Yona 4 - NTSHOB NSI

Yona ya ntù, Tshùaben kag i

¹ Yen nu là bag Yona neshu, a ya ntù.

² A le'te Tshùaben ntshob ndù: Tshùaben, me lo ke tshob ké? A ke ju ze me ke ntshob ndùse me ke' ntùm yàm ngô là ké? A ju ze me ndiag nebùt kà nke nkù nèn Tarsis là. Nummbe me lo lèn ndù o b'a Nsi tshàmndèn mba ze kondèn, nke ndèt wut num yantù, mbe ngaju ntùm bwôntù, mbe ndù o be mbate nukebwô ntù o.

³ Tshùaben, ndonni lo' yôg sàm, nummbe vù bwô àm ntshùa yôg.

⁴ Tshùaben bùnte Yona ndù: O ghù a bwô mb'o ya ntù là ké?

⁵ Ndùlala Yona tum ntùm ngô, nèn ntswe bag ntumnyam. A tsho bwe nkut ntàb, ntswe bam bwe neyen ju z'a nsi ṅwag mum ngô là.

⁶ Tshùaben Nsi ghù tù bit, nku'u, nèn tù ndo' netshaṅ i nkabte tu Yona yi num neghù ndù yantù i mi. Ntù Yona tsiaṅte neshu num sen tù là.

⁷ Là njù be làne, Nsi ghù mo' mbé' se' mà mfôgnjù mfèt tù là, a jum.

⁸ Nyam be tume, Nsi ghù mo' fetmbaṅ nedum lo bag ntumnyam, nyam ton, lab tu Yona, k'a yub, ntù' nekwù. Yona lon vù, ntshob ndù: Vù bwô àm ntshùa yôg.

⁹ Nsi tshob Yona ndù: O ghù a bwô mb'o ya ntù num nu tù là ké? A bùnte ndù: Me ghù a bwô mba me ya ntù k'a tù' b'a ze vù là.

¹⁰ Tshùaben tshob ndù: O ko ndèn tù z'o ke' yen mo' sàm ngùtni bwe là, o ke bèn ngù k'a nku'u, a lo bit ta' tèttswe' mbèn njum ta' tèttswe'.

¹¹ Tu wul àm, be me ke ko yàm ndèn Ninive, ngô ndùb ké? Benntùn num ntùm bwe ntsha' ntshob bàa bon bàa nkù, ndù bo ke' lèn fagte netèt numebwô bo nukebwô, mba bwoṅ nyàm yàme.