Yoshua 1 - NTSHOB NSI

Yoshua tshùb tu ntùm ngô

¹ Ndùse Mosé, ngafa' Tshùaben na' nkwù là, Tshùaben tshob Yoshua nshum Nun, ngafa' Mosé ndù:

² Ngafa' àm Mosé kwù. Ndonni a bwô ndù o dut Yordan bin yen nzwit bon Israél li, ntsho ntùm ngô ze me fà bin nà.

³ Me nsi fà mba zit dù' lo ze bin te ku zin bwe là bin, ndaṅndaṅ mba me na' nka' Mosé là.

⁴ Zin ngô nsi to' kônkwa bo Liban nèn ndùlala tà kum num ta'ntse ndùb Efrat, num njoṅ ngô ba Hit tà nèn nkum dibantse ndùb z'a be mbinyam nà.

⁵ Bag wù nsi ke be njoṅ ndù fa z'o ke' ntùn nà. Sàm mèn ke nsi bù' tu i nsi mbwe o. Me nsi ke be bag wù mba me na' mbe bag Mosé là; me ke nsi kag o; me ke nsi ghua' o.

⁶ Ghù tànntù bo fènntù; a wù bèn lo' yen nzwit mèn ni tsho yi ntùm ngô ze me na' ntshob nsaṅlaṅ bwe tà tshob ndù me nsi fà bo là.

⁷ Nda' ndù a bwô o ghù tànntù bo fènntù neke nze ntshù' màm mi ngafa' àm Mosé na' nkite wù là kua' mebwô. Kà kù'te mbaṅ bwe, nèn bu zwim ke bu kwéb lo, ndùlala ndù njoṅ mfa' fa mi o to'te là vù lag.

⁸ Kà ntshob yen ṅwa'ni li ke ntag ntshu o mba zit ndù lo. Ke nsiaṅte nu bwe mbwôgtshù bo tèttswe', ndùlala ndù o ke ngù a mba bo kite ntùm bwe là. A nsi tshùa ndùlala o ke nju' mebwô ntùm nzin mu, tsho tshunu ke ngwù lag kua' mebwô.

⁹ Tshù ju ze me bètt'o yi li: Ghù tànntù bo fènntù. Kà bwôg, ke vètte, nummbe bin Tshùaben a' ke mbe mba yà lo dù' z'o nsi nèn nà.

Yoshua nabte mba bo nsi dut ntse Yordan nà

¹⁰ Yoshua tshob men ntshob li tàmànjô ndù:

¹¹ Bin zinte ntùm mbàn, ntshob men ntshob li ngô ndù: Bin nabte zin jujù nze, nummb'a tù' lé'njù tat bin dut Yordan, nèn nde' ngô ze Tshùaben fà bin mba zin ju là.

¹² Yoshua tshob ben Rubèn, ben Gad boa mo' kam tunndà Manasé ndù:

¹³ Bin kwimte ju ze Mosé ngafa' Tshùaben na' nkite bin nà, a lo tshob ndùse ndù: Tshùaben Nsi zin bam fite bin, mbèn mfà yen ngô li bin.

¹⁴ Zwi tsine, bon tsine, boa nyàm tsin nsi ghô ntùm ngô ze Mosé na' mfà bin yen yoṅ Yordan ni là. Là, mbe se' mba bin neta bon bandum nà, a bwô ndù bin lo' tshu ntsho ndut nèn mbwe fèt tsin njwimte yube.

¹⁵ Bin ghù ndùlala tà nkum ndùse Tshùaben bam fite fèt tsin mba zin tu wut, tu wut tshob be ntùm ngô ze Tshùaben Nsi zin fà bo là. Yen nà nsi be tôg bin bèn njam ntùm zin ngô, z'a be zin ju, ndù Mosé ngafa' Tshùaben na' mbèn mfà bin yen yoṅ Yordan ni là. A b'a nze bag ntumnyam.

¹⁶ Bo bùnte Yoshua ntshob ndù: Bag nsi ghù mba ke lo z'o tshob bag là, nèn mba yà lo dù' z'o nsi tum yag là.

¹⁷ Bag nsi ke ju'ni wù ndaṅndaṅ mba bag na' nke nju'ni Mosé là. A bwô nda' ndù Tshùaben Nsi be wù mb'a na' mbe bo Mosé là.

¹⁸ Mba we lo z'a ta tu num ju z'o nsi tshob yi, ke ju'ni num mba ke lo z'o nsi tshob yi là mba mi ntsho'fa' b'a vùkob. Tàn nda' ntù, mbèn mfènte.