Yoshua 10 - NTSHOB NSI

Ntsho ndùb mbaṅ Gabaon

¹ Adoni-Tsédek, mfen Yérusalém ju' ndù Yoshua lo' Aï, ntam bu' bwe, ngù num mfen Aï, mb'a na' ngù num Yériko bo mfen i là. A lo bèn nke ntswe à netèt bo.

² A tshùa ndùlala bwôg ghom ba Yérusalém. Nummbe Gabaon na' mb'a tusô ndùb, mbe tusô ndù a zi mba s'a ghù mfen nà, ndù a tshùa Aï neshu, benntùn tse bo ke ntswe bwe là be ba nduku.

³ Adoni-Tsédek, mfen Yérusalém tum bo tshob Hoham mfen Hébron, Piream mfen Yarmut, Yafia mfen Lakis bo Debir mfen Eglon ndù:

⁴ Bin se' ntèl àm, njwimt'àm, ndù bag bin ma' Gabaon ntsho ndo' i, nummb'a ghù fite bo Yoshua mba njoṅ bon Israél fa.

⁵ Fenfen Amor tàn ze Yérusalém, ze Hébron, ze Yarmut, ze Lakis, ze Eglon tamte nko' nèn boa tshob ntshu ntsho, nte mbàn mbaṅ Gabaon, nkam i ntsho.

⁶ Ba Gabaon tum bo nèn ntshob Yoshua mà ntùm mbàn z'a Guilgal là ndù: Kà ghua' ghafa' tsho, ko' nse' mbaṅ bag ndende, nkwé yage; ywimte yage, nummbe fenfen Amor tse bo be ntswe num mbat là tamte ndo nsi num bag.

⁷ Ndùlala Yoshua lo Guilgal boa njoṅ ghama' ntsho fa, njoṅ neta benntùn fa, nko' nèn bwe.

⁸ Tshùaben tshob Yoshua ndù: Kà bwôg yube, nummbe m'a' fà yub ntùm mbu mu, mèn ke nsi tum netèt bwe tsin mbwe o.

⁹ Yoshua vù num bo be ndende, mbe be ndù a zin ta' tèttswe' ntùn nelo fe Guilgal.

¹⁰ Tshùaben ghù bo kù mbwe ba Israél. Ba Israél yab nu num bo mbaṅ Gabaon, njoṅ yub num manze z'a tshwèt nko' nèn Bét-Horon nà, ntshùa yub ntsho Azéka bo Makkéda.

¹¹ Mba bo be mbwe ba Israél nke nkù, nke nswe' dù' swe'swe' Bét-Horon nà, Tshùaben ghù nkô ndoṅ swe' mfe kamànyam ngwù num bo tà nèn nkum Azéka, mbiagte yube. Ben tse men nkô ndoṅ nywinmbaṅ nà na' nzwite yub là yàm ntshùa ben tse bon Israél zwite yub ṅwi là.

¹² Yoshua lo tshob Tshùaben mbwe bon Israél lé'njù s'a fà ba Amor yi là ndù: Lagnyam, tsin num Gabaon; wù maṅwù tsin num tômbo' Ajalon!

¹³ Ndùlala lagnyam tsin, maṅwù ke bèn nekumte, tà nkum ndùse ngô na' nsôte yagte mba' num ghakeban tse là. Bo ke' kite yen nu là ntùm ṅwa'ni Mèn netsin ké? Lagnyam tsin mfe tèt kamànyam, ke nànte nebi ndùlala num nguan ta' lé'njù ntùn.

¹⁴ Mo' lé'njù lo ke to' be se Tshùaben ju' nze mènntùn mba sen lé'njù là là, mbe ndù lèn i ke' bèn mbe. Nummbe Tshùaben bèn nke nde' ntsho num ze tu ba Israél.

¹⁵ Yoshua boa njoṅ ba Israél fa bèn njam ntùm mbàn yub Guilgal.

Yoshua zwi fenfen tàn ts'a ma' ntsho ntshùa yub là

¹⁶ Fenfen tàn nà kù nèn ndem ntùm ngabloṅ Makkéda.

¹⁷ Bo soṅ Yoshua yen nu là ntshob ndù: Fenfen tàn nà tse bo lem ntùm ngabloṅ Makkéda là.

¹⁸ Yoshua bùnte ndù: Bin bwoṅte ndoṅ ndùbndùb ntshu ngabloṅ, njab benntùn bwe bo ke mbébe.

¹⁹ Là tu wut tsine, kà bin tsin neyoṅ ghakeban tsine, bin kebte yube, ke faṅ ndù bo tsho ntùm ntusô mube, nummbe Tshùaben Nsi zin fà yub ntùm mbu mine.

²⁰ Ndùse Yoshua boa ba Israél miagte nebiagte bo nezwite benntùn nà, tsemo' bon ndô benntùn tswe ntum bu bo ntsho ntùm ntusô mi bo kut ndiaṅ mbum nà;

²¹ njoṅ ngô fa se' mbaṅ Yoshua ntùm fite mbaṅ Makkéda, sàm mèn ke ku'ni nebù' tu i nsi num bon Israél.

²² Yoshua tshob ndù: Bin bù' nze ngabloṅ, nsô fenfen tàn nà nse' yi mbwe àm.

²³ Bo ghù kua' mb'a tshob là, ndo' fenfen tàn tse bo sô yub ngabloṅ nà nse' yi mbwe i. A na' mb'a: Mfen Yérusalém, mfen Hébron, mfen Yarmut, mfen Lakis, mfen Eglon.

²⁴ Ndùse bo lo' tshen fenfen ni nse' yi mbwe Yoshua là, a tsiaṅ njoṅ ba Israél fa, ntshob tàmànjô ghama' ntsho tse boa bo na' nzin nà ndù: Bin kù'te nse' nte nku min num kekot tshen fenfen ni. Bo kù'te nse' nte nku mub num kekot yub.

²⁵ Ndùlala Yoshua tshob bo ndù: Kà bin bwôg, ke vètte, bin lo' neta, ngù fènntù, nummbe Tshùaben nsi ke ghù ghakeban tsin tse bin nsi ke ma' yub ntsho l'a be ndùlala.

²⁶ Yen nà be tôge, Yoshua lab yube, nzwite yube. Bo taṅte yub num ntù ntàn, bo ghô be tù tà nèn nkum mfetnjù.

²⁷ Lagnyam be bi Yoshua tshob bo swe' fe tshob tù ma' ntùm ngabloṅ dù' ze bo na' ndem nà, ndo' ndoṅ ndùb nkab ntshu ngabloṅ; men ndoṅ nà ke' bwe tà nkum sènni.

Yoshua ma' ntusô nze mà ntèn ntsho

²⁸ Yoshua lo' ngô Makkéda be sen lé'njù là, nzwite benntùn mba mfen yub. A tam bu' num tusô boa tshu nezwiag fa, ke faṅ sàm mèn tum Makkéda. A ghù num mfen Makkéda mb'a na' ngù num mfen Yériko là.

²⁹ Yoshua boa ba Israél lo Makkéda ntshùa Libna, nkam i ntsho.

³⁰ Tshùaben fà mba yi ze bo mfen i ba Israél, a zwi i boa njoṅ tshu nezwiag fa, ke bam sàm mèn tum. A ghù num mfen yub mb'a na' ngù num mfen Yériko là.

³¹ Yoshua boa njoṅ ba Israél fa lo Libna nèn Lakis, nte mbàn yub bwe, kam i ntsho.

³² Tshùaben fà Lakis ntùm mbu ba Israél, bo lo' i num mbatte lé'njù bàa ngwatte benntùn, nzwite njoṅ tshu fa tse bo ghù nzwiag mb'a na' ngù ntùm Libna là.

³³ Ndùlala Horam mfen Guézer ko' nse' ywimte Lakis. Yoshua bu't'é bo ze ngô, ke faṅ sàm mèn tum bwe.

³⁴ Yoshua lo bo ngô ndut nèn Eglon. Bo te mbàn yub bwe, nkam i ntsho.

³⁵ Bo lo' i be sen lé'njù là, ngwatte njoṅ tshu fa ts'a ghù zwiag là, ntam bu' tusô. Bo ghù be ndaṅndaṅ mba bo na' ngù ntùm Lakis là.

³⁶ Yoshua bèn ndo' ngô boa bo lo Eglon nèn Hébron, bo tsho bwe nkam ntsho.

³⁷ Bo lo' ngô, ngwat mfen boa benntùn, mbiagte ntaṅla' boa njoṅ tshu fa tse bo ghù zwiag là, ke bam sàm mèn tum bwe. Bo ghù num Hébron be mba bo ghù num Eglon nà. Bo tam bu' num tusô boa njoṅ tshu nezwiag ts'a be bwe là.

³⁸ Yen nà be tshùa Yoshua boa njoṅ ba Israél fa kaṅ wut yub nkam Debir ntsho;

³⁹ a lo' ngô bo mfen, ndo' ntaṅla' mi, ngwatte benntùn, ntam bu' num njoṅ tshu fa tse bo ghù zwiag là, ke bam sàm mèn tum. A ghù num Debir bo mfen i, mb'a na' ngù num Hébron, Libna bo mfen i là.

⁴⁰ Yoshua lo' ntsho nkwé njoṅ ngô fa yi: Mbale, Négéb, ngô kù'kù', nkônga, boa njoṅ fenfen tshob fa, ke bam sàm mèn tum bwe. A tam bu' num njoṅ tshu fa tse bo tshwèt nzwiag là, ndaṅndaṅ mba Tshùaben Nsi Israél na' ntshob là.

⁴¹ Yoshua lo' tshen ngô là Kadèsh-Barnéa nèn nkum Gaza, ndo' njoṅ ngô Gosen fa nèn nkum Gabaon.

⁴² Yoshua nke ndo' mba tshen fenfen nà boa ngô yube, nummbe Tshùaben Nsi Israél lo ke nde' ntsho num ze njam Israél.

⁴³ Yoshua boa njoṅ ba Israél fa bèn ntùm mbàn Guilgal.