ghama' ntsho num Israél. Bo lo yàm ntshùa nkwa mi a nkaṅ ntse là, ngù ba nyàm boa nkalig ndù a yàm ntshùate.

⁵ Njoṅ tshen fenfen ni fa kùmte nse' nte mbàn mbaṅ ntse Mérom, num nema' Israél ntsho.

⁶ Tshùaben tshob Yoshua ndù: Kà bwôg yube, nummbe me nsi ma' yub mbwe Israél ndamnjù be kua' num yen ngelaṅ ni; o nsi kebte nga nku nyàmdiaṅ tshobe, ton nkalig mube.

⁷ Yoshua boa njoṅ tse ghama' ntsho fa vù num bo, bo ke lèn, mbaṅ ntse Mérom, nkab mbu num bo.

⁸ Tshùaben fà yub ba Israél, bo lo' yube, njoṅ yub tà nkum Sidon nze ndùb, num ntse Misrefot-Maim, tà nkum tômbo' Mitspa z'a ntumnyam nà; bo zwite yub kà sàm mèn ke tum.

⁹ Yoshua ghù num bo mba Tshùaben na' ntshob yi là: A kebte nga nku nyàmdiaṅ tshobe, nton nkalig mube.

Nelo' tusô Hatsor

¹⁰ Yoshua be bèn njam be num yen ngelaṅ njù là ndo' Hatsor, ngwat mfen i. Hatsor na' mb'a tètla' tshen nufen nà ngelaṅ mbwe.

¹¹ A watte njoṅ tshu fa ts'a ghù zwiag là ntùm sen tusô là, ntam bu' bwe. Bo ke faṅ mba ta' mèn ntùn, mbèn nso mbwôg mum ngô Hatsor.

¹² Yoshua lo' ngô tshen fenfen nà tse bo tamte ndo nsi num Israél là, ndo' mba fenfen tshobe. A watte yube, ntam bu' mum ngô ndaṅndaṅ mba Mosé ngafa' Tshùaben na' ntshob là.

¹³ Mba ndùlala ba Israél ke ton ngô ts'a be num nkônga là, mb'a b'a nda' Hatsor ze Yoshua na' nton nà.

¹⁴ Ba Israél lag ntsha' tshen ngô là fa, ndo' ba nyàm; nda' ndù ngwatte benntùn fa kà nkum ndùse bo miagte nezwite njoṅ yub fa là.

¹⁵ Njoṅ tshu fa tse Tshùaben na' ntshob ngafa' i Mosé, a bèn ntshob ze Yoshua là, Yoshua ghù ze njoṅ i fa, ke wag sàm ju num njoṅ i fa ze Tshùaben na' ntshob Mosé là.

Yoshua miagte nelo' tshé' ngô

¹⁶ Tshù mba Yoshua na' ndo' ntsho nkwé njoṅ yen ngô li fa yi là: Ngô mbale, ngô ntèn, njoṅ ngô Gosen fa, ngô kù'kù', ngô tômbo'o, ngô Israél num mbù'mbù', bo ze tômbo'o

¹⁷ fe num mbat banban z'a be nshù ntshùa i Seir là nèn nkum Baal-Gad là, tà nèn nkum tômbo' Liban, mbaṅ mbat Hermon. A lo' njoṅ fenfen tshob fa ngwatte yube.

¹⁸ Ntsho ze Yoshua le' tshen fenfen nà yi là lo tswe neshu.

¹⁹ Sàm ngô mba ntshù' ke tum mebwô boa ba Israél, mb'a b'a nda' ba Hévia tse Gabaon. Ba Israél ke ndo' a be neta ndo' mba zit dù' lo yi.

²⁰ Nummbe Tshùaben lo kag sagntù ntù tshen ngô là; ndù boa ba Israél le' ntsho. Ndùlala ndù bo tam bu' num bo, mbiagte yub ndaṅndaṅ mba Tshùaben na' ntshob Mosé là.

²¹ Be num yen ngelaṅ nà Yoshua lo nsi nzwite benntùn fa Anakim z'a be num mbat Hébron, Debir, Anab là, mba njoṅ ngô mbat fa Yuda bo Israél. Yoshua tam bu' num bo boa ngô yube.

²² A ke bèn ntswe Anakim ntùm ngô Israél, l'a nèn Gaza, Gat bo Asdod.

²³ Ndùlala Yoshua lo' njoṅ ngô fa mba Tshùaben na' ntshob Mosé là, ngabte njoṅ tunndà tshob fa. A tshùa ndùlala ngô fite wul i num ntsho.