Yona 3 - NTSHOB NSI

Mba Yona tshob ntshob Nsi Ninive, ba Ninive kaṅ ntù tshob là

¹ Tshù ntshob Tshùaben mi a tshob Yona mbatte yoṅ bàa li:

² Lo tù, nèn Ninive, ngô ndùb, ntshob nu ze me nsi tshob wù là bwe.

³ Ndùlala Yona lo tù nèn Ninive ndaṅndaṅ mba Tshùaben tshob yi là. Tshù, Ninive na' mb'a kua' mà ngô ndùb, ze be mèn zinte mum bwe lé'njù tat là.

⁴ Yona bwôgmbwe nzinte Ninive ta' lé'njù nke nkua' ntshob ndù: A tù' lé'njù ṅam nkuà Ninive bagte!

⁵ Ba Ninive bam Nsi, ntswe nziku' njoṅ yub fa, ma' nke'mbàm num bo, neto' num ben ndùbndùb nèn nkum num ben nke'nke'e.

⁶ Yen tshô là tam toṅ mfen Ninive; a lo num ko'fen se, nsô kummbaṅ se, ma' nke'bàm num i, ntswe mum bwembwôge.

⁷ Mfen boa kamkam tse fà yen ntshù' li mum ngô Ninive ntshob ndù: Kà benntùn, nyàm, nyàmna', mbwe, kwag sàm ju ntshu bo, kà bo fèt nenà, ke nu ntse!

⁸ A bwô ndù benntùn mba nyàm ma' nke'mbàm num bo, nkua' ntsiaṅ Nsi yub neta fa; a bwô ndù bo kag manze kebwô mba ngùninu nefètte lem tse mbu mub be mfàn nà!

⁹ Be mo' ndù Nsi kôgte yantù i, ke bèn ngù mb'a tshob là; be mo' ndù tonkèt yantù i fi, kà be ke bèn nkwùte.

¹⁰ Nsi yen mba bo ghù ndùlala, mba mba bo kag manze kebwô là. Ndùlala nkôgte yantù i num nukebwô z'a ke nkô neghù num bo là, ke bèn neghù.