Yona 2 - NTSHOB NSI

Yona bam ndô ngontse, nde'te Tshùaben a yôg i

¹ Tshùaben ghù mo' mà ndô ngontse ndùb se' mi Yona, Yona tswe bam i lé'njù tat, mbwôgtshù mba tèttswe'.

² Yona tswe bam ngontse nde'te Tshùaben Nsi i ntshob ndù:

³ Me lo tsiaṅ lén Tshùaben mum nge' àm, a bùnte me. Me tsin bam ngô fe ben nkua'a, a ju' nz'àm.

⁴ O lo ma' àm ntùm gheme, mà bam dibantse. Koṅntse lo diaṅ àm mbume. Njoṅ fetntse tsho fa mba njoṅ nswentse mu fa lo tshùa num àm.

⁵ Me nke ntshob ndù: Bo tshag àm ngùanesà num miag mu! Là, me be nke nke' ndôte nze bag dù' ze ndà o ze nelàn be là.

⁶ Ntse lo kabt'àm kà nsô yôg num àm. Ghem lo diaṅ tu àm mbume.

⁷ Me lo swe' tà nèn nkum mà bam tun mbale, njoṅ tshub tsha' fa fùn àm bwe matmat. Là, o lo ghù me ko' mà mum tô belaṅ ntùntùn, me Tshùaben Nsi àm.

⁸ Ndùse zwiag sàm fam mà ntùm ntù àm nà, me kwimte Tshùaben, le'te se' tà nkum tà mbaṅ o, ntùm ndà o ze nelàne.

⁹ Ben tse bo be ntaṅ njam neto banban nà, be nga kondèn ze Nsi ghù num bo là.

¹⁰ Mba me là, me nsi ton tshu wù, be ton ke fà nz'àm tù lo' ghamt'o yi. Me nsi zwiagte nka'ni ze me na' ngù là. Yôg ke mfe à Tshùaben.

¹¹ Tshùaben tshob ngontse, ngontse ywi' Yona num tsha'a njam njù.